Yuda 1 - Ilagano Ipya Lya

Ya kubagisha

¹ Yuda, nsese wa ngʼwa Yesu Kristo, na ngʼwana wa ngʼwabo wa Yakobo ku benabo ablitanwa, abo Mulungu Siswe waabatogwa, na abalindwa muli Yesu Kristo:

² Kuchila kigongo na mhola na butogwa shongejiwe ku bingʼwe.

Mbuki ya nyaluba iyi, bugomi mu bazunya

³ Batogwa, aho nali nukomela ngʼkwandikila mihayo ya bupiji wiswe wa bose, nuhadikijiwa kungʼwandikila kumukomeleja giki, Muhalalililage kuzunya uko binhwa bela lukangala lumo duhu.

⁴ Iki bali ho banhu bamo abali bigungunika mu kwigeniha, abstuulilwa ho kale nsango uyu, banhu abatungʼogoha Mulungu, bakugaluchaga kigongo cha Mulungu kubiza wimilizu, hangi bakunemaga Seba Mulungu umo wike, Seba wiswe Yesu Kristo.

Nsango ugubiza ho kale ku bagomi

⁵ Hangi natogihve kungʼwizukija bingʼwe, nulu ngʼwimanile iyi yose giki, Seba aho wamala kubapija banhu kufuma mu si ya Misri, hanuma ubayigaja abali batuzunya.

⁶ Na bamalaika abali batulinda kitungilwe chabo cha kwandia, anyo buleka wikalo wa bo, abo waabalindikija ann minyololo itushila mugati ya giti, kushisha nsango gwa lushiku lwenu to lutale.

⁷ Hangi gitumo Sodoma na Gomora, i na mizengo iyipindiligije ho, abo abali bulondela bujingi mu nhungwa imo giti boi, bulondela mili ngeni uguti gwa bufumanwa, batuulwa ho kubiza kalelelo, bakinhwa nsango gwa motp gutushila.

Balangi bagomi gihono bali

⁸ Giko na benabo baloti ba malofu bagusosohaja mili, hangi bubadalaha basugi, bubaduka ba ikujo,

⁹ Aliyo Mikaeli, malaika ntale aho wali wilwisha na Shetani na kwihalalija nanghwe kulwa mili gwa ngʼwa Musa, walatagimile kungʼwila nsango gwa kunduka, aliyo akahaya giki, Seba akuhame.

¹⁰ Aliyo abo bakuyidukaga ku mihayo iyo batayimanile: aliyo mihaye iyo bimanile mu kitungilwe cha mili, giti ndimu ijiti na masala, mu yeniyo bikenagulila benekele.

¹¹ Basangwa benabo! iki buyidima nzila ya ngʼwa Kaini, na buhahala kutendela buhubi wa ngʼwa Balaamu kulwa mhela, na buyagala mu bugomi wa ngʼwa Kora.

¹² Banhu benaba bali shiganga shibisile mu bukombe wingʼwe wa butogwa aho bakulyaga hamo ningʼwe, abilisha benekele bati na boba; bali malunde agati na minzi agutwalanijiwa na miyaga; bali miti miyuguku iyiti na matwajo, iyacha nghangala ibili, iyadubulwa gete;

¹³ Bali mahuli makali ga nyanza agalitunda ifulo, lyene minala yabo; bali masonda agayelayela, abo abibikilile giiti cha gamha kushisha welelo na welelo.

¹⁴ Na Enoka, u wa mpungati kufuma mu kibyalilwe cha ngʼwa Adamu, nanghwe ubahanga benaba, uhaya giki, Lolagi, Seba izile na bela bakwe 10,000 na 10,000,

¹⁵ Kubalekanya nsango bose, na kubakanilija bahunga bose kulwa Shitwa shabo isho bali bita na kungʼogoha Mulungu yaya, na kulwa mihayo milambu yose yeniyo ba shibi benabo abatangʼogohaga Mulungu banungalungila.

¹⁶ Banhu benaba bali badugumi, bilijaliji, bakushiminzilaga mu kwikumva kwabo; na milomo yabo ikulungalungaga mihayo mitale ya kidoshi, bubabeleleka banhu ikujo kulwa nguno ya solobo.

¹⁷ Aliyo bingʼwe batogwa, izukagwi mihayo iyaahayiwa kwandia na batungʼwa ba Seba wiswe Yesu Kristo;

¹⁸ Iyo bumuwila giki, ku shiku ja nghalilo balabiza ho badalahi, balondeji ba kwikumva kwabo ukuti mu nzila ya Mulungu.

¹⁹ Banhu benabo bisolanya, ba si iyi duhu, bati na Moyo Ngʼwela.

Iyo ya kubadimya bazunya gete

²⁰ Aliyo bingʼwe batogwa, izenjagi mu kuzunya kwingʼwe kwela, lombagi mu Moyo Ngʼwela,

²¹ Ilindagi mu butogwa wa Mulungu, mulindilile kuchila kigongo kwa Seba wiswe Yesu Kristo kushisha ku bupanga butushila.

²² Bangi mubachile kigongo, abo abalitawatawa;

²³ Aliyo bangi bapijagi mubapule mu moto; na bangi mubachile kigongo na kogoha, mukolwe nulu shizwalo ishasosohajiwa na mili.

²⁴ Haha kuli Uyo uwadula kumubalada bingʼwe mutizigumha, na kungʼwimilija muti na kilingo mu butongi wa ikujo lyakwe na buyegi butale,

²⁵ Kuli Mulungu umo wike wa masala, Mpija wiswe, Ubize ho ikujo, na butale, na budula, na nguzu muli Yesu Kristo Seba wiswe kufuma welelo, na haha, na kushisha welelo na welelo. Amina.