1 Batemi 14 - Bibilia Ilagano Lya Kale 2015

Ahiya kūng'hangīla Yeloboamu

¹ Ū Yeloboamu walī na ng'witūnja witanagwa Abiya; ū mu shikū jenījo ūsaata ū nyanda ng'wenūyo.

² Hūna ū Yeloboamu ūng'wīla ū nke wakwe, “Zwalīlaga shizwalo sha kūkwīta ūjimīlīkane; ūtizūūmanīīka gīkī ūlī nke o ng'wa Yeloboamu; ūje Shilo, alīko koi ng'hangi Ahiya, ūyo akaniwīla gīkī nakūbiza ntemi wa banhū benaba.

³ Solaga migatī ikūmi ūntwaalīle, na tūkeki, na ka shisaabo ka būūkī; ūje akakūwīle īyo īkūng'wilongela ū nyanda.”

⁴ Na ng'hana ū nke o ng'wa Yeloboamu wīta gīt'ūmo akawīlīlwa nū ngoshi, ūj'ī Shilo ū kū ng'wa Ahiya. Ī shikū jenījo ū Ahiya walī oya ū kūbona nguno ya būnamhala.

⁵ Alīyo ū SEEBA ūng'wīla ū Ahiya, “Alīho nke o ng'wa Yeloboamu aliza kūkūbūūja mihayo ya ng'witūnja wakwe asaatile; ū bebe ūkūng'wīla gīkī na gīkī. A henaha akwiza mu kwigīmbīja gītī gīkī atī ng'wene.”

⁶ Na lūūlū ū Ahiya aho wajiigwa ī mhambala jakwe jikūshaadūkaga aliza a ha nyango, ūng'wīla; “Tūlīmo ū mu kaya nke o ng'wa Yeloboamu, ni kinehe ūliyīta kūbiza gītī ūtī ng'wene? Nalī na mihayo midito ya kūkūwīla nalagījiagwa.

⁷ Shokaga ū kūlī Yeloboamu ūkang'wīle gīkī ū SEEBA ū Mulungu wa Isilaeli alīhaya, ‘Ū bebe nakakūbūūcha kūfuma ū mu banhū ūbiza higūlya yabo, nūkwīta kūbiza nsugi wa banhū bane a Baisilaeli.

⁸ Nūbūtandūla ū būtemi nūwīnja ū kū numba ya ng'wa Daūdi, nūkwinha bebe; alīyo walemeelilwe ū kūshika ūmo walī ū ntūmami wane ū Daūdi, ūyo walī ashidimile ī shilagīlo shane, na washimīzaga mu kūnilondeela na ng'holò yakwe yose na kwīta dūhū īyo yigeleelilwe mu miso gane.

⁹ Ū bebe wītile yabūbi no kūtinda pye abo baakūtonga ū kūbiza ho; nguno wibeegegije bamulungu bangī, ūbeeja shiikolile sha chūma sha kūsula kūlwa kūnipelanya, hūna ūninhīla ngongo!

¹⁰ Na lūūlū ī numba ya ng'wa Yeloboamu nakwīgwisīja būbi būtaale. Ū mu numba ya ng'wa Yeloboamu nakūbamala a bagosha, pye gete abo alī nabo ū mu Isilaeli, babize balī mu wiyaabī nūūlū basese. Nakwīpemba moto ī numba ya ng'wa Yeloboamu, īpye kūshisha īshile gete pyī ī yose gītī munhū akūpembaga maashi.

¹¹ A banhū ba ng'wa Yeloboamu a ba kūchīla mu nzengo bakūliiwa mvwa, a bakūchīla kū matogolo bakūliiwa noni ja hape; h'ūmo alīhayīla ū SEEBA!’

¹² Na lūūlū ū bebe būkaga ī haha ūje kaya, gwike ū lūpambala lwako ūlū lūlakuumye dūhū ū mu nzengo, ū nyanda akūcha.

¹³ Pye a Baisilaeli bakūnīla na bakūnjīka; ū mu bose a ba mu kaya ya ng'wa Yeloboamu ng'wenūyo dūhū ūyo akūjīkwa, nguno ū mu numba ya ng'wa Yeloboamu hū ng'wenūyo dūhū ūyo wamanikile gīkī alī wawiza ū kūlī SEEBA Mulungu wa Isilaeli.

¹⁴ Ū SEEBA akwipandīkīla ntemi ū mu Isilaeli; ū ng'wenūyo h'ūyo akwīkenaagūla gete pyī ī kaya ya ng'wa Yeloboamu, Nanalī nīyo? Atūdīīlaga; lyashikaga ī likanza!

