1 Bakolinto 8 - Bibilia Ilagano Lya Kale 2015

Shitambo mu witongeleja

¹ Ī mihayo ya shitambo īsho shikafunyiagwa mu myatīla ya witongeleja, ī yene pye a bose tūmanile gīkī twīdeebile; gwike ū būmani būkenhaga wikumīlīja, alīyo ū būtogwa būkazengaga.

² Ūlū munhū akwiganikaga gīkī amanile shose shose, ū ng'wenūyo ataalī ū kūmana ūmo shing'wigeleelilwe kūmana.

³ Alīyo ū munhū ūlū ūntogwa Mulungu, ū ng'wenūyo hū wamanagwa nū Mulungu.

⁴ Hūna lūūlū, ī mihayo ya kūlya shilīwa īsho shikafunyiagwa kūbiza shitambo mu myatīla ya witongeleja; tūmanile gīkī ī shikolo īsho shikalamiagwa shitī na gose gose ū mu sī, na gīkī atīho Mulungu ūlū atī ūmò wike.

⁵ Nguno nūūlū ni babiza balīho abo bakitanagwa bamulungu, hīmba ng'wigūlū nūūlū mu sī ūmu; gīt'ūmo ng'hana balīho “bamulungu” bingī, na “baseeba” bingī,

⁶ alīyo ū kū bise ū Mulungu alī ūmò wike; hū ng'wene ū Sīswe. Hangī pyī ī shikolo shifumile kūlī wei, na a bise tūlī bakwe; hama alīho na Seeba ūmò Yesu Kilisito, ūyo pyī ī shikolo shilīho kūlwakwe, na a bise tūlīho kūlwakwe.

⁷ Gwike ū būmani wenūbū būtīmo ū mu banhū pye a bose, balīho bangī kūlwa kūmanīīla myatīla ya witongeleja, nī haha ūlū balīlya bakabonaga gītī shafunyiagwa mu mbika ya witongeleja, na lūūlū ū mu gīko bakasosohalaga ū mu myoyo yabo nguno migokolo!

⁸ Alīyo ī shilīwa shitīko kūtwenheleja kūkumīlījiwa na Mulungu, nguno nūūlū tūkaleka ū kūlya h'ītī gīkī tūkūgehelwa shose shose, hama nūūlū tūūlya nahene hū dūtūkūla no!

⁹ Gwike ilang'hanagi, ū būdūla wing'we wenūbū būtizūbiza ishikī ū kū bagokolo.

¹⁰ Nguno ū munhū ngokolo ūlū ūkūbona ū bebe ūyo ūlī na būmani wigashaga ng'widuku lya kūlamīja masamva, angū, atīko kūgima nang'hwe kūshisha nose alye shitambo īsho shafunyiagwa mu myatīla ya witongeleja?

¹¹ Kūlwa būmani wako ū bebe, ūkūbiza wankenaagūla ū ngokolo ng'wenūyo; ū ndūgū ūyo wachīlīlwa na Kilisito ng'wenūyo!

¹² Nose ūlū ng'ūbīītīla yabūbi gīko a badūgū, ūlū ng'wīlemehaja gīko ī myoyo ī migokolo, mukūbiza mulīng'hūba ū Kilisito.

¹³ Hū kūhaya ūlū shilīwa shilīng'wenheleja ndūgū wane kwipama, nūūlū nyama nakūleka gete ilalī ū kūlya, natizūng'wipamya ū ndūgū wane.