1 Batemi 16 - Bibilia Ilagano Lya Kale 2015

¹ Hūna mhayo go ng'wa SEEBA gūng'wizīīla Yehu ng'witūnja o ng'wa Hanaani kūlwa nguno ya būhūbi bo ng'wa Baasha.

² Gwiza gūlīhaya, “Nakakūbūūcha nūkūgūngūmūla kūfuma mu lūbuubu, nūkwīta kūbiza nsugi wa banhū bane a Baisilaeli; alīyo hūna wandya kūshimīzīla mu nzīla ja ng'wa Yeloboamu, kūbenheleja a banhū bane a Baisilaeli kūhūba, na kongeja kūnipelanya kūlwa nguno ya būhūbi wabo.

³ Na lūūlū nakūnkenaagūla ū Baasha nī kaya yakwe; ī kaya yako nakwīyīta ībize gītī ya ng'wa Yeloboamu ng'witūnja o ng'wa Nebati.

⁴ A banhū ba ng'wa Baasha abo bakūchīla mu nzengo bakūliiwa mvwa, a ba kūchīla kū matogolo bakūliiwa noni.”

⁵ Mihayo yīngī ī ya mu shikū ja būtemi bo ng'wa Baasha, nī yīyo wīta, nī ya būtindi wakwe; ī yose yandīkilwe mu shitabo sha ng'hūlū ja batemi ba Isilaeli.

⁶ Ū Baasha wifuula na bakūlūgenji bakwe, ūjīīkwa mu nzengo gwa Tiliza. Ng'witūnja wakwe Ela wingīla a ha ng'wanya gwakwe, ūbiza ntemi.

⁷ Ū mhayo go ng'wa SEEBA gwang'wizīīla ū ng'hangi Yehu ū ng'witūnja o ng'wa Hanaani kūlwa nguno ya kūūmanīkīja ū Baasha nī numba yakwe, nguno ū būhūbi ūbo walī wawīta ū mu miso ga ng'wa SEEBA walī būtaale no. Walī wampelanya no ū SEEBA kūlwa nguno ya shītīle shose īsho walī washīta, kūshisha nang'hwe ūbiza gīt'ūmo yalī dūhū ī numba ya ng'wa Yeloboamu; na kūlwa nguno ū wei akīkenaagūla pyī ī kaya ya ng'wa Yeloboamu!

Ela ntemi wa Isilaeli

⁸ Mu ng'waka gwa makūmi abīlī n'ītandatū go būtemi bo ng'wa Asa ū ntemi wa Yuda, Ela ng'witūnja o ng'wa Baasha ūbiza ntemi wa Isilaeli; ūtema ikanza lya myaka ībīlī alī mu nzengo gwa Tiliza.

⁹ Ūmò wa bataale ba bashilikale bakwe ūng'wijomboka, lina lyakwe walī Zimuli, ntongeeji wa nusu y'ibità lya bashilikale ba magogoteni. Ī likanza lyenīlo ū Ela walī mu nzengo gwa Tiliza wang'waga walwa mu numba ya ng'wa Aza, ūyo walī ntaale wa kahelele ka milīmo ya ng'wikūlū lya Tiliza.

¹⁰ Ū Zimuli aho wiza moi ūshikīla kūntūla ūmūlaga; gwalī ng'waka gwa makūmi abīlī na mpungatī go būtemi bo ng'wa Asa ū ntemi wa Yuda. Hūna wingīla a ha ng'wanya gwakwe, ūbiza ntemi wei.

¹¹ Aho wigasha a h'isumbī lya būtemi, ūbona gīkī watema, haho na haho ūbabūlaga pye a banhū ba numba ya ng'wa Baasha. Atalekeelile ngosha nūūlū ūmò; abize ndūgū nūūlū nwani wa kaya yenīyo.

¹² Na lūūlū ū Zimuli ūbiza wīmala pyī ī numba ya ng'wa Baasha; kūlenganīla nū mhayo go ng'wa SEEBA ūyo gwalī gwahayiwa na ng'hangi Yehu kūlwa nguno ya ng'wa Baasha.

¹³ Nguno ū Baasha walī wīta būhūbi būtaale no; pyī nū ng'witūnja wakwe ū Ela, ūbenheleja a Baisilaeli kūhūba, būbiza bampelanya ū SEEBA ū Mulungu wa Isilaeli, kūlwa shiikolile īsho shitī na ngofyoolo nūūlū hado.

¹⁴ Mihayo yīngī ī ya mu shikū ja būtemi bo ng'wa Ela, nī yose īyo wīta yandīkilwe mu shitabo sha ng'hūlū ja batemi ba Isilaeli.

Zimuli ntemi wa Isilaeli

¹⁵ Mu ng'waka gwa makūmi abīlī na mpungatī go būtemi bo ng'wa Asa ū ntemi wa Yuda, Zimuli ūbiza ntemi wa Isilaeli; ūtema ikanza lya shikū mpungatī alī mu Tiliza. Ī likanza lyenīlo ī libità lya bashilikale lyalī kū būlūgū kū nzengo gwa Gibesoni mu sī ya Bafilisiti.

¹⁶ A Baisilaeli aho bigwa gīkī ū Zimuli wang'wijombokaga ū ntemi ūmūlaga, haho na haho būnsola Omuli, ūyo walī ntaale wa mabità ga bashilikale; būng'wīta kūbiza ntemi wa Isilaeli ū lūshikū lwenūlo ū kū ng'hambī ya būlūgū kwenūko.

¹⁷ Hūna ū Omuli na a Baisilaeli a bose bīnga ī Gibesoni, biza kūgūgobanīla ū nzengo gwa Tiliza.