¹⁵ Nīyo ū SEEBA akwītūla ī Isilaeli ībize gītī idete līkūyengeelaga mu minzī. Akwīdubbūla ī Isilaeli, yīnge ū mu sī ī yawiza yenīyī, īyo wabinha bakūlūgenji babo; hanuma akūbaponya basambaale kūshisha kūgūkīla ū Mongo. Nguno ū SEEBA bampelanije no kūlwa kwibeegeja ng'hīngī ja ng'wa Ashela.

¹⁶ Na lūūlū akūbaponya gete a Baisilaeli kūlwa būkenaagūji bo ng'wa Yeloboamu, ūbo wahūbile, ūbingīja mu būhūbi a Baisilaeli.”

¹⁷ Hūna ū nke o ng'wa Yeloboamu ūbūūka ūshoka kaya Tiliza, wapanda dūhū a ha nyango ūcha ū nyanda.

¹⁸ Pye a Baisilaeli būnīla, hanuma būnjīka gīt'ūmo walī wahayīla ū SEEBA mu nzīla ya ntūmami wakwe ū ng'hangi Ahiya.

¹⁹ Mihayo yīngī ī ya būtemi bo ng'wa Yeloboamu yandīkilwe mu shitabo sha ng'hūlū ja batemi ba Isilaeli.

²⁰ Ī likanza ī lyose īlo akatema ū Yeloboamu yalī myaka makūmi abīlī n'ībīlī, hūna ūlaala na bakūlūgenji bakwe. Ng'witūnja wakwe Nadabu wingīla a ha ng'wanya gwakwe, ūbiza ntemi.

Lehoboamu ntemi wa Yuda

²¹ Ū Lehoboamu, ū ntemi wa Yuda walī na myaka makūmi anè na gūmò aho alandya kūtema; ūtema myaka ikūmi na mpungatī alī mu Yelusalemu, nzengo ūyo SEEBA walī wagūsolū ū mu ng'anda jose ī ja Isilaeli, gīkī atūūle ng'wenūmo ī lina lyakwe. Ū nina o ng'wa Lehoboamu ī lina lyakwe walī Naama, wa kūfuma kwihanga lya Baamoni.

²² A banhū ba Yuda nabo bīīta yabūbi ū mu miso ga ng'wa SEEBA; ū mu būbi wabo būng'wīta ū SEEBA kūbiza na wiilu; būmpelanya no kūtinda ūmo balī bampelanīja a bakūlūgenji babo.

²³ Nguno nabo bakibeegeja mapandī ga higūlya, na mawe ga kūlamiwa; na makīngī ga Ashela hose hose ū kwigūlya ya ngūlū, na būlī ha sīlīlī ya ntī gwa madūūtū manīlīzu.

²⁴ Ū mu sī yabo bigela na bamalahya bagosha, ba kwiyīta kūbiza gītī bakīma; a banhū būyūyīta pyī ī yamalofu īyo yītagwa mu mahanga ayo SEEBA walī wagapeeja gabīngīle a Baisilaeli.

²⁵ Na lūūlū ū mu ng'waka gwa katanò go būtemi bo ng'wa Lehoboamu, ntemi Shishaki wa Misili ūgūdumīla ū nzengo gwa Yelusalemu.

²⁶ Ūjisola pyī ī sabo ījo jalī ū mu hekalu ya ng'wa SEEBA nū mu numba y'ikūlū lya ntemi. Ūbūūcha būlī shikolo; ūjijaana nī mūda ja zahabu ījo walī wabeeja Solomoni.

²⁷ Ū ntemi Lehoboamu ūbeeja mūda jingī ja shaba a ha ng'wanya gwajo ījo jikajanwa, ūjitūūla mu makono ga balang'hani, abo bilekelaga ndīīma ja kūlang'hana ha mita gwa kwingīlīla mu gwalugwa ya h'ikūlū.

²⁸ Būl'ikanza ū ntemi ūlū alīja kū hekalu ya ng'wa SEEBA a balang'hani bajibūūchaga ī mūda jenījo; hanuma ya henaho bajishosha hangī ū mu chumba ūmo jabīkagwa.

²⁹ Mihayo yīngī īyo wīta ū Lehoboamu ū mu shikū ja būtemi wakwe yandīkilwe mu shitabo sha ng'hūlū ja batemi ba Yuda.

³⁰ A ha gatī ya ng'wa Lehoboamu nū Yeloboamu boolīho būlūgū bo shikū jose na jose.

³¹ Hūna ū Lehoboamu wifuula na bakūlūgenji bakwe, ūjīkwa hamò nabo mu nzengo go ng'wa Daūdi. Ū nina ī lina lyakwe walī Naama, wa kūfuma kwihanga lya Baamoni. Ng'witūnja wakwe Abiya wingīla a ha ng'wanya gwakwe, ūbiza ntemi.