1 Bakolinto 15 - Bibilia Ilagano Lya Kale 2015

Būjūūko bo ng'wa Kilisito

¹ Bing'we bang'wise, leki namulanje ī mihayo ya Ng'hūlū Jawiza ījo nakamulomeela ng'ūjanukūla, na ng'wīmīīlile mujo.

² Ū mhayo ūyo nakamulomeela gwenūyo, gūlī gwa kūmupīja ūlū ng'ūgūdima mu welwa ng'holò, numho hamo mubize ng'wazunyaga higūlya gūlya dūhū!

³ Nguno ū mu mihayo mitaale īyo nanukūla ū nene, h'īyo nakandya ū kūng'winha na a bing'we; gīkī ū Kilisito akacha kūlwa shibi shise gīt'ūmo shandīkwa shihayīlile.

⁴ Na gīkī akajīkwa, na gīkī ha lūshikū lo kadatū lwaho ūjūūka gīt'ūmo shandīkwa shihayīlile.

⁵ Na gīkī akang'wilongela Kefa, hūna na a babo ikūmi na babīlī.

⁶ Ha numa ya henaho, ūbilongela na badūgū bakīlile ha magana atanò ng'wikanza līmò. Bamò babo bataalī balīho nī lelo īyī, alīyo a bangī bamala kūlaala.

⁷ Hama ūng'wilongela Yakobo, hūna na a batūng'wa a bose.

⁸ Nose nū nene ūnilongela, nūbiza wa kūmalīja wabo, gītī nalī ndebile mu kūbyalwa.

⁹ Nguno ū nene nalī ndo wa bado ū mu batūng'wa; nīyo natigeleelilwe nūūlū kwitanwa ntūng'wa, nguno nīluhyaga no ī kanisa ya ng'wa Mulungu.

¹⁰ Alīyo kūlwa shigongo sha ng'wa Mulungu nalī gīt'ūmo nalī, hama ī shigongo shakwe ū kūlī nene shitagelelile kūcha mpandagīlo. Nakūtūmamaga kūbatinda pye, gwike nahene natī nene; alīyo shigongo sha ng'wa Mulungu īsho shilī hamò na nene.

¹¹ Hūna lūūlū nūūlū nabize nene nūūlū boi, h'ūmo tūkūlomeelelaga; hama h'ī nguno yene mulī bazunya.

Būjūūko wa bafu

¹² Ī gīsī lūūlū, īkī ū Kilisito akūlomeelagwa gīkī wajūūka kūfuma mu bafu, nibūlī balīho bamò bing'we bakūhayaga būtīho ū būjūūko wa bafu?

¹³ Ūlū būtīho ū būjūūko wa bafu, numho nū Kilisito atajūūkile!

¹⁴ Hama ū Kilisito ūlū atajūūkile, numho nū būlomeeji wise būtī na solobo, hū kūhaya muzunije dalali dūhū.

¹⁵ Hama na a bise numho tukūbiza giti bakaanīji balomolomo ba ng'wa Mulungu; īkī tūkūnkaanīlaga gīkī akanjūūcha ū Kilisito, ūyo gashi nīyo atanjūūkije, ūlū babize batūjūūchiagwa a bafu.

¹⁶ Nguno ūlū batūjūūchiagwa a bafu, numho nū Kilisito atajūūchiwe.

¹⁷ Hama ū Kilisito ūlū atajūūchiwe, būtī na solobo ū būzunya wing'we, hū kūhaya mutaalī mo dūhū ū mu shibi shing'we!

¹⁸ Numho nīyo na a babo bakūchīlaga mulī Kilisito bakūjimīīlaga dūhū.

¹⁹ Ūlū gīkī ū kwisagīlwa kwise ū mulī Kilisito kūgelelile mu būpanga ūbū dūhū, numho a bise hū tūlī ba kūpīnīhalīlwa kūtinda pye a banhū!

Ū Kilisito wajūūka ng'hana

²⁰ Alīyo ī haha, ū gwa ng'hana gūlī gīkī, ū Kilisito wamala kūjūūka kūfuma ū mu bafu, alī Itwajo lya kwandya mu bose abo balaalile.