¹⁸ Ū Zimuli aho wabona gwading'wa ū nzengo, ūpeelela mu numba y'ikūlū ūkingīla ng'wipandī īlo lyatūmamaga kūlwa kwibisa na kūpīlīla; hūna witwimīīla moto, ūchīla ng'wenūmo,

¹⁹ kūlwa nguno ya būhūbi wakwe ūbo walī wawīta; ūbeeja yabūbi ū mu miso ga ng'wa SEEBA, kūlwa kūshimīzīla mu nzīla ja ng'wa Yeloboamu, nū būkenaagūji ūbo akīīta, kūshisha ūbenheleja a Baisilaeli kūhūba.

²⁰ Mihayo yīngī ī ya mu shikū ja būtemi bo ng'wa Zimuli, nū būgomi wakwe ūbo akawīta, ī yose yandīkilwe mu shitabo sha ng'hūlū ja batemi ba Isilaeli.

Omuli ntemi wa Isilaeli

²¹ Ī likanza lyenīlo a Baisilaeli būgabanhīka magelè abīlī, igelè līmò lyalī lītogilwe ū ntemi abize Tibuni ng'witūnja o ng'wa Ginasi, ī ligelè ī līngī lyalī līntogilwe ū Omuli gīkī ū ng'wene h'abize ntemi wabo.

²² Alīyo ī ligelè lya ng'wa Omuli lyūkwīja ī nguzu kūtinda ī lya ng'wa Tibuni ū ng'witūnja o ng'wa Ginasi. Na lūūlū ū Tibuni ūbūlagwa, ū Omuli h'ūyo ūbiza ntemi.

²³ Mu ng'waka gwa makūmi adatū na gūmò go būtemi bo ng'wa Asa ū ntemi wa Yuda, Omuli ūbiza ntemi wa Isilaeli; ūtema ikanza lya myaka ikūmi n'ībīlī; myaka ītandatū ū mu yenīyo walī mu Tiliza.

²⁴ Ūgūla lūgūlū lwa Samalia kūfuma kūlī Shema; ūfunya feza ja būdito wa kilo makūmi mpungatī, hūna ūtūūla nzengo a ha lūgūlū lwenūlo, ūgwitana lina lya Samalia kūlwa kūliizūkwa ī lina lya ng'wa Shema, ūyo walī ng'wenekīlī lūgūlū.

²⁵ Gwike nang'hwe ū Omuli wīta yabūbi ū mu miso ga ng'wa SEEBA, ūkenaagūla no, kūtinda a batongi bakwe.

²⁶ Nguno ūshimīzīla ū mu nzīla ī jose ī ja ng'wa Yeloboamu ū ng'witūnja o ng'wa Nebati, nū mu būhūbi wakwe ūbo walī wabenheleja a Baisilaeli kūhūba, kūshisha būmpelanya no ū SEEBA ū Mulungu wa Isilaeli kūlwa shiikolile shabo īsho shitī na ngofyoolo nūūlū hado.

²⁷ Mihayo yīngī ī ya mu shikū ja būtemi bo ng'wa Omuli, īyo wīta nī ya būtindi wakwe, ī yose yandīkilwe mu shitabo sha ng'hūlū ja batemi ba Isilaeli.

²⁸ Ū Omuli wifuula na bakūlūgenji bakwe, ūjīkwa mu nzengo gwa Samalia. Ng'witūnja wakwe Ahabu wingīla a ha ng'wanya gwakwe, ūbiza ntemi.

Ahabu kūbiza ntemi wa Isilaeli

²⁹ Mu ng'waka gwa makūmi adatū n'īnaane go būtemi bo ng'wa Asa ū ntemi wa Yuda, Ahabu ng'witūnja o ng'wa Omuli ūbiza ntemi wa Isilaeli; ūtema ikanza lya myaka makūmi abīlī n'ībīlī alī mu nzengo gwa Samalia.

³⁰ Ū Ahabu ng'witūnja o ng'wa Omuli akīīta yabūbi no ū mu miso ga ng'wa SEEBA kūbaheeba a batongi bakwe.

³¹ Nguno atagelelile kūbona dūhū gīkī gūlī mhayo ndo no ū gwa kūshimīzīla mu būhūbi bo ng'wa Yeloboamu ng'witūnja o ng'wa Nebati, alīyo akantoola na Yezebeli nshīke o ng'wa Etibaali, ntemi wa Basidoni; wandya kūntūmamīla Baalī na kūnamya.

³² Ūzenga hekalu ya ng'wa Baalī ū mu Samalia; ūtūūla mo na ng'walīlo go ng'wa Baalī.

³³ Ū Ahabu ūbeeja na ng'hīngī ya ng'wa Ashela, ongeja kūmpelanya no no no ū SEEBA, ū Mulungu wa Isilaeli; ūnsaayīcha kūtinda ūmo balī bansaayīkīja a batemi ba Isilaeli a bangī a ba kū numa yakwe.

³⁴ Ū mu shikū ja ng'wa Ahabu, munhū ūmò lina lyakwe Hieli muna Beeseli, ūgūzenga būpya ū nzengo gwa Yeliko. A h'ikanza lya kūgūsīmbīla ū nsingi gwago, ūchīlwa na ng'witūnja wakwe tangī, lina lyakwe Abilamu. Hama a h'ikanza lya kwītūūla ī mibita yaho, ūchīlwa na ng'witūnja wakwe kwangūlīja, lina lyakwe Segubu. Gūūshikīīla ū mhayo go ng'wa SEEBA ūyo gwalī gwahayiwa na Yoshwa ng'witūnja o ng'wa Nuni.