Yohana 4 - Ilagano Ipya Lya

Yesu uja Galilaya

¹ Huna lulu Seba iki wali umana giki, Bafarisayo bigwile giki, Akwitaga hangi akubatijaga bahemba bingi kutinda Yohana,

² (Nahene Yesu ngʼwenekele atubatijaga, aliyo bahemba bakwe),

³ Winga mu Buyudaya, uja Galilaya hangi.

⁴ Shingʼwigelelilwe Wei kubita mugati ya Samaria.

⁵ Ushika nose ku nzengo gwa Samaria, gukitanagwa Sukari, hihi na ngunda uyo Yakobo akangʼwinha ngʼwana wakwe Yusufu.

Yesu na nkima muna Samaria

⁶ Kwenuko lwali luli ho lwinzi lwa ngʼwa Yakobo. Yesu iki unoga kushiminza, wigasha giko ha lwinzi lwenulo. Limi lyali lili giti saa ya katandatu.

⁷ Hunaho nkima wa Samaria wiza kudaha minzi. Yesu ungʼwila giki, Ninhage cha kungʼwa.

⁸ Iki bahemba bakwe bali bajaga mu nzengo kugula shiliwa.

⁹ Nkima uyo, Nsamaria, ungʼwila giki, Ili kinahe, Bebe, uli Nyudaya, ulinilomba cha kungʼwa, na nene ndi nkima Nsamaria? iki Bayudaya batisangijaga na Basamaria.

¹⁰ Yesu ushosha ungʼwila giki, Ninga ulu ni walumanile cha kwinha cha Mulungu, na Uyo alikuwila giki, Ninhage cha kungʼwa, bebe ni wanomba, nanghwe ni wakwinha minzi mapanga.

¹¹ Nkima ungʼwila giki, Seba, uti nacho cha kudahila, na lwinzi lwenulu luli lushimu no; wagafunije hali lulu minzi genaya a mapanga?

¹² Angu, Bebe uli ntale kutinda nkulugenji wiswe Yakobo, uyo wali utwinha lwinzi ulu, nanghwe ngʼwenekele waangʼwaga mo, na bana bakwe, na mitugo jakwe?

¹³ Yesu ushosha ungʼwila giki, Buli munhu ose akungʼwaga minzi aya akukolwa nota hangi;

Mihayo ya Moyo Ngʼwela

¹⁴ Aliyo uyo ose ungʼwa minzi ayo nakungʼwinha Nene, atalakolwa nota hangi welelo bose; aliyo minzi ayo nakungʼwinha, gakubiza muli wei luzwilo lwa minzi lukuzwila kushika ku bupanga butushila.

¹⁵ Nkima ungʼwila giki, Seba, ninhage minzi genayo, natizukolwa nota hangi, nulu kwiza kunu kudaha.

¹⁶ Yesu ungʼwila giki, Jaga ukangʼwitane u ngoshi wako, na ushokanye kunu.

¹⁷ Nkima ushosha uhaya giki, Nati na ngoshi. Yesu ungʼwila giki, Wahayaga ya nghana giki, Nati na ngoshi:

¹⁸ Iki wamala kubiza na bagoshi batano, na uyo uli nanghwe i haha ati ngoshi wako: gwenuyu waguhayaga gwa nghana.

¹⁹ Nkima ungʼwila giki, Seba, nabona giki, Uli nghangi.

²⁰ Bakulugenji biswe baalamijaga mu lugulu ulu; na bingʼwe mukuhayaga giki, Mu Yerusalemi lili ho ipande umo shigelile kulamija mo.

²¹ Yesu ungʼwila giki, Bebe nkima, nizunyage, ikanza likwizaga, aho mutalanamija Baba mu lugulu ulu, nulu mu Yerusalemi.

²² Bingʼwe mukalamyaga icho mutakimanile: biswe tukalamyaga icho tutamanile; iki bupiji wafuma mu Bayudaya.

²³ Aliyo ikanza likwizaga, hangi haha yeniyi lili ho, aho a balamya ba nghana bakubyunamya Baba mu moyo na mu nghana; iki Baba akakobaga hanhu abali giko kubiza balamya bakwe.

²⁴ Mulungu Ngʼwene Moyo; nabo abakunamyaga shibigelile kulamya mu moyo na mu nghana.

²⁵ Nkima ungʼwila giki, Namanile giki, Masiya aliza (Uyo akitanagwa Kristo); Ngʼwenuyo aho aliza alatuwila yose.

²⁶ Yesu ungʼwila giki, Nene Uyo nalilungalunga na bebe, huna Nene ndi Ngʼwene.

²⁷ Hunaho bahemba bakwe bashika, nabo bukumya iki akulungalungaga na nkima; nahene walati ho wa kuhaya giki, Ulikoba ki? nulu giki, Nguno ki ulilungalunga nanghwe?

