1 Sang'weli 18 - Bibilia Ilagano Lya Kale 2015

Yonasani na Daūdi kwidima būnwaani

¹ Ū Daūdi aho wamala ū kūyomba nū Saulo, ū Yonasani nū Daūdi bidima būnwaani būtī wa kūlekana pyī ī shikū ja būlamu wabo; ū Yonasani ūntogwa ū Daūdi gīt'ūmo walī witogelilwe we ng'wenekīlī.

² Kūfuma lūshikū lwenūlo ū Saulo ūnsola ū Daūdi ūbiza wa ha ng'wakwe, atanzunīlīgije ū kūshoka kaya ū kūlī ise.

³ Ū Yonasani nū Daūdi būbeeja ilagane biyilahīlīla, nguno ū Yonasani akantogwa no ū Daūdi gīt'ūmo walī witogelilwe wei ng'wenekīlī.

⁴ Ū Yonasani wīzuula ī ng'hanjo īyo walī azwalile ūng'winha Daūdi, nī lishaati, pyī nū lūshū nū nshipi gwakwe.

⁵ Ū Saulo ūyūntūma ū Daūdi, wakīīta yawiza būlī kwene, nose ūntūūla kūbiza higūlya ya mabità ga bashilikale; ū mhayo gwenūyo gūūbayeja pye a banhū na a batūmami ba ng'wa Saulo.

Saulo kūnkolwa Daūdi

⁶ Alīyo aho balīshoka kaya, numho ū Daūdi wamalile kūlībūlaga ī Līfilisiti, a bakīma bikobya kūfuma mizengo yose ū mu sī ya Isilaeli, kwiza kūnsūūng'wanha ū ntemi Saulo, kūnū bakwīmbaga na kūbina na būyegi, bakūtūlaga na shitumba na kūfuula mbiilūlū.

⁷ Ūlū bakūbinaga baahelelekeejaga bakwīmbaga būhaya: “Ū Saulo wabūlagile maashihūmbī gakwe, ū Daūdi ū makūmi ga maashihūmbī gakwe!”

⁸ Ū Saulo ūpelana no, ū būhelelekeja wenūbo būminya; wandya kwiganika, “Ū Daūdi bang'wisaabīla makūmi ga maashihūmbī, alīyo ū nene baagelela maashihūmbī dūhū! Numho apandīke na kī hangī lūūlū ūlū ītī būtemi dūhū?”

⁹ Na lūūlū kūfuma ikanza lyenīlo ū Saulo wandya kūnola ū Daūdi na liso lya wilu.

¹⁰ Ha lūshikū lwa ntondo yaho ū Saulo walī mu kaya, kwimanīla moyo gwabūbi kūfuma kūlī Mulungu gūng'wizīīla na nguzu ningī no. Wandya kūyombagīla mihayo gītī akūhangaga, ū Daūdi nang'hwe wandya kwītūla ī ndono yakwe gīt'ūmo wītīlaga na kale. Ū Saulo walī na'ichimu ū mu nkono gwakwe,

¹¹ ūlīponya ū kūlī Daūdi akwiwīlaga, “Namambe lya kūjūpulukanīja na kū ndugu.” Alīyo ū Daūdi ūshisha ng'hangala ibīlī akūng'wiligaga.

¹² Ū Saulo ūng'ogoha ū Daūdi, nguno ūbona hape gīkī ū SEEBA walī hamò nū Daūdi, alīyo ū wei ū SEEBA walī wamala kūneka.

¹³ Na lūūlū ūng'wīnja ū Daūdi a henaho, ūntūūla būtaale higūlya ya bashilikale shihūmbī, ū Daūdi ūyūbatongeela a banhū benabo ū mu makanza ga būlūgū.

¹⁴ Pyī īyo wīyītaga yajaga chiza, nguno ū SEEBA walī hamò nang'hwe.

¹⁵ Ū Saulo ongeja ū kūng'ogoha ū Daūdi aho wabona ūmo gwabeelaga būlī gwene ūyo wagwītaga.

¹⁶ Alīyo pye a Baisilaeli na a banhū ba Yuda bongeja ū kūntogwa, nguno wabatongeelaga chiza ū mu makanza ga būlūgū.

