Biblia Todo Logo
Bìoball air-loidhne

- Sanasan -

1 Batemi 4 - Bibilia Ilagano Lya Kale 2015


Bagunanhi ba ng'wa Solomoni

1 Na lūūlū ū ntemi Solomoni wīsuga ī Isilaeli ī yose pye.

2 Aya gene mina ga bagunanhi abo baalī ha sīlīlī yakwe: Azalia ng'witūnja o ng'wa Sadoki, walī ngabīji.

3 Eliholefa na Ahiya, bitūnja ba ng'wa Shisha baalī bandīki, Yehoshafati, ng'witūnja o ng'wa Ahiludi walī kalaani.

4 Benaya, ng'witūnja o ng'wa Yehoyada walī ntaale wa mabità ga bashilikale; Sadoki na Abiasaali baalī bagabīji;

5 Azalia, ng'witūnja o ng'wa Nasani walī ntaale wa basugi ba sī; Zabudi, ng'witūnja o ng'wa Nasani walī ngabīji, na nganikīji wa ntemi.

6 Ahishaali, walī ntaale wa milīmo ya h'ikūlū, Adonilamu, ng'witūnja o ng'wa Abuda walī ntaale wa milīmo y'ihadīke.

7 Ū Solomoni walī wīgabanhya pyī sī, wītūūla ha sīlīlī ya basugi ikūmi na babīlī, būyūtwala shilīwa ū kwikūlū, sha kūlya ī kaya ya ntemi, na a batūmami ba h'ikūlū. Būlī ng'wene walī na lūdīīma ū mu ng'waka, ūlū lwampandīka wamala ng'weji ngima akūtwalaga ī shilīwa ū kwikūlū.

8 Aya h'a mina ga basugi benabo: Beni Huli walī kū sī ya magūlya ga Efulaimu;

9 Beni-Deka; kū mapandī ga Makazi, Sha-alibimu, Beti-shemeshi na Eloni-betihanani;

10 Beni-Hesedi, walī Aluboti, (ī Soko yalī ha sīlīlī yakwe, nī sī ya Hefeeli ī yose).

11 Beni-Abinadabu, walī kū sī ya Nafoti-dooli, (ū ng'wenūyo walī antoolile Tafasi nshīke o ng'wa Solomoni).

12 Baana, ng'witūnja o ng'wa Ahiludi; walī ipandī lya Taanaki na Megido, nī sī yose ī ya Beti-sheani īyo yalī ībīmbīkanilwe na Zaletani, kū sīlīlī ya Yezileeli, kwandīja Beti-shani kūja Abeli-mehola hūna ūtūla kuluba kūja Yokimeamu.

13 Beni-Geba, walī wa mu sī ya Lamosi-gileadi (ī sī ya Gileadi īyo yalī ya banhū ba lūdūgū lwa ng'wa Yaili ng'witūnja o ng'wa Manase yalī ha sīlīlī ya būsugi bokwe, pyī nī ya Aligobu, ī ya Bashani, nī mizengo ya kwenūko īyo makūmi atandatū, īyo yalī īpīndīlījiwe ndugu nhaale ja mibita na nzwigī ja chūma sha shaba).

14 Ahinadabu ng'witūnja o ng'wa Iddo, walī wa Mahanaimu;

15 Ahimaazi, walī mu sī ya Nafutali, (ū ng'wenūyo walī antoolile Basemati, nshīke o ng'wa Solomoni);

16 Baana, ng'witūnja o ng'wa Hushai, walī mu sī ya Asheli na Aloti;

17 Yehoshafati, ng'witūnja o ng'wa Palua, walī mu sī ya Isakaali;

18 Shimei ng'witūnja o ng'wa Ela, wa mu sī ya Benjamini.

19 Geba ng'witūnja o ng'wa Uli, wa mu sī ya Gileadi (īyo yalī sī ya ng'wa Sihoni ntemi wa Baamooli, na sī īyo yalī ya ng'wa Ogi ntemi wa Bashani). Ū ng'wenūyo walī ntaale iyene ū mu būsugi w'ipandī lya kwenūko.

20 A banhū ba Yuda na Isilaeli baalī bingī no, gītī maseni ga ha ng'walo gwa nyanza. Hama baalī na būyegi no nguno balyaga na kūng'wa bigeja.

