1 Batesalonike 1 - Bibilia Ilagano Lya Kale 2015

Kūgīsha

¹ Nene Paulo, hamò na Silwano na Timotheo; kū kanisa ya Batesalonike īyo īlī mulī Mulungu Sīswe na Seeba Yesu Kilisito. Shigongo na mhola shibize hamò ning'we.

Kūkumīlījiwa kwa kūzunya kwa Batesalonike

² Tūkūnūmbaga Mulungu gwa kūlwa nguno ying'we, nīyo tūkūmuhayaga būlī lūshikū ūlū tūlīlomba.

³ Nī shītwa shing'we ī sha mu kūzunya gwa tūkūshizūkagwa ū kū būtongi bo ng'wa Mulungu Sīswe; pyī nī milīmo ī midito īyo mukūlwaga nayo kūlwa būtogwa, nū wiyūmīlīja ūbo mulī nabo kūlwa kūng'wisagīlwa Seeba wise Yesu Kilisito.

⁴ Badūgū, tūmanile gīkī ū kūlī Mulungu mulī baganja na basolwa bakwe.

⁵ Nguno ī Ng'hūlū Jawiza jise ū kū bing'we yalī ītī mihayo dūhū, alīyo jikamupandīka mu būdūla na mulī Moyo Ng'wela, hamò na shimanīkījo shingī; gīt'ūmo mukatūmanīla aho twikalaga hamò ning'we kūlwa nguno ying'we.

⁶ Ning'we mukabiza balondeeji bise na ba ng'wa Seeba, nguno mukagwanukūla ū mhayo mu makoye mingī; alīyo hangī na būyegi mulī Moyo Ng'wela.

⁷ Kūshisha nose ng'ūbiza būlolelo ū kū bazunya ba Makedonia, na a ba Akaya.

⁸ Nguno ū kūfuma ū kū bing'we, ū mhayo go ng'wa Seeba gūtakumūkile mu Makedonia na Akaya dūhū, alīyo ū kūzunya kwing'we ūmo munzunīgije ū Mulungu kwasambaalile hose hose; nose a bise tūtī na nguno ya kūhaya nūūlū mhayo.

⁹ Nguno boi benekīlī bakūjaga būlomeela ūmo mukatwanukūlīla aho twashika ū kū bing'we. Bakūkumūchaga ūmo mukangalūkīla ū Mulungu, ng'ūlekana nayo ī mihayo ya kwitongeleja kū mashiikolile, ng'ūbiza batūmami ba ng'wa Mulungu mpanga na wa ng'hana.

¹⁰ Ī haha mukūnindīīlaga Ng'wana wakwe ūyo akwiza kūfuma ng'wigūlū, ūyo akanjūūcha kūfuma mu bafu, ū Yesu, ūyo alī mpīja wise kūfuma mu būpelanu ūbo būliza.