²¹ Nguno gīt'ūmo kūcha kūkilonga mu nzīla ya ng'wa munhū ūmò, nū būjūūko wa bafu būlīho kūlwa nzīla ya ng'wa Munhū ūmò.

²² Na hangī gīt'ūmo mulī Adamu pye a banhū bakachaaga, h'ūmo īlī nū mulī Kilisito; pye bakwītwa kūbiza bapanga.

²³ Alīyo būlī ng'wene mu kwihela kwakwe; wa kwandya Kilisito, hama a ba ng'wa Kilisito ūlū washoka.

²⁴ Hūna ūlū ūmala ū kūgakenaagūla pye a mabūsugi na a mabūtaale, na a mabūdūla, ū mhayo gwa kūmalīja gūkūbiza kūbūtūūla ū būsugi kūlī Mulungu Sīswe.

²⁵ Nguno shiigelile asuge kūshisha pye a banishi bakwe abatūūle ha sīlīlī ya mhambala jakwe.

²⁶ Ū ng'wanishi wa kūmalīja kūkenaagūlwa ng'wene kūcha.

²⁷ Nguno ū mhayo gūhayile gīkī, “Pyī ī shikolo ashitūūlile ha sīlīlī ya mhambala jakwe.” Alīyo ū mu kūhaya gīkī, “Pyī ī shikolo shitūūlilwe ha sīlīlī yakwe,” īlī hape gīkī ūyo antūūlīlile shikolo shose ha sīlīlī yakwe atī ūmò washo.

²⁸ Hūna lūūlū ūlū shamala kūtūūlwa pyī ī shose ha sīlīlī yakwe, ū Ng'wana nang'hwe akūbiza ha sīlīlī yakwe ūyo antūūlīlile shikolo shose ha sīlīlī yakwe, gīkī ū Mulungu abize atang'anhīlile mu shose.

²⁹ Ūlū ītī chene numho īkūja ginehe ī mihayo ya banhū abo bakabatīījiagwa kūlwa nguno ya bafu? Ūlū batūjūūchiagwa a bafu, nibūlī būbize ho būbatīījiwa kūlwa nguno yabo?

³⁰ Na a bise nibūlī tūlī mu nhabaala ya kūcha būlī ikanza?

³¹ Badūgū bane, ū nene nakūchaaga būlī shikū nguno ya wikumīlīja, ūbo nalī nabo mulī Kilisito Yesu Seeba wise kūlwa nguno ying'we.

³² Ī gīsī, ūlū nakoiagwa būmunhū bone dūhū aho nalwaga na shiinū ja mu Efeso, numho nalī na solobo kī? A bafu ūlū batūjūūchiagwa, “Tūlyagi na tūng'wagi dūhū lūūlū, nguno ī ntondo tūkūcha!”

³³ Bing'we, yaya ū kūlemva lemva; a kashimīzīle kabūbi kakakenaagūlaga nhūngwa.

³⁴ Ilang'hanagi mushimīzīle mu būtūngīlīja, hama yaya ū kwīta ī shibi; nguno balīho bangī bataamanile ū Mulungu. Ū gwenūyū nalīmuwīla namudimye minala.

Mīlī gwa būjūūko

³⁵ Alīyo ūngī ashikile kūbūja gīkī, “A bafu bakūjūūchiwa ginehe? Na hangī bakwiza mu mīlī kī?”

³⁶ Ū wenūbo būbbūūlī! Nguno nūūlū ī mbīyū īyo ūkīhambaga ītabizaga mhanga kūshisha īche tame!

³⁷ Hama nīyo īsho ūkahambaga ūtahambaga mīlī ūyo gūlabize ho, ūkahambaga mbeke dūhū; hamo ya būsīga, nūūlū ya shikolo shingī nasho.

³⁸ Alīyo ū Mulungu akayinhaga mīlī gīt'ūmo atogelilwe wei ng'wenekīlī, nīyo būlī mbīyū na mīlī gwayo.

³⁹ Ī mibīlī ī yose ītī ya mbika īmò, īlīho ya banhū, yīngī ya ndimu, yīngī ya noni, na yīngī ya ndīlo.

⁴⁰ Ūlīho na mibīlī ya ng'wigūlū, na mibīlī ya mu sī. Alīyo ī likūjo lya mibīlī ya ng'wigūlū līlī kīngī, nī likūjo lya mibīlī ya mu sī nalyo līlī kīngī.

