Yohana 7 - Ilagano Ipya Lya

Bana ba ngʼwawe bungʼwila imaniche hape

¹ Hanuma ya mihayo iyi Yesu ubyushiminza mu Galilaya; iki walatatogilwe kushiminza mu Buyudaya, iki Bayudaya bubyunkoba kumulaga.

² Lushiku lutale lwa Bayudaya u lwa maduku lwali luli hihi kushika.

³ Huna lulu bana ba ngʼwawe bungʼwila giki, Ingaga henaha, uje mu Buyudaya, bahemba bako nabo babone shitile shako isho ukwitaga.

⁴ Iki ati ho munhu uyo akitaga mihayo mu mbisila, nanghwe ngʼwenekele ukoba kumanika hape. Bebe, ulu ukwitaga mihayo iyi, wiyoleche ngʼwenekele hape ku ba mu si.

⁵ Iki nulu bana ba ngʼwawe bali batanzunije.

⁶ Hunaho Yesu ubawila giki, Ikanza lyane litali kushika; aliyo ikanza lyingʼwe limalilile gwa.

⁷ Ba mu si batudula kumukolwa bingʼwe, aliyo Nene banikolwa, iki Nene nakubakanilijaga giki, Shitwa shabo shene sha bubi.

⁸ Linhagi bingʼwe kuja ku lushiku lutale. Nene natali kumalila kulinha kuja ku lushiku lutale ulu, iki ikanza lyane litali kushikilijiwa.

⁹ Aho wamala kubawila mihayo iyi, wikala mu Galilaya.

¹⁰ Aliyo bana ba ngʼwawe aho bumala kulinha kuja ku lushiku lutale, nanghwe ulinha lulu, iti hape yaya, aliyo giti mu mbisila.

¹¹ Hunaho Bayudaya bubyunkobakoba mu lushiku lutale, buhaya giki, Ngʼwenuyo ali hali?

¹² Kwali hubiza ho kuduguma kwingi mu mabita kulwa nguno yakwe, bangi buhaya giki, Ali wa wiza; bangi buhaya giki, Yaya, aliyo akulilembalembaga ibita.

¹³ Aliyo walati ho munhu uwali unghaya hape, ku nguno ya kubogoha Bayudaya.

Yesu uja ku libilinga lya maduku

¹⁴ Aho yushika hagati ya lushiku lutale, Yesu ulinha, wingila mu hekalu, ubyulanga.

¹⁵ Bayudaya bukumya, buhaya giki, Ngʼwenuyu amanile kinahe Shandikwa; iki atalangilwe?

¹⁶ Yesu ubashokeja uhaya giki, Kulanga kwane kuti kwane, aliyo kwa Ngʼwenuyo uwaanituma.

¹⁷ Munhu ose ulu utogwa kwita iyo atogilwe Ngʼwenuyo, akukumana kulanga kwenuku, ulu kuli kwa Mulungu, nulu ulu Nene Bakulungalungaga i yane ngʼwenekele.

¹⁸ Uyo akulungalungaga yakwe ya ngʼwenekele, akukobaga ikujo lyakwe lya ngʼwenekele; aliyo Uyo akukobaga ikujo lya Ngʼwenuyo uwaantuma, Ngʼwene ali wa nghana, na butibutungilija buti mo muli Wei.

¹⁹ Angu, Musa walatangʼwinhile bingʼwe shilagilo? aliyo ati ho umo wa mu bingʼwe akwitaga shilagilo. Mukutobaga kunibulaga ni buli?

²⁰ Banhu bushosha buhaya giki, Bebe uli nalyo isamva; nani akukobaga kukubulaga?

²¹ Yesu ushosha ubawila giki, Nali nita nimo gumo, ningʼwe bose mulikumya.

²² Kulwa nguno iyi Musa wali ungʼwinha kusalwa; (kuti kwa ngʼwa Musa nghana, aliyo kwa bakulugenji); na ha Sabato mukunsalaga munhu.

²³ Munhu ulu usalwa ha Sabato, shilagilo sha ngʼwa Musa shitizukilanyiwa; ni buli mulinipelanilwa iki nampijaga munhu kubiza mpanga nghana ha Sabato?

²⁴ Mutalekanyage nsango gitumo mukubonaga na miso, aliyo mulekanye nsango gwa butungilija.

²⁵ Hunaho bamo ba mu Yerusalemi buhaya giki, Uyo bakunkobaga kumulaga, angu, ati Ngʼwenuyu?

²⁶ Lola, akulungalungaga hape, na batungʼwilaga mhayo. Hamo a batale bamanaga nghana giki, Ngʼwenuyu ali Kristo?