²⁸ Hunaho nkima ululeka luno lwakwe, uja mu nzengo, ubawila banhu giki,

²⁹ Nzugwi, munole munhu Uyo waniwilaga iyo nakitaga yose: angu, Ngʼwenuyu akukija kubiza Kristo?

³⁰ Bufuma mu nzengo lulu, buja kuli Wei.

³¹ Ngʼwikanza lyenili bahemba bakwe bungʼwikumbilija, bungʼwila giki, Rabbi, lyaga shiliwa.

³² Nanghwe ubawila giki, Nene ndi na shiliwa isho mutashimanile.

³³ Bahemba bakwe bilunjalunja boi bike giki, Ali ho munhu wangʼwenhelaga shiliwa?

³⁴ Yesu ubawila giki, Shiliwa shane shene giki, kwita iyo atogilwe Uyo waanituma, na kushikilija nimo gwakwe.

³⁵ Bingʼwe mutahayaga giki, Yasaga mieji ine, huna lulu magesa gushika? Lolagi, namuwila giki, Buchagi miso gingʼwe mulole migunda, iki yelaga pe kugeswa.

³⁶ Uwagesa wanukula mhela, hangi akubilingaga matwajo ku bupanga butushila; u mibi na ngesi bayegele hamo.

³⁷ Iki mu iyi lusumo ulu luli lwa nghana giki, Mibi ungi na ngesi ungi.

³⁸ Nene nali numutuma kugesa isho mutashikoyakoyelile; bangi bamala kukoyakoya, na bingʼwe ngʼwingilile mu kukoyakoya kwabo.

³⁹ Basamaria bingi ba mu nzengo gwenuyo bali bunzunya Wei kulwa mhayo gwa nkima ngʼwenuyo, aho ukanila giki, Waniwilaga iyo nakitaga yose.

Basamaria bingi bunzunya Yesu

⁴⁰ Huna lulu Basamaria aho bushika kuli Wei, bungʼwikumbilija kwikala hamo nabo; nanghwe wikala ko shiku ibili.

⁴¹ Banhu bingi no kutinda bali bunzunya kulwa mhayo gwakwe,

⁴² Bungʼwila u nkima giki, Haha twazunya, iti kulwa mhayo gwako gwike, iki twigwaga biswe benekele, hangi twamana giki, Nghana Uyu hu Ngʼwene Kristo, Mpija wa ba mu si.

⁴³ Hanuma ya shiku ijo ibili, winga ko, uja Galilaya.

⁴⁴ Iki Yesu ngʼwenekele wali ukanila giki, Nghangi ati na ikujo mu si ya ngʼwabo.

⁴⁵ Huna lulu aho wali ushika Galilaya, a Bagalilaya bungʼwegeleja, iki bali bubona iyo yose akita mu Yerusalemi ku lushiku lutale, iki na benabo bali buja ku lushiku lutale.

Ngʼwana wa munikulu upijiwa

⁴⁶ Huna lulu ushika hangi mu Kana, nzengo gwa Galilaya; umo akagalukija minzi kubiza minzi ga mizabibu. Walali ho munikulu umo ngʼwana wakwe nyanda walasatile kwenuko Kapernaumu.

⁴⁷ Ngʼwenuyo aho wali wigwa giki, Yesu wamala kwiza kufuma mu Buyudaya washikaga Galilaya, uja kuli Wei, ungʼwikumbilija giki, atulumenhe akampije ngʼwana wakwe; iki walenda kucha.

⁴⁸ Huna lulu Yesu ungʼwila giki, Ulu mutubona shimanikijo na shamahano, mutalazunya na hado.

⁴⁹ Munikulu ungʼwila giki, Seba, tulumenhaga, kana kane kuko katali kucha.

⁵⁰ Yesu ungʼwila giki, Jaga, ngʼwana wako ali mpanga. Munhu ngʼwenuyo uguzunya mhayo uyo Yesu akangʼwila, uja lulu.

⁵¹ Aho alitulumenha, basese bakwe bali bumanhya nanghwe, bunsombolela, buhaya giki, Ngʼwana wako ali mpanga.

⁵² Huna lulu ubabugilija saa jinga aho wali wandia kupila. Nabo bungʼwila giki, Igolo saa mpungati nswiza gwali gunekela.

⁵³ Huna lulu ise umana giki, hu yene saa yeniyo aho Yesu wali ungʼwila giki, Ngʼwana wako ali mpanga. Uzunya u wei ngʼwenekele na kaya yakwe yose.

⁵⁴ Iki chene kimanikijo cha kabili icho Yesu wali wita aho wali winga Buyudaya kuja Galilaya.