1 Sang'weli 28 - Bibilia Ilagano Lya Kale 2015

Saulo na Nogi wa Endoli

¹ Ū mu shikū jenījo a Bafilisiti būkuminga mabità gabo kwilwisha būlūgū nabo a Baisilaeli. Ū Akishi ūng'wīla ū Daūdi, “Shikwigeleelilwe ūdeebe gīkī ū bebe na a banhū bako mukūbiza hamò nane ū kū būlūgū.”

² Daūdi nang'hwe ūshosha alīhaya, “Būgatū a henaho h'ūkūbona ūmo akīītīlaga ū ntūmami wako. Ū Akishi ūhaya, Yabeela, nīyo ū bebe ūkūbiza nang'hani wane wa shikū jose.”

³ Ū mu shikū jenījo ū Sang'weli walī wamala kūcha, a Baisilaeli a bose būnīla, na kūnjīka mu nzengo gwa Lama ūko wikalaga. Ū Saulo walī wabapeeja a balogi na a bachūja, bīnga mo ū mu sī.

⁴ Hūna a Bafilisiti bibilinga, biza kūtūūla ng'hambī yabo Shunemu; ū Saulo nang'hwe ūbabilinga pye a Baisilaeli ūtūūla ng'hambī yakwe Giliboa.

⁵ Ū Saulo aho wagabona a mabità ga Bafilisiti, ogoha no ūyūdetema ū mu ng'holò kūlwa nguno ya boobà.

⁶ Aho wamūūja ū SEEBA atanshokegije mhayo gose gose, ībize mu nzīla ya shilooti nūūlū kūtūmamīla Ulimu, nūūlū nzīla ya bahangi.

⁷ A henaho ū Saulo ūbawīla a batūmami bakwe, “Nikoobelagi nkīma nchūja, naje koi nakīlole kwenūko ī nzīla yane!” Būng'wīla, “Alīho ūmò akikalaga Endoli.”

⁸ Hūna ū Saulo ūzwala shizwalo shingī nasho sha kūng'wīta ajimīlīkane; mu makanza ga būjikū ūja ū kūlī nkīma ng'wenūyo na banhū babīlī. Aho washika ūhaya, “Nitanīlage isamvwa lya būchūja, ūneenhele munhū ūyo nalakūwīle.”

⁹ Alīyo ū nkīma ng'wenūyo ūng'wīla, “Baba tūhaya nang'ho wīmanile a hene īyo wīyīta ū Saulo; ī gīkī a balogi na a bachūja wabamala kūbabūlaga ū mu sī yenīyī! Nibūlī ūlībūtūūlīla ntego gwabūbi gīko ū būpanga wane, ūningīje mu kūcha?”

¹⁰ Ū Saulo ūng'wilahīlīla ū nkīma ng'wenūyo mu lina lya ng'wa SEEBA; ūhaya, “Nalīkwilahīlīla mu lina lya ng'wa SEEBA mpanga gīkī, ūtūūpandīka nsango kūlwa nguno ya mhayo gwenūyū.”

¹¹ Hūna ū nkīma ūmūūja, “Nani ūyo nakwenhele?” Nang'hwe ūhaya, “Nenhelage Sang'weli.”

¹² Ū nkīma ng'wenūyo aho wamona ū Sang'weli, ūlīla na'ilaka lya higūlya alīng'wīla ū Saulo, “Nibūlī wanilemba baba alīyo gashi ū bebe h'ūlī Saulo!”

¹³ Ū ntemi ūng'wīla, “Īnjaga ū boobà, ūlībona kī?” Ū nkīma ūhaya, “Nalīmona Mulungu wagulumūka kūfuma mu gatī ya sī!”

¹⁴ Nang'hwe ūbūūja, “Alī na suso kī?” Ū nkīma ūhaya, “Ūūyo namhala wagulumūka, aliza azwalile ng'hanjo.” Ū Saulo ūng'witegeleja gīkī hū ng'wene ū Sang'weli, na lūūlū ūtuja mazwi, winama kūshisha ū būshū būkuumya hasī.

Saulo kūwīlwa mihayo na Sang'weli

¹⁵ Ū Sang'weli ūng'wīla ū Saulo, “Nibūlī wanikoya koya kūshisha kūnenha kūūnū?” Ū Saulo ūshosha alīhaya, “Ī haha nalī mu makoye madito no, a Bafilisiti baanidumīlile kwilwisha būlūgū naane; alīyo ū Mulungu wanilekile, ooyile ū kūnishokeja mhayo mu nzīla yose yose, ībize ya bahangi nūūlū ya shilooti. H'ī nguno yene naabona nakwitane bebe ūniwīle ū gwa kwīta.”

¹⁶ Sang'weli nang'hwe ūnshokeja alīng'wīla, “Ū nene ūlīnibūūja kūkooba kī, īkī wakūlekile ū SEEBA, ūgalūka kūbiza ng'wanishi wako?

¹⁷ Ū SEEBA wagūshikīlīgije ūyo walī wagūhaya mu nzīla yane. Ū SEEBA wabūtandūlile ū būtemi ūwīnja ū mu nkono gwako, ūng'winha nzenganwa ng'wiyo, Daūdi.

¹⁸ Ī haha ū SEEBA alīkwītīla ī yenīyo kūlwa nguno ūkaleka ū kūng'wigwa, ūlemeelwa ū kūbashikīlīgīja a Baamaleki kūlenganīla nū būpelanu wakwe.

¹⁹ Ū SEEBA akūkūtūūla mu makono ga Bafilisiti ū bebe, hamò na a Baisilaeli. Nīyo ī ntondo ū bebe na a bitūnja bako mukūbiza hamò naane; nī libità lya Baisilaeli ū SEEBA akūlītūūla mu makono ga Bafilisiti.”

²⁰ Ū Saulo ūgwa loolo ū mīlī, kūlwa nguno ya mihayo ya ng'wa Sang'weli; yūng'ogohya no, ūgwa pu hasī haho na haho ūgololoka henaho. Walī atī na nguzu gete nguno walī ataliile ī līīmi lya lūshikū lwenūlo, nī būjikū yaho.

²¹ Ū nkīma ng'wenūyo wiza aho walī ū Saulo, aho wamona ūmo walī ogohela ūng'wīla; “Baba ūlībona gīkī ū nene ntūmami wako naalī naakūdegeleka, nūbūdiimīīla mu nkono ū būpanga wane nīta gīt'ūmo walī waniwīlīla.

²² Na lūūlū baba nalīkwikūmbīlīja nang'ho ī haha ūndegeleke ū ntūmami wako; ūzunye nakūbeegeje shilīwa ūlye ūpandīke nguzu, ūdūle kūshimīza ūje.”

²³ Ū wei ūlema ūhaya, “Yaya natūūlyaga!” Alīyo a banhū bakwe būdimana nū nkīma ng'wenūyo; bandya kūnganikīla kūshisha nose ūbigwa, ūbūūka a hasī wigasha hisumbī.

²⁴ Ū nkīma ng'wenūyo akasangwa alī na mūūga ya ng'ombe ng'īnu a ha ng'wakwe; wīsīnza haho na haho, ūsola na būsu ūbūluba, ūbeja migatī ya būsu būtī na shibimbya.

²⁵ Hūna ūntengela ū Saulo na a banhū bakwe, būlya. Ū būjikū wenūbo būbūūka būja.