21 Ū Solomoni walī ajitemile pyī ī sī; kwandīja kū Mongo kwiza kūshika kū sī ya Bafilisiti, hūna ūtulumenha kūja kū lūbīmbī lwa sī ya Misili. Pyī ī sī jenījo jatobaga goodi ū kūlī Solomoni, nguno jalī ha sīlīlī ya būsugi wakwe ū mu shikū ja būlamu wakwe bose.


Shilīwa sha ha ng'wa Solomoni

22 Ī shilīwa sha ha ng'wa Solomoni ī sha lūshikū lūmò galī madebbe igana na makūmi atanò ga būsu būnogu, na madebbe magana adatū a ga būsu ūbo būtī būnogu.

23 Nzīkū ikūmi ja kūdīīmīlwa mu kaya, na nzagamba makūmi abīlī ja kūdīīmīlwa kū madīīmīlo, na ng'holo igana hamò na mbūli; na ndimu ja mu mapoolu gītī, laala na saala na nja, būyaga na magoko.

24 Yalīho mhola a ha gatī yakwe ū Solomoni nī sī ījo jalī jimpīndije hose hose, nguno walī ajisugile wei pyī ī jose kwīngīīla kū Mongo, kūfuma Tifusa kūshisha Gaza.

25 Nīyo ū mu shikū ja ng'wa Solomoni a banhū ba Yuda nī Isilaeli baalī mu mhola pye a bose gete, kwandīja Dani kūshisha Beeli-sheba; būlī bene bayegelaga matwajo ga mizabibu na mitiini ha kaya jabo.

26 Ū Solomoni walī na numba ndo do do shihūmbī shinè ja kūlaaja mo falasa ja magogoteni; na walī na badamhīji ba falasa shihūmbī ikūmi na shibīlī.

27 A basugi ba sī baalī bagūdīlīīlile ū nīmo gwa kūtwala shilīwa ū kū ng'wa ntemi Solomoni, ī sha kūlya ī kaya ya ntemi na a banhū abo baalīīlaga ha meza ya ntemi; būlī ng'wene ū mu lūdīīma lwa ng'weji gwakwe wikalaga miso shitizūgaya ī shilīwa.

28 Nī shilīwa sha kūlisha falasa batwalaga ūko shalī shigelile kūja; īsho būlī ng'wene walī ahelelilwe kūtwala ūlū yabīta myeji idatū.


Witegeleja bo ng'wa Solomoni

29 Ū Mulungu walī wang'winha ū Solomoni masala mingī no na witegeleja būtaale, na būmani ūbo walī būkīlanīgije, walī būtī na kabalīlwe gītī maseni ga ha ng'walo gwa nyanza.

30 Ū witeleja bo ng'wa Solomoni walī būtaale no kūtinda pye ū witegeleja wa banhū ba sī ja kīya, walī būtaale no kūtinda ū wa bana Misili pye a bose.

31 Ū Solomoni walī na masala kūtinda banhū bose, kūntinda nū Esani ū muna Ezilahi; kūtinda na a bitūnja ba ng'wa Maholi a ba Helemani, Kalikoli, na Dalida. Na lūūlū ū lūkumo lwakwe lūkasambaala hose pye ū mu mahanga ayo gaalī gampīndije hose hose.

32 Ī sumo ījo wajitūmamīla ū Solomoni mu kalūngalūngīle jishikile shihūmbī shidatū, a mīmbo ayo wagīmba nago gashikile shihūmbī shimò na atanò.

33 Wasomboola mihayo ya mitī ya būlī mbika na shose īsho shikazwaga; kwandīja mitī mitaale ya mu mapoolu mataale gītī ga Lebanoni, kūshisha kū tū shikolo tūdo tūdo gītī ūto tūkazwaga na mu ndugu ja numba. Wayomba na mihayo ya shiinū na ndimu ja būlī mbika, pyī nī noni nī shinū ja kwigwesa hasī, kūja kū ndīlo.

34 Banhū ba mahanga na mahanga bizaga kūdegeleka mihayo ya witegeleja bo ng'wa Solomoni, batūmagwa na batemi kūfuma hose hose ū mu sī ūko bīyigwaga ī mihayo ya masala gakwe.

Sukuma Bible © Bible Society of Tanzania, 2019.

Bible Society of Tanzania
Lean sinn:



Sanasan