1 Sang'weli 22 - Bibilia Ilagano Lya Kale 2015

Daūdi kūpeelela kū mapandī gangī

¹ Ū Daūdi wīnga ī Gaasi, ūpeelela kwipilinga lya Adulamu, a bakūlūye na banhū bangī a ba mu kaya ya ng'wa ise aho bigwa, būja ko nabo kwisangīja nang'hwe.

² Pye abo baalī na makoye, na a babo baalī na būgasa, na a bose abo baalī batizunīlījaga nū būsugi wa mu sī yabo, būyūnkūūbīja; ūbiza ntongeeji wabo. A ba kūja bakūnondeelaga hose hose būshika bagosha magana anè.

³ Ū Daūdi wīnga ho hado ūja Misipa ya Moabu, ūūkanomba ū ntemi wa Moabu alīhaya, “Nalīkwikūmbīlīja ūng'wanukūle ū baba nū mayū, bize bikale hamò nag'ho kūshisha nadeebe ūmo alīnītīla ū Mulungu.”

⁴ Na ng'hana ūbaleka ū kū ng'wa ntemi wa Moabu, bikala nang'hwe ī likanza ī lyose īlo Daūdi walī ū ng'wipandī lya kwibisīla lyenīlo.

⁵ Alīyo walīho ng'hangi Gaadi, ūng'wīla ū Daūdi, “Ūtizikala ū ng'wipandī lya kwibisīla lyenīlī. Jaga mu sī ya Yuda.” Na lūūlū ū Daūdi wīnga ko ū kwenūko, ūja kwipoolu lya Helesi.

⁶ Ū Saulo wigwa gīkī ū Daūdi na a banhū bakwe babonilwe. Na lūūlū lūshikū lūmò ū Saulo walī n'ichimu lyakwe mu nkono igaashije mu mbeho ya ntī gwa nshishi, kū sī ya ngūlya gwa Gibea, walī hamò nabo pye a batūmami bakwe, baalī bīmīīla bampīndije.

⁷ Kwitulwa ū Saulo wandya kūbawīla alīhaya; “Bing'we Babenjamini, alidegelekagi, ī gete hamo shi ū ng'witūnja o ng'wa Yese ng'wenūyū akūng'winha būlī ūmò wing'we ilaale na ngūnda gwa mizabibu? Nūūlū hamo akūng'wīta a bose ūmo mugelelile mubize bataale ba mabità ga bashilikale shihūmbī, na ga bashilikale igana igana?

⁸ Hamo ī yenīyo h'īnguno īyo yang'wenhelegije kūnilīīla gwīnda ya kūyūnibisa ī mihayo? Nguno ndūhū nūūlū ūmò wing'we ūyo akūnimanīkījaga, nūūlū aho mukūbonaga gīkī nū ng'witūnja wane akūbeejaga ilagane nū ng'witūnja o ng'wa Yese! Atīho gete nūūlū ūmo wing'we ūyo anidīlīīlile ū nene, nūūlū ū wa kūnimanya gīkī ū ng'witūnja wane wamiipije masala ū ntūmami wane, nose akwikalaga ūnikūngīla, gīt'ūmo alītīla nī haha.”

⁹ Hūna ū Doegi, ūyo nang'hwe walī wīmīīla hamò na a batūmami ba ng'wa Saulo; ūhaya, “Ū nene naalī namonile ū ng'witūnja o ng'wa Yese, akiza ī Nobu kūlī Ahimeleki ū ng'wana Ahitubu.

¹⁰ Ū Ahimeleki ūmūūja na SEEBA kūlwa nguno yakwe; ūng'winha na shiigunaanīlo, pyī nī līlūshū lya ng'wa Goliati ū Mfilisiti.”

Saulo kūbabūlaga bagabīji ba ng'wa SEEBA

¹¹ Hūna ū ntemi ūlagīja witanwa ū ngabīji Ahimeleki ū ng'witūnja o ng'wa Ahitubu, nī kaya ya ng'wa ise ī yose, abo baalī bagabīji ba Nobu; pye a bose biza ū kū ng'wa ntemi.

