1 Batemi 12 - Bibilia Ilagano Lya Kale 2015

Kasolele ka ng'wa Lehoboamu

¹ Ū Lehoboamu ūja Shekemu, nguno pye a Baisilaeli baalī baja kwenūko kūntemya.

² Ū Yeloboamu ng'witūnja o ng'wa Nebati akajiigwa ī mhola jenījo, (a makanza genayo walī ataalī Misili ūko walī wapeelela kūlwa kūng'ogoha ntemi Solomoni), na lūūlū ūshok'ū kūfuma ī Misili.

³ Hūna a banhū būlagīja itanwe; hanuma ya henaho ū wei na a Baisilaeli a bose būja ū kūlī Lehoboamu būūkang'wīla gīkī,

⁴ “Ū namhala walī watūseseja nigo ndito no; alilūūlū, tūgeehejage ī milīmo ūtūbbūūpīje nū nigo ūyo walī atūsesegije, tūkūkūtūmamīla.”

⁵ Ū Lehoboamu ūshosha alīhaya, “Jagi mukikale shikū idatū hūna mushoke.” Ng'hana a banhū būja kaya.

⁶ Na lūūlū ū Lehoboamu ūhooya na a banamhala abo baalī batūmami ha sīlīlī ya ng'wa ise Solomoni aho ataalī mpanga. Ūbabūūja, “Mulībona kinehe? Mulīninha maganiko kī ga kūbashokeja a banhū benaba?”

⁷ Nabo būng'wīla, “Ūlū ūbize ūtogilwe kūbiza ntūmami wa banhū benaba na kūbatūmamīla gete, binhage ishosho lyawiza ī lelo yenīyī; nabo hū bakūbiza batūmami bako ilalī.”

⁸ Alīyo ū Lehoboamu ūbūponya ū būganikīji ūbo bakang'winha a banamhala, ūbagalūkīla badinha b'ilika lyakwe, abo bantūmamīlaga.

⁹ Ūbabūūja alīhaya, “Al'a bing'we mulībona kinehe? Tūbashokeje mhayo kī a banhū benaba abo balīhaya gīkī, ‘Tūbbūūpījage ū nigo ūyo walī atūsesegije ū namhala?’”

¹⁰ A badinha b'ilika lyakwe būnshokeja balīhaya, “Bawīlage a banhū benaba abo balīkūwīla gīkī, ‘Ū namhala walī atūsesegije nigo ndito no, ū bebe tūbbūūpījage ū nigo gwenūyo: Na lūūlū a banhū benabo bawīlage gīkī, A kalwala kane a kado kalī kagīnu kūtinda ū nkīmbīlī go ng'wa baba.’

¹¹ Na ng'hana ū baba ni abizage walī amusesegije nigo ndito, alīyo ū nene nakūgwīta gūbize ndito kūtinda. Ū baba watūmamīlaga manasu ū kūmutūla, ū nene ng'wene nakūyūtūmamīla ng'homi!”

Baisilaeli kūnema Lehoboamu

¹² Hūna a ha lūshikū lwa kadatū lwaho, ū Yeloboamu na a banhū pye a bose biza ū kūlī Lehoboamu gīt'ūmo walī wahayīla ū ntemi, “Jagi mukikale shikū idatū mushoke aha twibone.”

¹³ Ū ntemi ūbashokeja na būkalī a banhū, ū būganikīji ūbo walī winhwa na banamhala ūbūponya;

¹⁴ ūlondeela ūmo baalī bang'wīlīla a basūmba, ū haya gīkī, “Ū nigo ūyo walī wamuseseja ū baba gwalī ndito, ū nene nakūgwīta gūbize ndito kūtinda. Hama ū baba ūmo watūmamīlaga manasu ū kūmutūla, ū nene ng'wene nakūyūtūmamīla ng'homi!”

¹⁵ Na lūūlū ū ntemi atabadegelekile gete a banhū, nguno ū mhayo gwenūyū gwalī gūfumile kūlī SEEBA, gīkī ū SEEBA ashikīlīje ūmo walī wang'wīlīla Yeloboamu ng'witūnja o ng'wa Nebati, mu nzīla ya ng'wa Abiya muna Shilo.

¹⁶ A Baisilaeli aho babona gīkī ū ntemi walema ū kūbadegeleka, pye a bose būnshokeja ū ntemi balīhaya: “Ī gete a bise tūlī na ngabo kī nīyo ū mulī Daūdi? Tūtī na wingīji nūūlū hado ū mulī ng'witūnja o ng'wa Yese! Bebe Isilaeli, jaga kū maheema gako! Daūdi dīlīlaga kaya yako nang'ho!” Ng'hana a Baisilaeli būsambaala būja kaya.

¹⁷ Gwike ū Lehoboamu walī ataalī abasugile a Baisilaeli abo bikalaga mu mizengo ya Yuda.

