1 Sang'weli 16 - Bibilia Ilagano Lya Kale 2015Sang'weli kūtūng'wa Betelehemu 1 Hūna ū SEEBA ūng'wīla ū Sang'weli, “Ūkwikala ūkūnīlīīlaga ū Saulo kūshisha nanalī, alīyo ū nene naanemile ū kūbiza ntemi wa Baisilaeli? Yookajage maguta ī mhembe yako ūje Betelehemu, nalīkūtūma ng'wa Yese, nguno ūmò wa bintūnja bakwe nansolile abize ntemi.” 2 Alīyo ū Sang'weli ūhaya, “Nakūja mu mbika kī? Nguno ū Saulo akūnibūlaga ūlū aligwe!” Ū SEEBA ūng'wīla, “Solaga ndogoosa ya ng'ombe ūje nayo ūkabawīle gīkī, ‘Nizaga kūmfunīja SEEBA shitambò.’ 3 Nū Yese ūkūng'witana wize ū kū shitambò, hūna ī ya kwīta nakūkūlangīīla nene. Ūyo nalaakoolekeje hū ng'wene ūkūng'witīīla a maguta kūlwa nguno yane.” 4 Ū Sang'weli wīta gīt'ūmo SEEBA akang'wīlīla, aho washika ī Betelehemu a banamhala ba mu nzengo būnsūng'wanha kūnū bakūdetemaga; būmūūja, “Wizaga mu mhola baba?” 5 Sang'weli nang'hwe ūshosha, “Alichene nizaga mu mhola dūhū; nizaga kūmfunīja SEEBA shitambò, iyeejagi ng'wize hamò nane ū kū shitambò.” Daūdi kūsolwa abize ntemi 6 Bahayūshika, ū Sang'weli aho wamona Eliabu wiganika, “Ū ng'witīīlwa maguta o ng'wa SEEBA atūduuma kūbiza ūyū wīmīīlaga kū būtongi bo ng'wa SEEBA ng'wenūyū.” 7 Alīyo ū SEEBA ūng'wīla, “Ūtaadutagwe ihanga lya suso yakwe nūūlū būlīhu wakwe; nguno naanemaga. Ū SEEBA atalolaga gīt'ūmo munhū akalolelaga. Nguno ū munhū akalolaga ihanga lya higūlya, alīyo ū SEEBA akalolaga mu gatī mu ng'holò.” 8 Hūna ū Yese ūng'witana Abinadabu, ūng'wīla abīte ū kū būtongi bo ng'wa Sang'weli. Alīyo ū Sang'weli ūhaya, “Ū SEEBA atansolile nūūlū ū ng'wenūyū.” 9 Ū Yese ūng'wenha Shama, nang'hwe wiza ūbīta; alīyo nū ng'wene ū Sang'weli ūhaya, “Ū SEEBA atansolile nū ng'wenūyū.” 10 Ū Yese ūbabītya bitūnja bakwe mpungatī ū kū būtongi bo ng'wa Sang'weli, alīyo ū Sang'weli ūng'wīla, “Ū SEEBA atabasolile a benaba.” 11 Hūna ūmūūja ū Yese, “A benaba h'a bitūnja bako bose pye abo ūlī nabo?” Ū Yese ūshosha, “Alīho na nzuna wabo ndo, kwangūlīja; gwike ī haha alīdīīma ng'holo.” Nang'hwe ū Sang'weli ūhaya, “Tūmaga koi munhū akitanwe, nguno tūtigasha aho ataalī ū kūshika.” 12 Ūtūma ng'hana ūūkenhwa wiza wingīla ū mu kaya; walī nyanda ngīlīng'hanu w'ikoba lyaaza, nī suso yakwe nsoga. Hūna ū SEEBA ūhaya, “Būūkaga ūng'witīīle maguta, nguno hū ng'wene.” 13 Na ng'hana ū Sang'weli ūbūūka wīsola ī mhembe yakwe ya maguta, ūng'witīīla kū būtongi wa bakūlūye. Kūfuma ikanza lyenīlo, ū Moyo o ng'wa SEEBA ūng'wizīīla ū Daūdi na ngunzu ningī. Na lūūlū ū Sang'weli ūja kaya. Daūdi ng'wikūlū lya ng'wa Saulo 14 Ū Moyo o ng'wa SEEBA akasangwa wanekile ū Saulo, ūyūluhiwa na moyo gwabūbi kūfuma kūlī SEEBA. 15 Hūna a batūmami bakwe ū Saulo būng'wīla, “Baba ntemi, ūkūluhiagwa moyo gwabūbi gwa kūfuma kūlī SEEBA. 16 Ni walagīja gīkī a bise basese bako abo tūlīho aha, tūkoobe munhū koolī wa kūtūla ndono. Ū moyo gwabūbi ūlū gwakwizīīla kūfuma ū kūlī SEEBA wakūtūlīla, kūshisha gwīnga wifuula.” 17 Ū Saulo ūbawīla a batūmami bakwe, “Būgatū nkoobagi lūūlū ū munhū wa kūdūla kūtūla chiza munenhele.” 18 Hūna ūmò wa batūmami bakwe ūhaya, “Ū nene namona alīho ng'witūnja o ng'wa Yese muna Betelehemu; ū nsūmba ng'wenūyo amanile no ū kūtūla ī ndono. Hangī nīyo ngosha shisha ng'holò, nū kū būlūgū tūūlaga ooshikaga; munhū wa suso yawiza na ndeeba mu kalūngalūngīle; hama ū SEEBA alī hamò nang'hwe gete.” 19 Na lūūlū ū Saulo ūtūma munhū kūja ī ng'wa Yese; ūng'wīla alīhaya, “Nitūmīlage ū ng'witūnja wako ū Daūdi ū ndīīmi wa ng'holo.” 20 Yese nang'hwe ūsola nzobe wībbakīlīja migatī na shisaabo sha divai, na kabūli kasongi; ūntūma ū ng'witūnja wakwe ū Daūdi ūja nasho ī ng'wa Saulo. 21 Ū Daūdi aho washika ī ng'wa Saulo, nang'hwe ūbiza ūmò wa batūmami bakwe; nīyo ū Saulo ūntogwa no ū Daūdi, ūng'wīta kūbiza ūmò wa babūūcha ba shilanga shakwe. 22 Hūna ū Saulo ūtūma nhūng'wa ū kūlī Yese alīhaya, “Nzunīlījage ū Daūdi abize ūmò wa batūmami bane, nguno waniyegije no.” 23 Būl'ikanza ūlū gwang'wizīīla ū Saulo ū moyo gwabūbi kūfuma kūlī SEEBA, ū Daūdi wīsolaga ī ndono yaakwe wītūla, gwang'wīnga ū Saulo ū moyo gwabūbi, wifuula. |
Sukuma Bible © Bible Society of Tanzania, 2019.
Bible Society of Tanzania