Yohana 5 - Ilagano Ipya Lya

Munhu upijiwa kwilambo lya Bethesda

¹ Hanuma ya mihayo iyi lwali lubiza ho lushiku lutale lwa Bayudaya; na Yesu ulinha kuja Yerusalemi.

² Mu Yerusalemi hihi na mita gwa ngholo, lili ho ilambo likitanagwa mu Kihebrania giki, Bethesda, nalyo lili na mabindo atano.

³ Mu mabindo genaya bubyulala mo banhu bingi abasatile, baboku, balema, na buma buhama, bakulindilaga kusibuka kwa minzi.

⁴ Iki nghangala ningi malaika wiikaga ngʼwilambo, ugasagaja a minzi. Huna lulu uyo wingila kwandia hanuma ya kusagajiwa kwa minzi, ngʼwene upila u busatu wakwe bose ubo walasatile.

⁵ Kwenuko walali ho munhu waasataga miaka makumi adatu na inane.

⁶ Aho Yesu wali umona ngʼwenuyo alalile, hangi umana giki, wabile giko miaka mingi, ungʼwila giki, Utogilwe kubiza mpanga?

⁷ Nsatu unshokeja giki, Seba, nati na munhu wa kunituula ngʼwilambo aho minzi gasagajiwa; aliyo nene aho natali niza, ungi unishigila kwika mo.

⁸ Yesu ungʼwila giki, Bukaga bubuchage bulili wako, ushiminze.

⁹ Haho na haho munhu ngʼwenuyo ubiza mpanga, ububucha bulili wakwe, ushiminza; aliyo lushiku lwenulo lwali luli Sabato.

¹⁰ Kulwa iyo Bayudaya bungʼwila uyo wamala kupijiwa giki, Lelo ili Sabato, chene cha ngilo bebe kubucha bulili wako.

¹¹ Nanghwe ubashokeja giki, Uyo wanipijaga, Ngʼwene wali waniwila giki, Buchaga bulili wako, ushiminze.

¹² Huna lulu bumuja giki, Munhu Uyo wali wakuwila giki, Buchaga bulili wako, ushiminze, ali nani?

¹³ Aliyo uyo upijiwa walatamanile ni nani; iki Yesu wali ubihunga, iki ngʼwipande ilo bali bali ho banhu bingi.

¹⁴ Hanuma ya mihayo iyi Yesu unsanga mu hekalu, ungʼwila giki, Lolaga, haha wabizaga mpanga, utalizita shibi hangi, mhayo gwa bubi kutinda gutizukupandika.

¹⁵ Munhu uyu uja, ubawila Bayudaya giki, Yesu u Ngʼwene waanipija.

¹⁶ Kulwa nguno iyi Bayudaya bubyunyajanyaja Yesu, bukoba kumulaga, iki wali wita mihayo iyi ha Sabato.

¹⁷ Aliyo Yesu ubashokeja giki, Baba wane akwitaga milimo kushisha haha, na Nene nakwitaga milimo.

¹⁸ Kulwa nguno yeniyi Bayudaya bongeja kukoba kumulaga, iki walatakenagulile Sabato gwike, aliyo hangi giki, wali wangʼwitana Mulungu giki, Ise gete, wilenganija ngʼwenekele na Mulungu.

¹⁹ Huna lulu Yesu ushosha ubawila giki, Nghana, nghana, namuwila giki, Ngʼwana wiyene atudula kwita mhayo, ulu iti iyo alimona Ise akwitaga; iki iyo yose akitaga Wei, yeniyo nu Ngʼwana nanghwe akwitaga chene.

²⁰ Iki Baba antogilwe Ngʼwana, hangi akungʼolekejaga yose iyo akwitaga Wei ngʼwenekele; hangi akungʼolekeja milimo mitale ya kutinda iyi, bingʼwe mukumye.

²¹ Iki gitumo Baba akabajuchaga bafu, ubinha bupanga, giko hangi nu Ngʼwana akubinhaga bupanga abo atogilwe.

²² Iki Baba atunekanya munhu nulu umo nsango, aliyo waangʼwinha Ngʼwana kulekanya misango yose;

²³ Bose bankuje Ngʼwana, gitumo bakankugijaga Baba. Uyo atunkujaga Ngʼwana, atunkujaga Ise Uyo waantuma.

