1 Bakolinto 6 - Bibilia Ilagano Lya Kale 2015

Kūlamulwa na banhū abo batī bazunya

¹ Bing'we, ni ginehe ūlū ūmò wing'we alī na wilemeelwa na ng'wiye mukūgimaga kūjūlamulwa kū mabanza ga banhū abo batī batūngīlīja, mutūjaga kūlamulwa kū būtongi wa beela?

² Mutamanile gīkī a beela bakūbalamula a banhū ba mu sī? Hūna lūūlū īkī mukūbiza balamuji babo a banhū ba mu sī, angū, mutigeleelilwe ū kwīlola ī mihayo ī mido mido?

³ Mutamanile gīkī na a bamalaika tūkūbalamula? Sumva na mihayo ya mu būpanga ūbū dūhū!

⁴ Hama nibūlī mukūbatūūlaga banhū abo batī na gwabo ū mu kanisa gīkī babize balamuji bayo ī mihayo yenīyo?

⁵ Leki namuwīle gwa kūmudimya minala, hū kūhaya gīkī atīho nūūlū ūmò ū mu bing'we ūyo alī na masala ga kūdūla kwīyitegeleja īyo īkūnkoyaga munhū na ndūgūye;

⁶ nose munhū akwitwalaga na ndūgūye kūjūlamulwa, nīyo hangī kū būtongi bo banhū abo batī bazunya?

⁷ Hama nīyo ū mhayo gwa kwishisha kū mabanza gwenūyū, gūloolecha gīkī būlīho būgehelwa būtaale ū mu bing'we! Nibūlī mutūzunyaga hambū hambū nūūlū kwītīlwa ī yabūbi; nūūlū ni kūnyeekejiwa?

⁸ A ha ng'wanya gwaho a bing'we benekīlī hū mukūbīītīlaga yabūbi a banhū, na kūbanyeekeja, nīyo abo mukūbīītīlaga ī yenīyo balī badūgū mulī Seeba!

⁹ Mutamanile gīkī abo batī batūngīlīja batingīla ū mu būtemi bo ng'wa Mulungu? Yaya ū kūlemva lemva; a bajingi na a balamya ba mashikolo, na a bashihani, na a bagosha abo bakiyītaga kūbiza gītī bakīma, na a babo bakīītīlaga bagosha bichabo mihayo ya minala;

¹⁰ na a biibi, na a bikūmvi, na a bakolwa walwa, na a badūkani, na a banyeecha, batingīla ū mu būtemi bo ng'wa Mulungu.

¹¹ Nū mu bing'we bamò bing'we ng'walī gīko, alīyo mukoojiwa, ng'wejiwa, ng'ūbalīlwa būtūngīlīja mu lina lya ng'wa Seeba Yesu Kilisito, na mulī Moyo wa ng'wa Mulungu wise.

Nkūjagi Mulungu ū mu bing'we

¹² “Ū kūlī nene pyī ī shikolo shizunīlīgije,” alīyo h'ītī gīkī pyī shilī na solobo. “Na ng'hana ū kūlī nene pyī ī shose shizunīlīgije,” alīyo shitīko kūnisuga nūūlū shimò shaho.

¹³ “Ī shilīwa shilīho kūlwa kūja mu nda, nī nda īlīho kūlwa shilīwa,” alīyo ū Mulungu akūshīnja pyī būbīlī washo. Ū mīlī gūtīho kūlwa būjingi, gūlīho kūlwa ng'wa Seeba; hūna ū wei alī Seeba wago ū mīlī.

¹⁴ Ū Mulungu ūyo akanjūūcha Seeba, na a bise akūtūjūūcha gīko, kūlwa būdūla bokwe.

¹⁵ Mutamanile gīkī ī mibīlī ying'we īlī mabudīka ga mīlī go ng'wa Kilisito? Hama ni ginehe nose nīnje mīlī go ng'wa Kilisito naje nakagūdimanīje ha gwa ng'wa malahya? Yaya gete ī gīko!

¹⁶ Nūūlū hamo mutamanile gīkī ūyo ūdimana na malahya babizaga mīlī gūmò? Nguno gūhayiwe gīkī, “A babīlī bakūbiza mīlī gūmò.”

¹⁷ Alīyo ūyo ūdimana na Seeba, ū ng'wenūyo wabizaga ūmò nang'hwe ū mu moyo.

¹⁸ Bing'we, būpeelagi ū būjingi; shibi shose shose īsho munhū wīta shilī hanze ya mīlī gokwe, alīyo ūlū wīta būjingi, aliyītīla shibi mu mīlī gokwe wei ng'wenekīlī.

¹⁹ Mutamanile gīkī ū mīlī gwing'we gūlī hekalu ya ng'wa Moyo Ng'wela, ūyo mung'wanukūlile kūfuma kūlī Mulungu gīkī ikale mu bing'we? A bing'we mutī sabo ying'we ya benekīlī.

²⁰ Nguno mugūlilwe na mpango ntaale; na lūūlū nkūjagi Mulungu ū mu mibīlī ying'we.