¹² Ū Saulo ūhaya, “Bebe ng'wana Ahitubu, degelekaga.” Nang'hwe ūhaya, “Hayaga baba ntemi.”

¹³ Ū Saulo ūmūūja, “Nibūlī ū bebe nū ng'witūnja o ng'wa Yese ng'wanilīīlile gwīnda ya kūnītīla mihayo yabūbi mu mbisīla? Nguno ūkang'winha migatī na lūshū, ūmūūgīja na kūlī Mulungu; nose ūūyo wanigomelile gete, hama akwikalaga ūnikūngīla gīt'ūmo alītīla nī haha!”

¹⁴ Ū Ahimeleki ūnshokeja ū ntemi ūhaya, “Baba ntemi, ū mu batūmami bako bose, nani ū nsanyiwa gītī Daūdi ū nkwīlīma wa ntemi; ūyo nīyo alī ntaale wa bashilikale abo bakakūlang'hanaga ū bebe, ūyo nīyo akūjiwe hataale ū mu kaya yako?

¹⁵ Angū, ū lwenūlo lwalī lūkangala lwa kwandya ū nene ū kūmūūgīja ū kūlī Mulungu? Ītī gīko na hado yaya! Ū ntemi ni atizagūnsola būbi ū ntūmami wako, nūūlū ī kaya ya ng'wa baba, nguno ū nene ntūmami wako natīmanile gete na hado yaya ī mihayo yose yenīyī!”

¹⁶ Ū ntemi ūnshokeja alīhaya, “Ahimeleki ūlīcha gete, nīyo pyī nī kaya ya ng'wa so ī yose!”

¹⁷ Hūna ū ntemi ūbalagīja a bashilikale bakwe abo baalī hamò nang'hwe; ūbawīla, “Basangagi a bagabīji ba ng'wa SEEBA mukababūlage, nguno nabo balī kū lwandī lo ng'wa Daūdi. Baalī badeebile ī gīkī alīnipeela, alīyo būleka ū kūniwīla.” Gwike a bashilikale ba ntemi bogoha ū kūbagoloolela makono a bagabīji ba ng'wa SEEBA gīkī bababūlage.

¹⁸ Hūna ū ntemi ūnagīja ū Doegi ūng'wīla, “Basangage ho ū bebe a bagabīji benabo ūkababūlage.” Ng'hana ū Doegi ū muna Edomi ūbasanga ho ūūkababūlaga; ū lūshikū lwenūlo ūbūlaga banhū makūmi anaane na batanò abo baazwalaga ifoodi ja kitaani.

¹⁹ Nū nzengo gwa bagabīji ū gwa Nobu ūgūkenaagūla wa līlūshū; ūbamala pye a banhū ba ng'wenūmo, bagosha na bakīma, pye na a baana na a beleele; būyaga nī ng'ombe jamo nī nzobe nī ng'holo.

²⁰ Alīyo ūpūlūgūka ūmò, Abiasali ng'witūnja o ng'wa Ahimeleki ū ng'wana Ahitubu, ūpeela ūja kūlī Daūdi.

²¹ Aho washika ūng'wīla ū Daūdi gīkī, ū Saulo wababūlagaga pye a bagabīji ba ng'wa SEEBA.

²² Ū Daūdi ūng'wīla ū Abiasali, “Ū lūshikū lwenūlo aho namona ū Doegi ū muna Edomu, nakadeeba gīkī akūng'wīla ū Saulo. A banhū ba kaya ya ng'wa so naabenhelejaga nene pye a bose ū kūcha.

²³ Na lūūlū ikalaga hamò naane, wīnje ū boobà; nguno ū munhū ūyo alībūkooba ū būpanga wako h'ūyo akūbūkoobaga nū wane. Alīyo ū bebe ūlū wikala hamò nane ūkūbiza ūlī mhola.”