1 Bakolinto 3 - Bibilia Ilagano Lya Kale 2015

Būsangī mu kūntūmamīla Mulungu

¹ Hūna lūūlū badūgū bane, ū nene nakalemeelwa ū kūmusomboolela gītī banhū ba nhūngwa ja Kiimoyo, nūgelela kūmusomboolela gītī banhū ba nhūngwa ja mīlī dūhū; gītī banīgīnī ū mulī Kilisito.

² Nakang'winha mabeele, ītī shilīwa shitimbu yaya; nguno ī shene ng'walī mutaalī ū kūdūla ū kūshilya, hama nīyo nī haha mutaalī ū kūshidūla.

³ Nguno mutaalī ba nhūngwa ja mīlī; ī gīsī ūlū būlīho wilu na wilemeelwa ū mu bing'we, numho mutī ba nhūngwa ja mīlī, gīt'ūmo balī banhū bangī dūhū?

⁴ Nguno ūlū būlī ng'wene akūhayaga gīkī, “Ū nene nalī wa ng'wa Paulo,” na ūngī, “Ū nene nalī wa ng'wa Apolo;” angū, numho mutī banhū ba nhūngwa ja mīlī ī gīko?

⁵ Ī gīsī ū Apolo ni nani, nū Paulo nang'hwe nani? Tūhaya a benabo batūmami dūhū abo mukazunya mu nzīla yabo, nīyo būlī ng'wene alī na kinhīlwe kakwe kūfuma kūlī Seeba?

⁶ Ū nene nakahamba, ū Apolo wiza kwitīīla minzī, alīyo ū Mulungu hū ng'wene ūyo akajikūjaga ī mbīyū.

⁷ Hū kūhaya ū ng'hambi nū ng'witīīji wa minzī, batī na gwabo ūlū atī Mulungu, ūyo akakūjaga.

⁸ Nguno ū ng'hambi nū ng'witīīji batikīlile; būlī ng'wene akwanukūla mheela yakwe gīt'ūmo galī a matwajo gakwe.

⁹ Hūna lūūlū, a bise tūlī batūmami biye ba ng'wa Mulungu, a bing'we mulī ngūnda gokwe; mulī nzenga ya ng'wa Mulungu.

¹⁰ Ū nene ū mu būdūla bo kinhīlwe ako Mulungu anigabīlile gītī ntaale wa bazengi, nakatūūla nsingi; alīyo ūngī akūzengaga a higūlya yago; nose hū kūhaya būlī ng'wene ūyo akūzengaga a higūlya yago ni ilang'hanage.

¹¹ Nguno atīho nūūlū ūmò ūyo adūgije kūtūūla nsingi gūngī, kūleka ūyo gūtūūlilwe ho na kale; ū nsingi gwenūyo ng'wene Yesu Kilisito.

¹² Hūna lūūlū, ūlū ose ose ūzengela zahabu a ha nsingi gwenūyo, nūūlū feza, nūūlū mawe ga mpango, nūūlū mitī, nūūlū mbelele, nūūlū maswa;

¹³ būlī ng'wene gūkūmanīka ū nīmo gokwe. Nguno ū lūshikū lwenūlo lūkūgoolecha hape, īkī lūkūbiza lo moto. Ū moto hū gwene ūyo gūkoolecha ūmo gūlī gete būlī nīmo go ng'wa munhū.

¹⁴ Munhū ose ose ūlū gūpūlūgūka ū nīmo ūyo alasangwe wagūzengela ho, akwanukūla mheela.

¹⁵ Alīyo ose ose ūyo nīmo gokwe gūkūnogotela akūbiza wajimīīja, ahene ū wei akūpīla; gwike gītī bo kūpūlūgūka kūfuma mu moto!

¹⁶ Bing'we, mutamanile gīkī mulī hekalu ya ng'wa Mulungu, nī gīkī ū Moyo wa ng'wa Mulungu akikalaga mu bing'we?

¹⁷ Ose ose ūyo wīkenaagūla ī hekalu ya ng'wa Mulungu, nang'hwe ū Mulungu akūnkenaagūla ū munhū ng'wenūyo, nguno ī hekalu ya ng'wa Mulungu īlī neela; h'a bing'we.

¹⁸ Atizigela munhū wa kwilemba ng'wenekīlī; ūlū alīho ose ose mu bing'we ūyo akibonaga gīkī alī na masala ū mu shikū īji, ni ibalage kūbiza nchilū chilū, h'abize na masala.

¹⁹ Nguno a masala ga mu sī galī būchilū chilū ū kūlī Mulungu; gīt'ūmo gwandīkilwe gīkī, “Ū wei akabagwashaga a ba masala mu masala gabo;”

²⁰ na hangī gīkī, “Ū Seeba agamanile a maganiko ga ba masala, gīkī gatikīlile na gūdūhū.”

²¹ Nose hū kūhaya gīkī, munhū ose ose atizikumīlīja kūlwa banhū, nguno pyī ī shikolo shilī shing'we;

²² abize Paulo, nūūlū Apolo, nūūlū Kefa, nūūlū sī, nūūlū būpanga. Pyī nī licha, nī shisho shilīho ī haha, nī shisho shikūbiza ho ū mu shikū ja kū būtongi; shose pye shilī shing'we.

²³ Hama a bing'we mulī ba ng'wa Kilisito, ū Kilisito nang'hwe wa ng'wa Mulungu.