1 Bakolinto 13 - Bibilia Ilagano Lya Kale 2015

Būtogwa bo ng'hana ūmo būlī

¹ Nūūlū nakadūla kūlūngalūnga mu ndīmi ja banhū na ja bamalaika, alīyo ūlū natī na būtogwa, nakūbiza gītī shisīnza shikūyoganyaga, nūūlū gītī kazīnzīlī īkūtūlagwa.

² Nūūlū nakabiza na būdūla bo kūhanga, nūūlū kwitegeleja mbika jose ja mbisīla, hama nūbiza na būmani bose hamò na kūzunya ūko kūdūgije kūsaamya na ngūlū; alīyo ūlū natī na būtogwa, ū nene natī na fiilū!

³ Nūūlū nakagabanhya bahabī pyī ī shikolo shane īsho nalī nasho, nifunya na gīkī ū mīlī gone gūpemve mu moto; alīyo nahene ūlū natī na būtogwa natīko kūpandīka solobo yose yose!

⁴ Ū būtogwa būkiyūmīlījaga, būlī na shigongo, būtī na wilu, būtikumīlījaga, būtī būdooshi,

⁵ būtabeejaga yabūbi, būtikoobelaga shikolo shabo dūhū, būtasaayaga, būtadimīīlaga yabūbi,

⁶ būtayegelaga mu būkenaagūji. Alīyo būkayegaga hamò na yabūtūngīlīja,

⁷ būkagunanhaga mu yose, būkasanyaga gwa gwa gwa, būkiyūmīlījaga mu yose.

⁸ Ū būtogwa būtalebaga na hado yaya; alīyo nūūlū ni būhangi būkūshila ho, nū būlūngalūngi mu ndīmi jingī nabo būkūshila, pyī nū būmani būkūshila ho.

⁹ Nguno ī haha ū witegeleja wise būlī būnagī, pyī nū būhangi tūkafunyaga mu būnagī gīko dūhū.

¹⁰ Alīyo ūlū yūshika ī mishikanu, īkūshila ho ī ya būnagī yenīyī.

¹¹ Aho naalī nataalī nīgīnī nayombaga nyanīgīnī, niganikaga nyanīgīnī, nitegelejaga nyanīgīnī; alīyo aho nakūla nūlekana nayo ī mihayo ya nyanīgīnī.

¹² Nguno ī haha tūkūbonaga ī chene, alīyo gītī ng'wilole; būlīho wiija, gwike ī likanza lyenīlo īkūbiza būshū kū būshū. Ī haha ū būmani bone būlī būnagī, alīyo ī likanza lyenīlo nakūmana gīt'ūmo namanīlilwe nū nene.

¹³ Hūna lūūlū ī haha ī mihayo īyo īsaagile ho īlī kūzunya, kwisagīlwa, na būtogwa; idatū yenīyo, gwike ū ntaale kūtinda yose gūlī būtogwa.