1 Sang'weli 10 - Bibilia Ilagano Lya Kale 2015

Saulo kwitīīlwa maguta na Sang'weli

¹ Hūna ū Sang'weli ūsola jūpa ya maguta ūng'witīīla ha ntwe ū Saulo, hanuma ūmbipa; ūng'wīla, “Ū SEEBA atakwitīīlile maguta ūbize ntongeeji wa banhū ba wingīji wakwe?”

² Ūlū ūlīnge a halī nene henaha, ī lelo īyī ūlū ūlashike Zeliza bbihī na shigila sha ng'wa Laheli ū kū lūbīmbī lwa sī ya banhū ba ng'wa Benjamini, ūkūmanhya na banhū babīlī. Bakūkūwīla, “Ī nzobe ījo walī wajile kūjikooba jilongile, nīyo ī haha ū so ooyile ū kūjiiganika ī nzobe, wandije kūkoya ū mu maganiko kūlwa nguno ying'we; akwibūjaga wei ng'wenekīlī gīkī, ‘Ī gete nabeeje masala kī nampandīke ū ng'witūnja wane?’”

³ Hama ūlū wīnga a henaho ūkūshimīza ūūkashika kū ntī ntaale gwa Tabooli. A henaho ūkūmanhya na bagosha badatū balīlinha kūja Beeseli kū numba ya ng'wa Mulungu. Ūmò wabo akūbiza abūūkije baana ba mbūli badatū, ūngī migatī idatū, ū ūngī shisaabo sha divai.

⁴ A banhū benabo bakūkūgīsha, hama būkwinha migatī idatū; nang'ho ūkwīyanukūla kūfuma ū mu makono gabo.

⁵ Hanuma ya henaho ūkūja kū lūgūlū lo Mulungu; īlīko koi ng'hambī ya bashilikale ba Bafilisiti. Ūlū ūgwegeela ū nzengo, ūkūmanhya na'iganda lya bahangi bakūshimīzaga hamò kūfuma kwipandī lya higūlya, kūnū bakūhangaga; ū kū būtongi wabo bakūbiza ko batūji ba malimba, shitumba, mbiilūlū, na ndono.

⁶ Hūna ū Moyo o ng'wa SEEBA akūkwikīīla na nguzu wandye kūhanga hamò nabo, nīyo ūkūgalūchiwa ū bize munhū ūngī nang'hwe.

⁷ Ūlū wībona ī yenīyī yashikīīla, ītaga būlī mhayo ūyo nkono gwako gūlaabone, nguno ū Mulungu akūbiza alī hamò nang'ho.

⁸ Na lūūlū ūkūtonga kūja Giligaali; nū nene nakwiza natūūleka; nize kūfunya shitambò sha kūpemvwa na shakwinha sha būsangī; gwike shikwigeleelilwe ūnilindīīle ikanza lya shikū mpungatī, kūshisha nize hū nakūkūwīla ī yakwīta.

Saulo kūbiza hamò na bahangi

⁹ Ū Saulo aho wagalūka gīkī alekane nū Sang'weli, ū Mulungu ūngalūcha ī ng'holò yakwe; pyī ī shimanīkījo shenīsho shūshikīīla ū lūshikū lwenūlo.

¹⁰ Aho baashika ū kū lūgūlū lo Mulungu, ūmanhya na'iganda lya bahangi bakūshimīzaga hamò; hūna ū Moyo o ng'wa Mulungu ūng'wikīīla na nguzu, nang'hwe ūdimana nabo ūja akūhangaga.

¹¹ Abo baalī bandeebile na kale aho bamona alī ng'wigelè lya bahangi akūhangaga hamò nabo, būyibūūja; “Bing'we ū ng'witūnja o ng'wa Kishi wilongelagwa mhayo kī? Ū Saulo nang'hwe wabizile ūmò wa bahangi?”

¹² Munhū nebe wikalaga ī mhandī jenījo ūshosha akūbūūjaga, “Al'ū saabo ni nani?” Na lūūlū kwandīja henaho banhū būyipūgūla bakūhayaga, “Ū Saulo nang'hwe wabizile ūmò wa bahangi?”

