1 Batemi 17 - Bibilia Ilagano Lya Kale 2015

Eliya kūliishiwa ng'hūngūūlū

¹ Hūna wilonga Eliya muna Tishibe, ūmò wa bikaji ba Tishibe ya Gileadi, ūng'wīla ū Ahabu, “Nalīkwilahīlīla mu lina lya ng'wa SEEBA mpanga, ū Mulungu wa Isilaeli ūyo nalī ntūmami wakwe, lūtūūgwa lūme hasī nūūlū mbula ītūūtūla ū mu myaka īyo īliza yenīyī, ūlū nene natayombile mhayo.”

² Hanuma ya henaho ū mhayo go ng'wa SEEBA gūng'wizīīla ū Eliya kūng'wīla,

³ “Īngaga a henaha, ūje ūkibise kū kamongo ka Keliti, kīya ya Yolodani.

⁴ A minzī ū kūyūng'wa kūfuma ū mu kamongo kenako; ī shilīwa ī shene najilagīlaga ng'hūngūūlū jikūyūkwenhela koi.”

⁵ Ng'hana wīta gīt'ūmo gūkang'wīlīla ū mhayo go ng'wa SEEBA; ūja ū kū kamongo ka Keliti, ī kīya ya Yolodani, ūkikala kwenūko.

⁶ Ī ng'hūngūūlū jūyūng'wenhela ngatī na nyama dilū na mhīndī; a minzī wang'welaga kūfuma ū mu kamongo kenako.

⁷ Gwike aho jabīta shikū, a kamongo kūūkama, nguno yalī ītatūlaga ī mbula.

Eliya na nkīma wa Zalefati

⁸ Hūna ū mhayo go ng'wa SEEBA gūng'wzīīla gūlīng'wīla gīkī,

⁹ “Būūkaga ī haha yenīyī jaga Zalefati ya Sidoni ūkikale kwenūko. Alīko nkīma wachīlwa ngoshi nanagīlaga kūkūpandīkīla shilīwa.”

¹⁰ Ūbūūka ng'hana ū Eliya ūja ī Zalefati, aho washika a ha mita gwa nzengo gwenūyo, ūmona nkīma akūsolelejaga ng'hwi. Ūngīsha, hūna ūnomba alīhaya, “Mayū ūdūgije kūnigunanha minzī mageehu ng'wisale nang'we?”

¹¹ Ū nkīma ng'wenūyo aho alīja ū kwenha a minzī, ūng'witana hangī ūng'wīla, “Mayū ni wanilolalolela na ka shipande ka ngatī nalye.”

¹² Ū nkīma ng'wenūyo ūhaya, “Baba ūmo SEEBA Mulungu wako alī mpanga, ū nene natī na ngatī gete nūūlū hado; nalī na tū būsu tūgehu dūhū mu kashilīndo, na tūguta twa gīko gīko mu jūbba. Ī haha nalīsoleleja ū tūkwi twenūtū naje nakatūzuge ūto tūlīho twenūūto, nalye na kitūnja kane; twigobbole tūche na kūcha!”

¹³ Ū Eliya ūng'wīla gīkī ū nkīma ng'wenūyo, “Ūlītūngīlīja mayū, jaga ūkīīte ūmo wahayīla, alīyo ū mu shenīsho wasaajaga nibeegejage tame ū nene kangatī ūnenhele; hanuma ya henaho ūkūbeeja nī sha kūlya ū bebe nū ng'witūnja wako.

¹⁴ Nguno ū SEEBA ū Mulungu wa Isilaeli alīhaya gīkī, ‘Ī shilīndo shitūmala ū būsu, nī jūbba ya maguta ītūkama, kūshisha lūshikū lwa ng'wa SEEBA kwenha mbula ītūle ū mu sī.’”

¹⁵ Ū mayū ng'wenūyo ūja ng'hana ūkīīta gīt'ūmo akawīlīlwa nū Eliya. Na lūūlū shūbiza ho shilīwa sha kūnisha ū Eliya nū nkīma ng'wenūyo nī kaya yakwe.

¹⁶ Ī shilīndo shitamalile ū būsu, nī jūbba ya maguta ītakamile, kūlenganīla nū mhayo go ng'wa SEEBA ūyo akagūhaya ū Eliya.

¹⁷ Hanuma ya makanza malebe ūsaata ū ng'witūnja wa nkīma ū ng'wenekīlī kaya yenīyo; ū būsaatu būkūla kūshisha ūcha!

¹⁸ Ū nkīma ng'wenūyo ūng'wīla ū Eliya, “Bebe munhū o ng'wa Mulungu, ū nene naakūkenije mhayo kī nose wizile kūniizūkīja būhūbi wane, gīkī ūnibūlagīle ū ng'wana wane!”

¹⁹ Ū Eliya ūng'wīla, “Alinenhelage ū ng'wana wako!” Aho wang'wanukūla kūfuma ū mu nkono gwakwe, ūmūcha ūja nang'hwe kū chūmba sha kwigūlya ūko walaalaga; ūnaalīkīja a ha būlīīlī bokwe.

²⁰ Hūna ūnīlīīla ū SEEBA alīhaya, “Ee SEEBA Mulungu wane, nū nkīma ng'wenūyū, ū nchīlwa ūyo nalikala ha ng'wakwe wangwisīja mhayo gwabūbi gīkī, gwa kūmūlaga ū ng'witūnja wakwe!”

²¹ Hūna ūlaala a higūlya ya mīlī gwa nyanda ng'wenūyo, wigoloola hoi ng'hangala idatū; hanuma ūnīlīīla ū SEEBA alīhaya, “Ee SEEBA Mulungu wane, nalīkwikūmbīlīja būnshokele ū būpanga wakwe ū nyanda ng'wenūyū!”

²² Ū SEEBA wigwa ū kūlomba kwa ng'wa Eliya, būnshokela hangī ū būpanga wakwe ū nyanda; ūbiza mpanga.

²³ Ū Eliya ūmūcha ū nyanda kūfuma ū mu chumba, ūntwala mu numba ūūkang'winha ū nina kūnū alīng'wīla, “Alilolaga ūūyū ū ng'wana wako mpanga!”

²⁴ Ū nkīma ūng'wīla ū Eliya, “Ī haha lūūlū hū namana gīkī gashi ng'hana ūlī munhū o ng'wa Mulungu, nī gīkī ū mhayo go ng'wa Mulungu ūyo gūkafumaga ū mu nomo gwako gūlī gwa ng'hana.”