1 Sang'weli 27 - Bibilia Ilagano Lya Kale 2015

Daūdi kūja kwikala kū Bafilisiti

¹ Ū Daūdi aho wideedeng'hanya ū mu ng'holò yakwe ūbona, “Ī gete lūshikū lūmò ū nkono go ng'wa Saulo gūkūnibūlaga. Na lūūlū ī haha gūtīho mhayo gūngī ū gwawiza ūyo nadūgije kūgwīta, ūlū ītī kūpeelela kū sī ya Bafilisiti dūhū; hūna ū Saulo akūgwa ng'holò ooye ū kwikala ūnikooba hose hose ū mu sī ya Isilaeli, nguno nakūbiza nīngaga ū mu nkono gwakwe.”

² Hūna ng'hana ū Daūdi wīnga nabo a banhū bakwe abo magana atandatū, būja kū ng'wa Akishi ntemi wa Gaasi ng'witūnja o ng'wa Maoki.

³ Ū Daūdi na a banhū bakwe būūkikala na Akishi kwenūko Gaasi; būlī ng'wene walī na kaya yakwe, ū Daūdi walī nabo a bake bakwe a babīlī, ū Ahinoamu wa Yezileeli nū Abigaili wa Kalimeli, ūyo akachīlwa ngoshi Nabaali.

⁴ Ū Saulo aho wawīlwa gīkī ū Daūdi wapeelelile Gaasi, ooya ū kwikala akūnkoobaga.

⁵ Ū Daūdi ūng'wīla ū Akishi, “Ūlū ūlīnibona ū mu miso gako gīkī nigeleelilwe kwanukūlwa, nilolalolelage ipandī lya kwikala mu nzengo gūmò gwaho ū mu mizengo ya mu sī yako, nikale kwenūko; ī gīsī īlīho nguno kī ū ntūmami wako ū kwikala ng'wikūlū hamò nang'ho?”

⁶ Na lūūlū ū lūshikū lwenūlo ū Akishi ūng'winha ū Daūdi nzengo gwa Zikilagi; kwandīja ikanza lyenīlo kūshisha lelo ū nzengo gwenūyo gūmanīīkile gīkī gwa batemi ba Yuda.

⁷ Ū Daūdi akikala ū mu sī ya Bafilisiti ikanza lya ng'waka ngima na myeji īnè.

Kikalīle ka ng'wa Daūdi mu Zikilagi

⁸ Na lūūlū, ū Daūdi na a banhū bakwe bajaga kūbadumīla Bageshuli, Bagelizi, na Baamaleki. (Kūfuma shikū ja kale a banhū benabo baalī bikaji ba mu sī jenījo, kwandīja Shūūli kūshisha mhandī ja Misili.)

⁹ Būlī kwene ūko wajaga kūbadumīla ū Daūdi walī atalekaga munhū ose ose mpanga, abize ngosha nūūlū nkīma. Alīyo ī ng'holo wasolaga, nī ng'ombe, nī nzobe, nī ngamīla, pyī nī shizwalo; washisolaga washenha ū kūlī Akishi.

¹⁰ Ū Akishi ūlū wamūūja, “Lelo ng'walwaaga na bana halī?” Ū Daūdi wang'wīlaga, “Twalī Negevu ya Yuda,” nūūlū “Negevu ya Yelahimeeli,” nūūlū “Negevu ya Bakeni.”

¹¹ Walī atalekeelaga munhū ose ose ngosha nūūlū nkīma, gīkī ang'wenhe kūlī Akishi; nguno ū Daūdi wiganikaga, “Bakūtūbūūla bahaye gīkī, ‘Īyo wītaga ū Daūdi yīyī na yīyī.’” Na lūūlū ī yenīyo hū'ī mbika ya kikalīle kaakwe pyī ī likanza īlo walī ū mu sī ya Bafilisiti.

¹² Ū Akishi akansanya no ū Daūdi, ūyiganika, “Ū ng'wenūyū akūbiza ntūmami wane wilalī nguno wanung'hile inyema ū kū banhū bakwe a Baisilaeli.”