¹³ Ū Saulo aho ooya ū kūhanga ūlinha ajile ū kwipandī ī lya higūlya.

¹⁴ Ū ise ndo o ng'wa Saulo ūmūūja ū Saulo nū ntūmami wakwe, “Bing'we ng'walī ng'wajile halī?” Ū Saulo ūshosha ūhaya, “Kūkooba nzobe, alīyo aho twajigayiwa tūja kūlī Sang'weli.”

¹⁵ Ū ise ndo o ng'wa Saulo ūmūūja na būkalalwa alīhaya, “Ali niwīlage īyo wamuwīlile ū Sang'weli!”

¹⁶ Ū Saulo ūhaya, “Akatūwīla ī ya nzobe, gīkī ītizūtūkoya nguno jilongile.” Alīyo ūleka ū kūng'wīla ū ise ūmo Sang'weli akang'wīlīla mihayo ya būtemi.

Saulo kwanīlwa kūbiza ntemi

¹⁷ Ū Sang'weli ūbitana a Baisilaeli a bose kwiza Misipa kū libilinga lya ng'wa SEEBA.

¹⁸ Ūbawīla, “Ū SEEBA Mulungu wa Baisilaeli alīhaya gīkī, ‘A bing'we Baisilaeli nakang'wīnja Misili, nūng'wīnja kūfuma mu būsugi wa Bamisili, na kūfuma mu būlī mahanga ayo gang'wiboneelaga.’

¹⁹ Alīyo ī haha ng'wanemile ū Mulungu wing'we, ūyo akūmupījaga kūfuma mu mayanga na būpīna wing'we bose. Ng'wamalile kūhaya gīkī, ‘Biya twinhage ntemi wa kūtūsuga.’ Alilūūlū, ī haha egeelagi kūlī SEEBA, būlī bene mu ng'anda na ndūgū jabo.”

²⁰ Ū Sang'weli aho wajeegeleja ī ng'anda ja Baisilaeli ū kū būtongi bo ng'wa SEEBA, lūūsolwa lūganda lwa ng'wa Benjamini.

²¹ Hūna ū lūganda lwa ng'wa Benjamini ūlwegeleja kūlenganīla na ndūgū jabo, lūūsolwa lūdūgū lwa ng'wa Matili; ū kū ng'halīlo yaho ūsolwa Saulo ng'witūnja o ng'wa Kishi. Alīyo aho bankooba hoi būngayiwa.

²² Na lūūlū būmūūja hangī ū SEEBA balīhaya, “Ū munhū ng'wenūyo wizaga a henaha?” Ū SEEBA ūhaya, “Alīho wibisaga mu miligo.”

²³ Būpeela ko būūkang'wenha; aho wiza kwīmīīla a ha gatī ya banhū ūbakīlīīla pye a bose.

²⁴ Ū Sang'weli ūbawīla a banhū, “Mulīmona ū munhū ūyo wasolilwe na SEEBA? Ū mu banhū bose atīho ūngī wa kūbiza gītī wei.” Hūna a banhū būhamuka n'ilaka lya higūlya balīhaya, “Kūlaga ūhangame ntemi.”

²⁵ Ī likanza lyenīlo ū Sang'weli ūbawīla a banhū ī mihayo ya būtemi īyo yigelile bīmane, hanuma wīyandīka mu shitabo, ūshitūūla kū būtongi bo ng'wa SEEBA. Hūna ū Sang'weli ūbalaga a banhū būja kaya, būlī ng'wene kū ng'wakwe.

²⁶ Nū Saulo ūja Gibea kū ng'wakwe; bagosha ba nguzu bamò na bamò abo Mulungu akabakuumya ng'holò jabo būnondeela.

²⁷ Alīyo baalīho hoi na banhū badalahi; na lūūlū a benabo būhaya mu būdalahi, “Ū ng'wing'wana ng'wenūyū adūgije kūtūpīja gete!” Būndooheleja kībi kībi no nīyo; būūkaleka nūūlū kūng'wenhela manong'ho, alīyo ū Saulo atakwīgije mihayo.