¹⁸ Hūna ū ntemi ūntūma Adonilamu ūyo walī ntaale wa milīmo y'hadīke; alīyo pye a Baisilaeli būmponda mawe kūshisha ūcha. Ū ntemi Lehoboamu wangūha kwingīla ng'wigogoteni lyakwe ūpeela kūja Yelusalemu, ūbiza wapūlūgūka.

¹⁹ Na lūūlū a Baisilaeli bīgomela ī numba ya ng'wa Daūdi kūfuma ikanza lyenīlo kūshisha lelo īyī.

²⁰ A Baisilaeli a bose aho badeeba gīkī ū Yeloboamu wizile, būtūma nhūng'wa kūng'witana; wiza kū ng'wibilingo būng'wīta kūbiza ntemi wabo. Lūganda lwa ng'wa Yuda dūhū hū ūlo lwikala lūdimanile nī kaya ya ng'wa Daūdi.

Mulungu kūng'hama Lehoboamu

²¹ Ū Lehoboamu aho washika ī Yelusalemu, ūbabilinga pye a banhū ba lūganda lwa ng'wa Yuda, nū lwa ng'wa Benjamini. Bibilinga bashilikale shihūmbī igana na makūmi anaane, gīkī baje kwilwisha būlūgū nī kaya ya Isilaeli, babūshoshe ū būtemi mu nkono go ng'wa Lehoboamu ng'witūnja o ng'wa Solomoni.

²² Alīyo gwiza mhayo go ng'wa SEEBA kūlī munhū o ng'wa Mulungu, lina lyakwe Shemaya;

²³ gūhaya, “Ng'wīlage ū Lehoboamu ng'witūnja o ng'wa Solomoni ū ntemi wa Yuda na a banhū ba numba ya ng'wa Yuda a bose, nī ya ng'wa Benjamini na a banhū a bangī;” bawīlage gīkī,

²⁴ “Ū SEEBA alīhaya, ‘Yaya ū kūja kwilwisha būlūgū na a baana ba ng'wing'we a Baisilaeli. Shokagi kaya pye a bose, nguno ū mhayo gwenūyū naagwītile nene.’” Ng'hana būgwigwa ū mhayo go ng'wa SEEBA, būshoka kaya gīt'ūmo SEEBA akabalagīīlīla.

Ndama ja kūlamiwa Beeseli na Dani

²⁵ Hūna ū Yeloboamu ūgūzenga chiza nzengo gwa Shekemu, gwalīho mu sī ya magūlya ga Efulaimu, wikala kwenūko; aho alī kwenūko ūgūzenga na nzengo gwa Penieli.

²⁶ Hanuma ya henaho ū Yeloboamu wiganika ū mu ng'holò yakwe, “Ū būtemi wenūbū būshikile kūshoka kū numba ya ng'wa Daūdi.

²⁷ A banhū benaba ūlū bikale bakūjaga kū hekalū ya Yelusalemu kūfunya shitambò, bakūhayimanīla bangalūkīla hangī saabo būgonzo Lehoboamu, ū ntemi wa Yuda. Bakūnibūlaga ū nene banshokele ntemi Lehoboamu.”

²⁸ Hūna ūlūngalūnga na banhū akūkoobaga maganiko gabo; gūnona gwa kūbeeja ndama ibīlī ja zahabu. Na lūūlū ūbawīla a banhū, “Mukūkoyaga no ū kwikala ng'ūja Yelusalemu. Bebe Isilaeli, baaba a baamulungu bako, abo bakūfunya mu sī ya Misili.”

²⁹ Īmò ya ndama jenījo wīyīmīlīja Beeseli, ī yīngī Dani.

³⁰ Ū mhayo gwenūyo gūbiza gwamalofu no. Nguno a banhū būyūshika na Dani kūja kwīlamya nī ndama ya kwenūko.

³¹ Ū Yeloboamu ūzenga mapandī mingī ga kwigūlya kūlwa kwilamīlīgīja, ūyūtūūla bagabīji ba kūfuma mu banhū bose bose, nūūlū batī Balawī.

³² Ūsola lūshikū lw'ikūmi na'itanò ng'weji gwa kanaane, ūlwīta kūbiza lūtaale lwa kūfunya shitambò ha ng'walīlo, gīt'ūmo bīītīlaga banhū ba Yuda. Ū mhayo gwenūyo ūgwītīla Beeseli, akūjifunījaga shitambò ī ndama ījo akabeeja. Nū kūtūūlwa ha nīmo a bagabīji abo walī wabasola kūlwa kūfunya shitambò kū mapandī ga kwigūlya būtūūlīlwa Beeseli henaho.

³³ Ū lūshikū lw'ikūmi n'itanò ū mu ng'weji gwa kanaane, lwalī lūshikū lwa kwiganika wei dūhū ū Yeloboamu. Ū lūshikū lwenūlo ūfunya shitambò a ha ng'walīlo ūyo walī wagūzenga Beeseli. Ūja wei a ha ng'walīlo gwenūyo ūūkafunya shitambò; ūbalugūlīla a Baisilaeli ī shigukulu shenīsho.