Yohana 3 - Ilagano Ipya Lya

Yesu na Nikodemo: Kubyalwa kupya

¹ Walali ho munhu umo wa mu Bafarisayo, lina lyakwe Nikodemo, nsugi wa Bayudaya;

² Ngʼwenuyo wali wiza kuli Yesu bujiku, ungʼwila giki, Rabbi, tumanile giki, Bebe uli nangi wafumila kuli Mulungu; iki ati ho munhu uwadula kwita shimanikijo ishi ukushitaga Bebe, numho Mulungu ali hamo nanghwe.

³ Yesu ushosha ungʼwila giki, Nghana, nghana, nakuwila giki, Munhu ulu atubyalwa lukangala lwa kabili, atudula kububona butemi wa Mulungu.

⁴ Nikodemo ungʼwila giki, Munhu wadula kinahe kubyalwa ulu anamhalile? wadula kwingila mu nda ya ngʼwa nina lukangala lwa kabili na kubyalwa?

⁵ Yesu ushosha giki, Nghana, nghana, nakuwila giki, Munhu ulu atubyalwa na minzi na Moyo Ngʼwela, atudula kwingila mu butemi wa Mulungu.

⁶ Icho chabyalilwe na mili chene mili; na icho chabyalilwe na Moyo Ngʼwela chene moyo.

⁷ Utakumyage iki nakuwilaga giki, Shingʼwigelile kubyalwa lukangala lwa kabili.

⁸ Nyaga guhemba kuja uko gutogilwe, wigwa ilaka lyago, aliyo utamanile uko gulifuma, nulu uko gujile: giko na buli munhu ose uyo wabyalilwe na Moyo Ngʼwela.

⁹ Nikodemo ushosha ungʼwila giki, Yeniyi yadulika kinahe kubiza ho?

¹⁰ Yesu ushosha ungʼwila giki, Angu bebe uli nangi wa ba Israeli, na utamanile yeniyi?

¹¹ Nghana, nghana, nakuwila giki, Iyo twimanile yene tukulungalungaga, na iyo twaayibona yene tukukanilaga; na bukaniji wiswe mutuwanukulaga.

¹² Ulu namuwilaga mihayo ya mu si, na bingʼwe mutuzunyaga, mukuzunya kinahe ulu namuwila ya ngʼwigulu?

¹³ Ati ho munhu uwali walinha ngʼwigulu ulu ati Uyo wali wika kufuma ngʼwigulu, Ngʼwene Ngʼwana wa munhu Uyo ali ngʼwigulu.

¹⁴ Gitumo Musa wali usunga nzoka mu bu, giko hangi na Ngʼwana wa munhu shingʼwigelelilwe kusungwa,

¹⁵ Munhu ose uwanzunya aleke kuyagala, aliyo abize na bupanga butushila.

¹⁶ Iki Mulungu ubatogwa ba mu si giki, na kwinha ungʼwinha ko Ngʼwana wakwe uwaabyalwa umo wike, munhu ose uwanzunya aleke kuyagala, aliyo abize na bupanga butushila.

¹⁷ Iki Mulungu walatantumile Ngʼwana wakwe mu si kubalekanya nsango ba mu si, aliyo ba mu si bapijiwe muli Wei.

¹⁸ Uwanzunya atulekanyiwa nsango, uyo atunzunya wamala kulekanyiwa nsango, iki atalizunije lina lya Ngʼwana waabyalwa umo wike wa Mulungu.

¹⁹ Uyu gwene nsango giki, isana lyizile mu si, na banhu butogwa giiti kutinda isana; iki Shitwa shabo shali sha bubi.

²⁰ Iki uyo ose akitaga ya bubi akulikolagwa isana, nulu atiza kwisana, Shitwa shakwe shileke kuhangʼwa.

²¹ Aliyo uyo akitaga ya nghana akizaga kwisana, Shitwa shakwe shigengeleke giki, Shitwa muli Mulungu.

Kukanila kwa kumalija kwa ngʼwa Yohana

²² Hanuma ya yeniyi Yesu uja na bahemba bakwe ku si ya Bayudaya; na kwenuko udila hamo nabo akubatijaga.

²³ Yohana nanghwe ubyubatija mu Ainon hihi na Salim, iki gali gali ko minzi mingi; banhu bubyuja bubatijiwa.

²⁴ Iki Yohana walatali kutungwa mu jela.

²⁵ Huna lulu kwali kubuka kwibugilija kwa bahemba ba ngʼwa Yohana na Bayudaya mu mihayo ya kwejiwa.

²⁶ Bali biza kuli Yohana, bungʼwila giki, Rabbi, Uyo walali nangho ku nkilo gwa Yordani Uyo bebe wali unkanila, lolaga, Ngʼwenuyo akubatijaga, na banhu hose bakujaga kuli Wei.

²⁷ Yohana ushosha uhaya giki, Munhu atudula kwanukula mhayo gose, ulu atinhiwa kufuma ngʼwigulu.

²⁸ Bingʼwe benekele mulinikanila gitumo namala kuhaya giki, Nene nati Kristo, aliyo giki, nali ntungʼwa ku butongi wakwe.

²⁹ Uyo ali na ntolwa, u ngʼwene ntoji; aliyo nsumba ngʼwiye wa ntoji, uwimilile na kungʼwigwa, aliyegela no ilaka lya ntoji: ubu buyegi wane washikilaga lulu.

³⁰ Wei shingʼwigelile kukula, aliyo nene kudoha.

Kukanila kwakwe kuli Yesu

³¹ Uyo izile kufuma higulya, ali higulya ya yose: uyo ali wa mu si, ngʼwene wa mu si, nanghwe akulungalungaga ya mu si: Uyo izile kufuma ngʼwigulu ali higulya ya yose.

³² Iyo wamala kubona na kwigwa, i yene akukanilaga; na ati ho uyo akuzunyaga bukaniji wakwe.

³³ Uyo wazunyaga bukaniji wakwe watuulaga ho lumengho lwakwe giki, Mulungu ali wa nghana;

³⁴ Iki Uyo Mulungu waantuma akulungalungaga mihayo ya Mulungu; iki Mulungu atungʼwinhaga Moyo Ngʼwela mu bugeleki.

³⁵ Siswe antogilwe Ngʼwana, hangi wamala kungʼwinha yose mu nkono gwakwe.

³⁶ Uwanzunya Ngʼwana ali na bupanga butushila; na uyo atunzunya Ngʼwana, atalamona bupanga, aliyo bupelanu wa Mulungu bukikalaga kuli wei.