¹⁷ Ū Saulo ūng'wīla ū Daūdi, “Ūūyū aha nshīke wane ū ntaale ū Melabu, nakūkwinha abize nke wako; ū bebe idadīlage dūhū ūbūlwe ū būlūgū bo ng'wa SEEBA kūlwa nguno yane.” Ū Saulo wiwīlaga, “Natizūnkuumya na nkono gwane ū nene, nabalekele Bafilisiti bakūmūlaga.”

¹⁸ Alīyo ū Daūdi ūng'wīla ū Saulo, “Ū nene nalī nani, nūūlū a bang'wise, a ba lūdūgū lo ng'wa baba ba nani, nose nigeleelwe kūbiza nkwīlīma wa ntemi?”

¹⁹ Gwike aho lyashika ī likanza lya ng'wa Daūdi kwinhwa ū Melabu gīkī abize nke, ū nshīke ng'wenūyo ūtoojiwa kūlī Adilieli muna Mehola.

Daūdi kūntoola ng'wana Saulo

²⁰ Gwike ū nshīke o ng'wa Saulo ū Mikali walī antogilwe ū Daūdi, a banhū aho bang'wīla ū mhayo gwenūyo ū Saulo ūtogwa no.

²¹ Wiganika, “Nakūntooja ū ng'wenūyo h'akūbiza lūtu lwa kūngwasha, gūngwīle ū nkono gwa Bafilisiti.” Na lūūlū ū Saulo ūng'wīla ū Daūdi, “Lelo lūūlū ū lūkangala lwa kabīlī lwenūlū ūkūbiza nkwīlīma wane.”

²² Hūna ū Saulo ūbalagīla a batūmami bakwe alībawīla, “Ng'witanagi ha mhūjo ū Daūdi mulūngalūnge nang'hwe mung'wīle gīkī, ‘Bebe ū ntemi akūtogilwe, nīyo na a batūmami bakwe pye bakūtogilwe, byalagwa hoi.’”

²³ Būng'wīla ū Daūdi ī mihayo yenīyo. Daūdi nang'hwe ūbashokeja alīhaya, “A bing'we angū mmho muliganika gīkī ū kūbiza nkwīlīma wa ntemi gūlī mhayo ndo? Ū nene nalī ng'habi wape, nūūlū kūmanīīka hado dūhū nī chene natamanīīkile!”

²⁴ A batūmami bakwe ū Saulo būng'wīla, “Ū Daūdi washosha mihayo yīīyī na yīīyī.”

²⁵ Ū Saulo ūhaya, “Ng'wīlagi ū Daūdi gīkī, ‘Ū ntemi atūhayaga kūkwiwa sabo jose jose, alīyo alītogwa kwenhelwa makoba igana līmò ga Bafilisiti, amalīlwe shiilī kū banishi bakwe.’” A maganiko ga ng'wa Saulo gaalī ha gīkī ū Daūdi ache mu nzīla ya nkono gwa Bafilisiti.

²⁶ A batūmami ba ng'wa Saulo aho bang'wīla ū Daūdi ī mihayo yenīyī, gūnyeja ū gwa kūbiza nkwīlīma wa ntemi. Na lūūlū aho lītaalī kūshila ī likanza īlo līkatūūlwa,

²⁷ ū Daūdi ūbūūka na a banhū bakwe, ūūkabūlaga Bafilisiti magana abīlī, ūgatīna a makoba gabo, ūgenha gīkī abize nkwīlīma wa ntemi; wiza ūng'winha ū ntemi a gose gīt'ūmo walī wahayīla. Na ng'hana ū Saulo ūntooja ū Daūdi ū nshīkwe wakwe ū Mikali.

²⁸ Gwike ū Saulo aho wabona, hama witegeleja hape gīkī ū SEEBA walī hamò nū Daūdi, nī gīkī ū nshīke wakwe ū Mikali walī antogilwe ū Daūdi,

²⁹ akongeja ū kūng'ogoha ū Daūdi, ūng'wisaaba kūbiza ng'wanishi wakwe shikū jose ja būlamu wakwe.

³⁰ A bataale ba mabità ga Bafilisiti nabo bongeja kūmaniza kūbikoloosha gīkī balwe būlūgū. Alīyo būl'ikanza ūlū biza, ū Daūdi wapandīkaga būtindi būtaale kūtinda a batūmami ba ng'wa Saulo a bangī; na lūūlū ī lina lyakwe lyongeja kūkumūka.