²⁴ Nghana, nghana, namuwila giki, Uyo wagwigwa mhayo gwane, na unzunya Uyo waanituma, ali na bupanga butushila, nulu atalingila mu kulekanyiwa nsango, aliyo wabitaga kwinga mu kucha kushika mu bupanga.

²⁵ Nghana, nghana, namuwila giki, Ikanza likwizaga, hangi haha yeniyi lili ho, aho bafu bakwigwa mo ilaka lya Ngʼwana wa Mulungu, nabo abalamala kwigwa bakubiza bapanga.

²⁶ Iki gitumo Baba ali na bupanga muli Wei ngʼwenekele, giko hangi waangʼwinha nu Ngʼwana kubiza na bupanga muli Wei ngʼwenekele;

²⁷ Waangʼwinha na budula wa kulekanya nsango, iki ali Ngʼwana wa munhu.

Kujuchiwa kwa ba wiza na ba bubi

²⁸ Mutizukumya mhayo uyu; ikanza likwizaga aho bose abali mu mashigila bakwigwa ilaka lyakwe,

²⁹ Nabo bakufuma moi, abo biitaga ya wiza bakujukila mu bupanga; na benabo biitaga ya bubi, bakujukila mu nsango.

³⁰ Nene niyene natudula kwita mhayo: gitumo nakwigwilaga, giko nalekanya nsango; na kulekanya kwane kwene kwa butungilija: iki natakobaga iyo natogilwe Nene, aliyo iyo atogilwe Baba uwaanituma.

³¹ Nene ulu nikanila ngʼwenekele, bukaniji wane buti wa nghana.

³² Ali ho ungi uyo akunikanilaga; na Nene namanile giki, bukaniji ubo akunikanilaga Nene buli wa nghana.

Bukaniji wa kuli Yesu (1) Wa Yohana Matija

³³ Bingʼwe ngʼwamala kutuma banhu kuli Yohana, nanghwe wamala kukanila iyo ill ya nghana.

³⁴ Aliyo Nene natanukulaga bukaniji kufuma ku banhu; aliyo nuhaya mihayo iyi giki, bingʼwe mupijiwe.

³⁵ Ngʼwenuyo walali tala iyubaka na yaka, na bingʼwe ngʼwali ngʼwatogwa kuyegela ngʼwisana lyakwe kakanza kado.

(2) Wa Shitwa shakwe

³⁶ Aliyo Nene ndi nabo bukaniji butale kutinda wa ngʼwa Yohana: iki milimo iyo Baba waaninha giki, nayimalije, milimo iyo nakwitaga Nene, yeniyo yenekele yunikanila giki, Baba waanituma.

(3) Wa ngʼwa Ise

³⁷ Nu Baba Uyo waanituma, Wei ngʼwenekele wamala kunikanila. Bingʼwe mutinigwa ilaka lyakwe nulu kamo yaya, nulu mutinibona suso yakwe.

³⁸ Na bingʼwe muti nago mhayo gwakwe gukwikalaga mu bingʼwe: iki mutunzunyaga Ngʼwenuyo Wei waantuma.

(4) Wa Shandikwa (Lk. 24.27, 44-46)

³⁹ Mukakobaga mu Shandikwa, iki mukiganikaga giki, muli na bupanga butushila musho, na shenisho i shene shunikanila Nene;

⁴⁰ Nulu mutatogilwe kwiza kuli Nene, mubize na bupanga.

⁴¹ Natanukulaga ikujo kufuma ku banhu.

⁴² Aliyo namumanile giki, muti na butogwa wa Mulungu mu bingʼwe.

⁴³ Nene nizile mu lina lya ngʼwa Baba, na bingʼwe mutunanukula; ungi ulu wiza mu lina lyakwe ngʼwenekele, ngʼwenuyo mulangʼwanukula.

⁴⁴ Ngʼwadula kinahe kuzunya bingʼwe, abo mukwiyanukulaga ikujo benekele na benekele, na ikujo ilyufuma kuli Mulungu ali umo wike, lyene mutukobaga.

⁴⁵ Mutiziganika giki, Nene nakumubula kuli Baba: ali ho uyo akumubulaga, ngʼwene Musa, muli ngʼwenuyo mukwisagilagwa.

⁴⁶ Iki ulu ni ngʼwali ngʼwanzunya Musa, na Nene ni ngʼwali ngʼwanizunya; iki wei waandika ya kuli Nene.

⁴⁷ Aliyo ulu mutuzunya Shandikwa shakwe, mukuzunya kinahe mihayo yane?