1 Batemi 6 - Bibilia Ilagano Lya Kale 2015

Solomono kūzenga hekalu

¹ Mu ng'waka gwa magana anè na makūmi anaane kūfuma aho Baisilaeli bakingīla Misiili, mu ng'weji gwa kabīlī, ū gwa Zivu, ū ntemi Solomoni wandya kwīzenga ī hekalu ya ng'wa SEEBA. Ī shikū jenījo ū ntemi Solomoni walī mu ng'waka gwakwe gwa kanè ayīsugile ī Isilaeli.

² Ī hekalu īyo Solomoni akanzengela ū SEEBA yalī na būlīhu wa fuuti makūmi kenda, ū būgalī galī wayo yalī fuuti makūmi adatū, ū būgūngūhu walī fuuti makūmi anè n'itanò.

³ Ī hekalu yenīyo ū kū būtongi wayo yūtūūlīlwa ibīndo lya kūlenganīla nū būgalī galī wayo, hū kūhaya fuuti makūmi adatū; lelo ū kūfuma a ha ndugu ū kwiza hanze, yūbiza na fuuti ikūmi n'itanò.

⁴ Hanuma wītūūlīla madilisha mado mado, ga kūbiza mapine ī hanze alīyo ū mu gatī magalī.

⁵ Ūzenga na ndugu yīngī ī hanze kwīpīndīlīja ī ndugu ya hekalu ū mu kabazu nū kū numa, ūtūūla chumba shido shido sha kwīpīndīlīja ī hekalu.

⁶ Ī ndugu yenīyo īkabeejiwa ya golofa idatū, ī chumba sha hasī shūbiza na būgalī galī wa fuuti mpungatī na nusu, ī sha higūlya yaho fuuti kenda, ī sha kwigūlya gete fuuti ikūmi na nusu. Ī hekalu wītūūlīla makīgījo būlī hene aho īligasha migamba ya golofa, gīpīndīlīja kūlwa kwīlang'hana ī ndugu ītizūchibūlwa a hikanza lya kūjizenga ī golofa.

⁷ Ū ng'wikanza lya kwīzenga ī hekalu, a mawe ayo gaatūmamīlagwa gaalī gaamala kūlenganījiwa ng'hana ng'hana kū ngūlū; aho bīzengaga ī hekalu batatūmamīlile nundo, nūūlū shitūmamīlo shingī shose shose sha chūma a h'ipandī lyenīlo.

⁸ Ū nyango gwa kwingīlīla ū mu chumba ī shido do do īsho shalī shiyīpīndīlīgije ī hekalu, gwalī kū lwandī lwa dakama ya hekalu, a ha golofa ya ha sīlīlī; hūna jūtūūlwa ngaji ja kūlinhīla nū kū golofa ī ya ha gatī nī ya kadatū.

⁹ Na lūūlū wīzenga ī hekalu yūshila; ū kwigūlya wīlūmba na kwībimbīla mbawa ja mitī ya mibanga.

¹⁰ Nī chumba ī sha mu ngiligili ya hekalu ūshizenga, ūbeeja golofa idatū, būlī yene ū būgūngūhu wayo fuuti mpungatī na nusu; yūtūmamīlwa migamba ya mitī ya mibanga ū kūjidimanīja a ha ndugu ya hekalu.

¹¹ Hūna ū mhayo go ng'wa Seba gūng'wizīīla ū Solomoni gūlīhaya gīkī,

¹² “Ī hekalu wazenga ī chene, na lūūlū ūlū ūshimīzīla ū mu malange gane, wīta būlī mhayo kūlenganīla na a katongeelele kane, nī shilagīlo shane ūshidima na kūshishikīlīja, nakūkūshikīlīgīja ū kwisagīja kose ūko nang'wisagīja so ū Daūdi.

¹³ A henaho hū nakwikala hamò nabo a Baisilaeli, nīyo natūbaponya a banhū bane a Baisilaeli.”

Mu gatī ya hekalu

¹⁴ Na lūūlū ū Solomoni ūbiza wīzenga ī hekalu yūshila;

¹⁵ Ī ndugu ja mu gatī ūjikundīkīja mbawa ja mitī ya mibanga kwandīja hasī kūshisha kwigūlya ū kū kaano. Ī hasī ūtūūla mbawa ja mitī ya mizule.

¹⁶ Ū mu gatī ū kū numa ya hekalu ūtīna chumba sha fuuti makūmi adatū; ūtūmamīla mbawa ja mibanga, jūbūūkīla hasī kūshisha kwigūlya. Ū mu hekalu ng'wenūmo ūbiza watūūla ipandī lya mu gatī, ūlyīta kūbiza lyeela no no no.

¹⁷ Ī chumba ī shitaale īsho shalī ū kū būtongi w'ipandī ī lyeela no no no, shūbiza na būlīhu wa fuuti makūmi atandatū.

¹⁸ Ī mbawa ja mibanga ī ja mu gatī jūtūūlīlwa būlenji wa tūshisaabo tūdo tūdo na būngī wa kūbiza gītī būlabo būtaamukile. Pye a hose jaali mbawa ja mibanga dūhū, a mawe gūkundīkījiwa gooya gete ū kūmanika.

