Yohana 9 - Ilagano Ipya Lya

Munhu uwali ubyalwa moku upijiwa

¹ Aho ubyubita umona munhu moku kufuma kubyalwa kwakwe.

² Bahemba bakwe bumuja buhaya giki, Rabbi, nani wali wita shibi, ngʼwenuyu, nulu babyaji bakwe, nose ubyalwa moku?

³ Yesu ushosha giki, Nulu ngʼwenuyu walatitile shibi, nulu babyaji bakwe; aliyo shitile sha Mulungu sholechiwe muli wei.

⁴ Shinigelile Nene kwita milimo ya Ngʼwenuyu uwaanituma, aho litali limi, bujiku buliza, hunaho ati ho munhu wadula kwita milimo.

⁵ Aho natali ndi mu si, Nene ndi isana lya ba mu si.

⁶ Aho umala kuhaya giko, uswila mate ha si, wita malongo na mate genayo, umila moku ku miso na malongo,

⁷ Ungʼwila giki, Jaga, ukoge ngʼwilambo lya Siloamu (kushomelejiwa kwaho giki, watungʼwa). Uja lulu, oga, ushoka akubonaga.

⁸ Hunaho bazenganwa biye nabo abubyumona na kale giki, walali moku, buhaya giki, Angu, uyu ati ngʼwenuyo uwali wigashije, wilombeleja?

⁹ Bangi buhaya giki, Huna ngʼwene; bangi giki, wiyikolile nanghwe, Nose wei ngʼwenekele uhaya giki, Nene ndi ngʼwene.

¹⁰ Kulwa iyo bungʼwila giki, Miso gako gafumbulagwa kinahe?

¹¹ Ushosha uhaya giki, Munhu uyo akitanagwa Yesu wali wita malongo, unibila miso gane, uniwila giki, Jaga kwilambo lya Siloamu, ukoge; nuja, noga, ninhiwa kubona.

¹² Hunaho bungʼwila giki, Ali hali Ngʼwenuyo? Uhaya giki, Natamanile.

¹³ Bali buntwala ku Bafarisayo uyo walali moku kale.

¹⁴ Lwali luli Sabato aho Yesu wali wita malongo, na umfumbula miso gakwe.

¹⁵ Kulwa iyo Bafarisayo bumuja hangi umo wali winhiwa kubona. Nanghwe ubawila giki, Wali watuula malongo ku miso gane, nukoga, nane nakubonaga.

¹⁶ Kulwa iyo bamo ba mu Bafarisayo buhaya giki, Munhu Ngʼwenuyu atafumile kuli Mulungu, iki atudimaga Sabato. Bangi buhaya giki, Munhu ali na shibi wadula kwita shimanikijo giti shenishi? Hunaho kubiza ho kulekana mubo.

¹⁷ Bungʼwila moku hangi giki, Bebe ukunghayaga kinahe, iki wakufumbulaga miso gako? Nanghwe uhaya giki, Ali nghangi.

¹⁸ Bayudaya bali batunzuya mihayo yakwe giki, walali moku kale na winhiwa kubona hangi, kushisha aho bali bubitana babyaji ba ngʼwenuyo winhiwagwa kubona.

¹⁹ Bubabuja buhaya giki, Angu, uyu ali ngʼwana wingʼwe, uyo bingʼwe mukanghayaga giki, wali ubyalwa moku? Akubonaga kinahe lulu?

²⁰ Babyaji bakwe bubashokeja buhaya giki, Tumanile giki, ngʼwenuyu ali ngʼwana wiswe, hangi giki, wali ubyalwa moku;

²¹ Aliyo umo akubonaga hambunyu, tutumanaga yaya; nulu munhu uyo wamfumbulaga miso gakwe tutamanile; mujagi wei, ngʼwene akulile; ahaye ngʼwenekele mihayo yakwe.

²² Babyaji bakwe buhaya mihayo iyi iki bubogoha Bayudaya; iki Bayudaya bali bumala kulonja mihayo giki, Munhu ose ulu utambula giki, Ali Kristo, apejiwe ngʼwibilingilo.

²³ Kulwa mhayo uyo babyaji bakwe buhaya giki, Ngʼwene akulile, mujagi ngʼwenekele.

²⁴ Hunaho bungʼwitana lukangala lwa kabili munhu uyo walali moku, bungʼwila giki, Ngʼwinhage ikujo Mulungu; tumanile giki, Munhu Ngʼwenuyo ali wa shibi.

²⁵ Ngʼwenuyo ushosha uhaya giki, Ulu Uyo ali wa shibi natamanile nene; mhayo gumo nagumanile giki, Nali nali moku, hambunyu nakubonaga.

²⁶ Bungʼwila hangi giki, Wali wakwitila ki? hangi giki, Wakufumbulaga miso gako kinahe?

²⁷ Ubashokeja giki, Namala kumuwila haha, ningʼwe mutigwile: Mutogilwe kwigwa hangi ni buli? Bingʼwe hangi mutogilwe kubiza bahemba bakwe?

²⁸ Bungʼolomya lulu, buhaya giki, Bebe uli nghemba wa Ngʼwenuyo; biswe tuli bahemba ba ngʼwa Musa.

²⁹ Biswe tumanile giki, Mulungu waalungalungaga na Musa; aliyo Ngʼwenuyu, tutamanile uko afumile.

³⁰ Munhu ngʼwenuyo ushosha ubawila giki, Niyo, mhayo gwenuyu guli gwa kukumya, iki bingʼwe mutamanile uko afumile, nahene, wafumbulaga miso gane.

³¹ Tumanile giki, Mulungu atabigwaga a ba shibi; aliyo munhu ose ulu ubiza angʼogohile Mulungu, hangi akitaga iyo Mulungu atogilwe, u ngʼwene akungʼwigwaga.

³² Kufuma kwandia kwa si itali kwigwiwa giki, Munhu nulu umo wafumbulaga miso ga munhu uwabyalwa moku.

³³ Munhu Ngʼwenuyu ulu ni atafumile kuli Mulungu, ni atudula kwita mhayo.

³⁴ Bushosha bungʼwila giki, Bebe wali ubyalwa mu shibi duhu, nangho wabyutulanga biswe? Bumfunya hanze lulu.

³⁵ Yesu wali wigwa giki, Bumfunya hanze; nanghwe aho umona, ungʼwila giki, Bebe ukunzunyaga Ngʼwana wa Mulungu?

³⁶ Nanghwe ushosha uhaya giki, Ali Nani, Seba nanzunye?

³⁷ Yesu ungʼwila giki, Uyo wamonaga, hangi Uyu akulungalungaga nangho, hu na Ngʼwene.

³⁸ Uhaya giki, Seba, nazunya. Unamya lulu.

³⁹ Nanghwe Yesu uhaya giki, Kulwa kulekanya nizile mu si iyi, abatabonaga babone; nabo abakabonaga bagaluke kubiza baboku.

⁴⁰ Bafarisayo bamo abali bali hamo nanghwe bali bigwa mihayo iyi, huna bungʼwila giki, Angu, na biswe tuli baboku?

⁴¹ Yesu ubawila giki, Ulu ni muli baboku, ni muti na shibi, aliyo hambunyu mulihaya giki, Tukubonaga, kulwa iyo shibi shingʼwe shikwikalaga ho.