⁴¹ Ī likūjo lya līīmi līlī heeke, nī likūjo lya ng'weji līlī heeke, nī lya sonda nalyo līlī heeke; nguno nūūlū ī sonda na sonda dūhū jikīla kīlile ī likūjo.

⁴² H'ūmo būlī nū būjūūko wa bafu, ū mīlī ūyo gūkahambagwa gūlī gwa kūkenaagūka, ūyo gūkūjūūchiwa gūtī gwa kūkenaagūka.

⁴³ Gūkahambagwa mu būdalahwa, gūkūjūūchiwa ng'wikūjo; gūkahambagwa mu būgokolo, gūkūjūūchiwa mu būdūla.

⁴⁴ Ūyo gūkajīkagwa gūlī mīlī dūhū, alīyo gūkūjūūchiwa mīlī gwa Kiimoyo; ūlū gūlīho ū mīlī gwa nyama, nū mīlī gwa Kiimoyo gūlīho.

⁴⁵ H'ūmo gwandīkilwe nīyo; gīkī, “Ū munhū wa kwandya ū Adamu, akabiza mpanga.” Ū Adamu wa kūmalīja ng'wene alī Moyo, ng'winhi wa būpanga.

⁴⁶ Gwike ū wa Kiimoyo walī atī wa kwandya, alīyo ū wa mīlī gwa nyama; hūna wiza nū wa Kiimoyo.

⁴⁷ Ū munhū wa kwandya afumile mu sī, wa malongo; ū Munhū wa kabīlī ng'wene afumile ng'wigūlū.

⁴⁸ Ūmo alī ū wa mu sī, h'ūmo balī a ba mu sī, nū mumo alī ū wa ng'wigūlū, h'ūmo balī a ba ng'wigūlū.

⁴⁹ Nīyo ūmo twīsolela ī suso yakwe ū munhū wa mu sī, h'ūmo tūkwīsolela nī suso yakwe ū wa ng'wigūlū.

⁵⁰ Ū mhayo ūyo nalīgūhaya bang'wise gūlī gīkī, ū mīlī na a mininga shitūdūla ū kūbiza na wingīji ū mu būtemi bo ng'wa Mulungu, nūūlū ū būkenaagūku būtūdūla ū kūbiza na wingīji hamò na būtūkenaagūka.

⁵¹ Leki namugodele kaka kamhayo ka mbisīla, gīkī, tūtūshila kūcha pye a bose, alīyo pyī tūkūgalūchiwa.

⁵² Ūkūbiza ng'wikanza iguhī gītī lya kūgabbya ngohe, h'ikanza ly'ipembe lya kūmalīja. Nguno ipembe līkūlīla, hūna a bafu bakūhimbukila mu būtūkenaagūka, a bise nise tūkūgalūchiwa.

⁵³ Nguno ū mīlī gwa kūkenaagūka gwenūyū shiigelile gūzwale būtūkenaagūka, ū gwa kūcha gwenūyū gūzwale būtūūcha.

⁵⁴ Hūna lūūlū ū mīlī gwa kūkenaagūka gwenūyū ūlū gūzwala būtūkenaagūka, ū gwa kūcha gwenūyū gūbiza gwazwala būtūcha, a henaho gūkūbiza gwashikīīla ū mhayo ūyo gwandīkilwe gīkī, “Ū lūfu lwamilagwa na būpyeni.

⁵⁵ Bebe muna kūcha būlī halī ū būpyeni wako? Bebe lūfu lūlī halī ū lūboola lwako?”

⁵⁶ Ū lūboola lwa lūfu lūlī shibi, hama ū būdūla bo shibi būlī mu shilagīlo.

⁵⁷ Alīyo akumīlījiwe ū Mulungu, ūyo akatwinhaga būtindi mulī Seeba wise Yesu Kilisito.

⁵⁸ Hūna lūūlū bang'wise, batogwa bane; īmīīlagi muhandatīle, yaya ū kūtinginyiwa. Gūtūmamagi gwa gwa gwa ū nīmo go ng'wa Seeba, nīyo komeelagi no no no; managi gīkī ū būnoge wing'we būtī bo dalali ū kūlī Seeba.