¹⁹ Ī lipandī lyeela no no no ī lya mu hekalu ūlībeeja chiza kūtinda, kūlwa nguno ya kūlītūūla mo ī lisandīko lya būlagane ī lya ng'wa SEEBA.

²⁰ Ī lipandī lyeela no no no lyalī na fuuti makūmi adatū ū būgalī galī, nū būlīhu makūmi adatū, nū būgūngūhu makūmi adatū. Hūna ī lipandī lyeela no no no lyenīlo, ūlīnaagīla zahabu niiza pye a hose ū mu gatī, pyī nū ng'walīlo ūyo gwalī gūbeejiwe gwa mbawa ja mibanga.

²¹ Ū Solomoni wīnaagīla ī hekalu na zahabu yawiza pye a hose ū mu gatī; hanuma ū kwipandī ī lyeela no no no īlo lyaalī līnaagīlilwe zahabu ūtūūla minyololo ya zahabu, yūnungelejiwa yichaamīka ū kū būtongi waho.

²² Na lūūlū ūbiza wīnaagīla zahabu ī hekalu yose ū mu gatī; pyī nū ng'walīlo gwa ng'wipandī ī lyeela no no no.

²³ Hūna ūbeeja makelubi abīlī ga ntī gwa nzeituni, ga kwikala mu gatī ū ng'wipandī lyeela no no no; būlī lyene ū būgūngūhu lyalī fuuti ikūmi n'itanò.

²⁴ Ī linana ī līmò ī ly'ikelubi lya kwandya lyalī na būlīhu wa fuuti mpungatī na nusu; na lūūlū ū kūfuma ū kū neno y'inana ī līmò kūja kū neno y'inana ī līngī, jalī fuuti ikūmi n'itanò.

²⁵ Nī likelubi lya kabīlī lyalī na būlīhu wa fuuti ikūmi n'itanò, a makelubi genayo galī gikolile, nū būtaale galī galenganīlile.

²⁶ Ū būgūngūhu w'ikelubi ī līmò walī fuuti ikūmi n'itanò, h'ūmo lyalī nī lichalyo.

²⁷ Hūna a makelubi ūgatūūla ū mu chumba sha mu gatī ya hekalu; a manana gago gikala gambile gīko, inana līmò ly'ikelubi līmò lyaho lyūkuumya kū ndugu, n'inana līmò ī ly'ikelubi ī līngī lyūkuumya ū kū ndugu ya lwandī ū lūngī, hūna a ha gatī ya chumba gikuumya a makelubi būbīlī wago.

²⁸ A makelubi genayo ūganaagīla zahabu.

²⁹ Ī mbawa ījo jalī jibandīkilwe ha ndugu kūpīndīlīja pyī ū mu gatī ya hekalu, kwandīja ū kū chumba sha mu gatī nī sha ha būshikīlo, joolwa būlenji wa kūbiza gītī makelubi, na wa kūbiza gītī mitī ya nhende, na būngī gītī bonji būtaamukile.

³⁰ Na a hasī wīnaagīla zahabu ī hekalu hose pye; ū kū chumba ū mu gatī na ha būshikīlo.

³¹ Ū nyango gwa kwingīla kwipandī lyeela no no no gwalī na mhandī itanò; ī mbawa ja kūgūtingata ūjibeeja ja mitī ya mizeituni, hūna ūtūūla ho milyango, nayo ya mitī ya mizeituni.

³² Na a ha milyango ya mitī ya mizeituni būbīlī wayo yenīyo oola hoi būlenji wa kūbiza gītī makelubi, na wa kūbiza gītī mitī ya nhende, na būngī gītī bonji būtaamukile. Hūna a ha būlenji wa makelubi nī mitī ya nhende ūpondela ho zahabu.

³³ Ū nyango gwa kwingīla ū mu hekalu a h'ipandī lya ha būshikīlo, ū gwene gwalī na mhandī inè; nago ūgūbeegeja ī mbawa ja kūgūtingata ja mitī ya mizeituni.

³⁴ Hūna ūbeeja milyango ībīlī ya mbawa ja mizule, būlī gwene gūbiza na bawaba a ha gatī gatī, ja kūgwīta gūlugūke habīlī.

³⁵ Nayo oola hoi būlenji wa kūbiza gītī makelubi, na wa kūbiza gītī mitī ya nhende, na būngī gītī bonji būtaamukile, hūna yūpondelwa zahabu a ha būlenji wenūbo.

³⁶ Ū lūūba lwa kwīpīndīlīja ī gwalugwa ya mu gatī ūlūbeeja lwa ng'hīlīlī idatū ja mawe gabeejiwe chiza, hūna a higūlya lūtūūlwa ho lūhīlīlī lūmò lwa migamba ya mibanga īpalalilwe.

³⁷ Ū nsingi gwa hekalu ya ng'wa SEEBA gūkandya ū kūzengwa mu ng'waka gwa kanè, mu ng'weji gwa Zivu.

³⁸ Mu ng'waka gw'ikūmi na gūmò ng'weji gwa Bulī, hū ū ng'weji gwa kanaane, ī hekalu yūbiza yamalwa ū kūzengwa; būlī shikolo shamo shūtūūlwa gīt'ūmo shalī shilagīlilwe. Īkashisha myaka mpungatī īkūzengagwa hū yūshila.