²⁷ Aliyo Ngʼwenuyu tumanile mfumo yakwe; aliyo Kristo ulu aliza, ati ho munhu amanile mfumo yakwe.

²⁸ Kulwa iyo Yesu uhamuka mu hekalu, ubyulanga na uhaya giki, Nene munimanile, hangi mfumo yane mumanile; hangi Nene natizile kulwane ngʼwenekele, aliyo Uyo waanituma ali wa nghana, Ngʼwenuyo bingʼwe mutamanile.

²⁹ Aliyo Nene namanile Wei iki nantuma kuli Wei, nanghwe waanituma.

³⁰ Kulwa iyo bukoba kundima, aliyo walatilonga ho wa kutama nkono gwakwe kundima, iki ikanza lyakwe lyali litali kwiza.

³¹ Aliyo banhu bingi ba ngʼwibita bunzunya, buhaya giki, U Kristo, aho alizaga, angu, alita shimanikijo shingi sha kutinda ishi Ngʼwenuyu walushitaga?

³² Bafarisayo bali bigwa banhu ba ngʼwibita bubyuduguma mihayo iyi kulwakwe; hunaho Bafarisayo na Bagabiji batale bubatuma bashilikale kundima.

³³ Hunaho Yesu uhaya giki, Kasaga ho kakanza kado ndi hamo ningʼwe, huna lulu nakuja kuli Uyo waanituma.

³⁴ Mulanikoba, aliyo mutalanibona; hangi aho ndi Nene bingʼwe mutudula kwiza ko.

³⁵ Hunaho Bayudaya bilunjalunja benekele na benekele giki, Ngʼwenuyu alihaya kuja hali, uko biswe tutalamona? Alihaya kuja ku abo babalasanile mu Bagriki, abalange Bagriki?

³⁶ Mhayo gwenuyo waluguhayaga guli kinahe giki, Mulanikoba, aliyo mutalanibona; hangi giki, Aho ndi Nene bingʼwe mutudula kwiza ko?

Yesu unghaya Moyo Ngʼuela gitumo alabiza mu bazunya

³⁷ Aliyo ku lushiku lwa kumalija, u lutale lwa kwibilinga, Yesu wimila, uhamuka higulya, uhaya giki, Munhu ose ulu ukolwa nota, ize kuli Nene angʼwe.

³⁸ Uyo wanizunya Nene, gitumo Shandikwa shuhaya giki, Miongo ya minzi mapanga ikusela kufuma mu nda yakwe.

³⁹ (Mhayo uyu wali uguhaya gwa Moyo Ngʼwela Uyo bali buhaya kwanukula abanzunya Wei; iki Moyo Ngʼwela walatali kubiza ho; iki Yesu walatali kukujiwa.)

⁴⁰ Bamo ba ngʼwibita aho bali bigwa mihayo iyi, buhaya giki, Ngʼwenuyu, nghana, ali nghangi uyo.

⁴¹ Bangi buhaya giki, Ngʼwenuyu ali Kristo. Aliyo bamo buhaya giki, Angu, Kristo akufuma mu Galilaya?

⁴² Angu, Shandikwa shitahayile giki, Kristo alafuma mu bubyile wa ngʼwa Daudi, hangi mu Bethlehemu, igunguli ilo umo walali Daudi?

⁴³ Giko hubiza ho kulekana ngʼwibita kulwa nguno yakwe.

⁴⁴ Bamo mubo bali batogilwe kundima, aliyo walatilonga ho wa kutama makono gakwe kundima.

⁴⁵ Huna lulu bashilikale bushoka ku bagabiji batale na Bafarisayo; nabo bubawila giki, Mutangʼwenhile ni buli?

⁴⁶ Bashilikale bushosha giki, Munhu atali kulungalunga na kamo gitumo munhu Ngʼwenuyu akulungalungaga.

⁴⁷ Hunaho Bafarisayo bubashokeja giki, Na bingʼwe hangi ngʼwalembalembagwa?

⁴⁸ Ali ho ntale nani uyo wanzunije, nulu wa mu Bafarisayo?

⁴⁹ Aliyo ibita lyenili, banhu abatamanile shilagilo, bene bazungʼwa.

⁵⁰ Nikodemo, (uyo wali wiza kuli Wei bujiku, ngʼwene umo wabo,) ubawila giki,

⁵¹ Angu, shilagilo shiswe shikunekanyaga nsango munhu, aho atali kwigwiwa mihayo yakwe tame, nulu itali kumanwa iyo akwitaga?

⁵² Bushosha bungʼwila giki, U bebe nangho wafuma Galilaya? Kobaga ubone giki, Munhu nghangi atubuka mu Galilaya.

⁵³ Nabo bali buja buli munhu ku kaya yakwe.