1 Batesalonike 5 - Bibilia Ilagano Lya Kale 2015

¹ Alīyo ī mihayo ya shikū na makanza, ī yene badūgū natī na nguno ya kūng'wandīkīla.

² Nguno a bing'we benekīlī mumanile, gīkī ū lūshikū lo ng'wa Seeba lūkūshika gīt'ūmo ng'wibi akizaga būjikū.

³ Ū ng'wikanza īlo bakūsangwa bakūhayaga gīkī mhola na kaholele, bakūhayimanīla bisanganījiwa na būkenaagūji, gīt'ūmo būsūngū bo kūbyala būkansangaga nkīma ūyo alī nda; batūpūlūgūka na hado yaya!

⁴ Gwike a bing'we badūgū, mutī banhū ba mu giiti, nose ū lūshikū lwenūlo lūng'wisanganīje.

⁵ Nguno pye abo mulī baana ba ng'wisana mulī ba ng'wikanza lya līīmi. A bise tūtī ba ng'wikanza lya būjikū nūūlū tūtī ba mu giiti.

⁶ Hūna lūūlū, tūlekagi ū kūlaala gīt'ūmo balī a bangī, alīyo twilang'hanagi tūbize na masala madeekanu.

⁷ Nguno a balaaji bakalaalaga būjikū, pye na a baleevi nabo bakaleebagwa būjikū.

⁸ Alīyo a bise tūlī ba ng'wikanza lya līīmi, hū kūhaya tūbizagi na masala madeekanu, tūzwale kūzunya na būtogwa, shibize shizwalo shise sha chūma sha kūlang'hana shikuba; hama n'ihima lya kwisagīlwa kwa būpīji.

⁹ Nguno ū Mulungu atatūsolile kūlwa kūgwa mu būpelanu bokwe, alīyo kūlwa kwanukūla būpīji mulī Seeba wise Yesu Kilisito,

¹⁰ ūyo akacha kūlwa nguno yise; gīkī tūbize bapanga hamò nang'hwe, ū ng'wikanza īlo tūlī bapanga nūūlū tūlaalile.

¹¹ Hūna lūūlū ng'wilūngūja na kwizenga, būlī ng'wene na a biye gīt'ūmo mukwītīlaga na kale.

Būkomeleja na būgīsha bo kūmalīja

¹² Ali lūūlū badūgū, tūtogilwe mubitegeleje a batongeeji abo bakwītaga milīmo mitaale kūlwa nguno ying'we, na kūmuhūgūla mulī Seeba.

¹³ Ng'ūbinha ikūjo itaale mu būtogwa kūlwa nguno ya nīmo ūyo bakūgwītaga, hama na a bing'we ng'wikale mu mhola būlī ng'wene ū kū biye.

¹⁴ Na hangī badūgū tūlīmukomeleja muyūbahūgūla abo batadīlīlaga; na a babo bakūgwagang'holò ng'ūbagunanha, na a bagokolo ng'ūbaguzuhya. Hangī bizagi biyūmīlīja kū banhū bose.

¹⁵ Lang'hanagi atizilonga wa kūyūshosha yabūbi kūlwa kwītīlwa yabūbi, mubize na nhūngwa ja kwiyītīla yawiza gwa a bing'we benekīlī na benekīlī; pye na a bangī.

¹⁶ Yegagi gwa gwa gwa.

¹⁷ Lombagi būlī lūshikū, yaya ū koya.

¹⁸ Lūmbagi mu būlī mhayo, nguno h'ūmo būlī ū būtogwa bo ng'wa Mulungu ū kū bing'we, ū mulī Kilisito Yesu.

¹⁹ Yaya ū kūnjimya ū Moyo;

²⁰ hama yaya nū kūbūdalahīja ū būhangi.

²¹ Ng'wīlola chiza pyī ī mihayo mu būdeeba, ī yawiza ng'wīdima;

²² alīyo lekanagi nayo gete pyī ī yabūbi.

²³ Hūna lūūlū leki ū Mulungu wa mhola ang'weje wei ng'wenekīlī, na amulang'hane ū mu myoyo nū mu ng'holò, pyī nī mibīlī ying'we. Mubize banhū bashikanu, batī na shilingo ū mu lūshikū lwa kūshoka kwa ng'wa Seeba wise Yesu Kilisito.

²⁴ Ūyo wang'witana ng'wene nsanyiwa, akūshikīlīja dūhū.

²⁵ Badūgū, ng'ūtūlombela na a bise.

²⁶ Bagīshagi mu kwibbipa kwela pye a badūgū.

²⁷ Nalīmukomeleja mulī Seeba gīkī, ī nyalūba yenīyī basomelwe pye a badūgū.

²⁸ Shigongo sha ng'wa Seeba wise Yesu Kilisito shibize hamò ning'we. Alichene.