1 Bakolinto 4 - Bibilia Ilagano Lya Kale 2015

Nīmo gwa būtūng'wa

¹ Na lūūlū ū mu yenīyī, būlī munhū ni atūbalage a bise gīkī tūlī batūmami ba ng'wa Kilisito, na babilisīlwa ba mbisīla ja mihayo ya ng'wa Mulungu.

² Ūyo gūgongilwe ho a henaho gūlī gīkī, būlī milisīlwa abize nsanyiwa.

³ A bing'we nūūlū mukanisola būbi ū nene, nūūlū banhū bangī bose bose būnilamula, ū gwenūyo gūlī mhayo ndo no; ū nene ng'wenekīlī natīko kwisola būbi.

⁴ Nguno natabūmanile ū būbi ūbo nalī nabo; alīyo nahene h'ītī gīkī nakūbalīlwa būtūngīlīja kūlwa mhayo gwenūyo, nguno ū namuji wane ng'wene Seeba.

⁵ Nose hū kūhaya mutalamulage mihayo yose yose aho lītaalī ū kūng'wa ī likanza, kūshisha ize ū Seeba ūyo akwītendegesa ha ng'wape pyī īyo yibisile mu giiti, na a maganiko ga myoyo agooleche hape; hūna ū būkumīlījiwa wa būlī munhū būkūfuma kūlī Mulungu.

⁶ Ali lūūlū badūgū bane, ū mu mihayo yenīyo nitūūlaga ho nene na Apolo kūbiza shigemelo kūlwa kūmulanga, gīkī ū mu kiganikīle king'we ng'ooye ū kwīkīlanhya īyo yandīkilwe, pyī nū kwikumīlīja kūlwa munhū ūyū, lelo ū ūngī ng'wene ng'wandalaha!

⁷ Ī gīsī ū bebe wikīlile mu ginehe nabo a bangī? Nūūlū kī īsho ūtanukūlile ū bebe? Na lūūlū īkī nang'ho ūlī ng'wanukūji dūhū, nibūlī ūkūdoosaga, gītī gīkī ū bebe ūtī ng'wanukūji!

⁸ Ī haha a bing'we ng'wapandīkile ī sha kūng'wigela, ng'wasabile, ng'wabizile batemi nūūlū aho tūtī hamò ning'we; na ng'hana temagi na a bise tūteme hamò ning'we.

⁹ Nguno naliganika gīkī ū Mulungu atūtūūlile ho a bise batūng'wa, gīkī tūbize ba kūmalīja ū mu banhū abo basolilwe kūlwa kūbūlagwa. Tūlībiza gītī shiiloleelo ū mu sī, ū kū bamalaika nū kū banhū.

¹⁰ A bise tūlī bachilū chilū kūlwa ng'wa Kilisito; lelo a bing'we mulī na masala ū mulī Kilisito, a bise tūlī bagokolo, a bing'we mulī na nguzu; a bing'we mukūkumīlījiagwa, alīyo a bise tūkūdalahagwa.

¹¹ Kūshisha ikanza īlī a bise tūkūkoyiagwa būtuubu na nota na būzuuka; tūkūjaga tūkundugwa būlī kwene, tūtī na nzengo gwa kwikala.

¹² Tūkūluha luhaga kūtūmama na makono gise benekīlī; ūlū twadūkwa tūkūlombelaga lubango, nū mu kūluhiwa nū ng'wene tūkwiyūmīlījaga.

¹³ Nūūlū twasondagūlwa tūkūshoshaga mu būlyehu; kūshisha haha tūkūbonagwa gītī tūlī mapalala ga mu sī; gītī būsoso wa būsoso bose!

¹⁴ Natūng'wandīkīlaga ī yenīyī gīkī namudimye minala, alīyo nalīmuganikīla gītī baana bane batogwa.

¹⁵ Īkī nūūlū ni ng'wabiza na balangi bingī na ginehe ū mulī Kilisito, alīyo nahene mutī na basīng'we bingī, nguno naamubyala nene ū mulī Kilisito Yesu, mu nzīla ya Ng'hūlū Jawiza.

¹⁶ Hūna lūūlū nalīng'wikūmbīlīja mubize balondeeji bane.

¹⁷ Ū Timotheo ū ng'witūnja wane ntogwa, na munhū nsanyiwa mulī Seeba, nalīntūma ize ūko mulī kūlwa nguno ya kūng'wizūkīja ī nzīla jane ū mulī Kilisito Yesu, nū mumo nakūjaga nūlangīla ū mu kanisa pyī ī jose.

¹⁸ Gwike bamò bing'we bandije kwigīmba gīmba gītī gīkī natizaga ko ū nene!

¹⁹ Alīyo ū Seeba ūlū ūtogwa nakwiza, nababone ūmo bakūhayīlaga a bigīmba gīmbi benabo; nū būdūla wabo nabūbone.

²⁰ Nguno ū būtemi bo ng'wa Mulungu būtī mu mihayo dūhū, alīyo būlī mu būdūla.

²¹ Ī gīsī ni gūlī ginehe ūyo mugūtogilwe? Namusange koi bo milang'ha, nūūlū nize mu būtogwa na moyo mpolo?