Yohana 20 - Ilagano Ipya Lya

Kujuka kwa ngʼwa Yesu

¹ Ha lushiku lwa kwandia lwa mfungo mu makingokingo, aho chali kitali giiti, Mariamu Magdalene wali wiza ku kigila, na ulibona iwe lyinjiwagwa ho kufuma ha kigila.

² Upela lulu, wiza kuli Simoni Petro na kuli nghemba ungi uyo Yesu untogwa, ubawila giki, Bangʼwinjaga ho Seba mu kigila, hangi uko bantuulaga tutamanile.

³ Petro ufuma lulu, na nghemba uyo ungi, buja ku kigila.

⁴ Bupela bose hamo: na nghemba ungi upela wangu kutinda Petro, ushika kwandia ku kigila;

⁵ Winama usula mo, ubona mienda ya kitani ituulilwe ho; aliyo walatingila mo.

⁶ Simoni Petro ushika lulu akunondelaga, nanghwe wingila mo mu kigila; nanghwe uyilola mienda ya kitani gitumo ituulilwe.

⁷ Na kitambala icho chali chubiza ku ntwe gwakwe, chali kitatuulilwe hamo na mienda ya kitani, aliyo chulingwa heke ngʼwipande lyacho.

⁸ Hunaho lulu nghemba ungi nanghwe wingila mo, uyo wandia kushika ko ku kigila, nanghwe ubona, na uzunya.

⁹ Iki bali batali kwitegeleja uyo gwaandikwa giki, Kujuka, shingʼwigelile kujuka hangi kufuma mu bafu.

¹⁰ Huna lulu bahemba benabo bushokanya hangi ku kaya yabo.

Yesu ungʼwilongela Mariamu Magdalene

¹¹ Aliyo Mariamu wali imilile hanze ya kigila, alilila shisoji; aho walatali ulila, winama usula mo mu kigila;

¹² Ulolela mo bamalaika babili, bazwalile shizwalo shape, bigashije ho, ungi ku ntwalili na ungi ku magulu, kwipande ilo aho mimba gwa ngʼwa Yesu gwali gwalajiwa ho.

¹³ Nabo bungʼwila giki, Mayu, ulililila ki? Nanghwe ubawila giki, Iki bantwalaga Seba wane, na nene natamanile bantuulaga hali.

¹⁴ Aho wamala kuhaya giko, ugaluka kunuma, unola Yesu imilile, aliyo walatitegeleja giki, Ngʼwene Yesu.

¹⁵ Yesu ungʼwila giki, Mayu, ulililila ki? ulinkoba nani? Nanghwe iki wiganika giki, Uyo ngʼwene nimi wa ngunda, ungʼwila giki, Baba, ulu Bebe wamuchaga kungi, niwilage uko wantuulaga, na nene nakuntwala.

¹⁶ Yesu ungʼwila giki, Mariamu. Ngʼwenuyo ugaluka, ungʼwila mu Kihebrania giki, Rabboni, kushomelejiwa kwaho giki, Nangi.

¹⁷ Yesu ungʼwila giki, Utizunikuumya; iki natali kulinha kuli Baba; aliyo jaga ku badugu bane, ukabawile giki, Nene nalilinha kuli Baba, na kuli Singʼwe, hangi kuli Mulungu wane, na kuli Mulungu wingʼwe.

¹⁸ Mariamu Magdalene wiza na ubasombolela bahemba giki, wamonaga Seba; hangi Wei wangʼwilaga yeniyi.

Yesu ubilongela bahemba; Tomaso ati ho

¹⁹ Aho yali ili mhindi lwise lwene, u lushiku lwa kwandia lwa mfungo, hangi na nzwigi jali jilugalilwe ho uko bahemba bibilinga, kulwa kubogoha Bayudaya, huna lulu Yesu wiza, wimila hagati yabo, na ubawila giki, Mhola ku bingʼwe.

²⁰ Aho wamala kuhaya giko, Ubolekeja makono gakwe na mbazu jakwe. Bahemba bakwe buyega aho bumona Seba.

²¹ Huna lulu Yesu ubawila hangi giki, Mhola ku bingʼwe; gitumo Baba waantuma Nene, giko hangi namutuma bingʼwe.

²² Aho wamala kuhaya giko, ubahahila, ubawila giki, Ngʼwanukulagi Moyo Ngʼwela;

²³ Abo bose ulu ngʼubalekeja shibi shabo, shene shalekejiwa kubo; abo bose ulu ngʼushidimya, shene shadimiwa.

Yesu ubilongela bahemba hangi, Tomaso ali ho

²⁴ Aliyo Tomaso, umo wa benabo ikumina babili, uyo akitanagwa Didumo, walati ho aho Yesu wali wiza.

²⁵ Kulwa iyo bahemba bangi bungʼwila giki, Twamonaga Seba. Aliyo ubawila giki, Nene ulu natubona mu makono gakwe nhondo ja misumali, na ulu natutuula mo lwa la lwane mu nhondo ja misumali, na ulu natingija mo nkono gwane mu mbazu jakwe, natalazunya na hado.

²⁶ Hanuma ya shiku inane bahemba bakwe bali bali mo mu numba hangi, Tomaso nanghwe ali hamo nabo. Yesu wiza, nzwigi jali jilugalilwe, na wimila hagati, uhaya giki, Mhola ku bingʼwe.

²⁷ Hunaho ungʼwila Tomaso giki, Enhaga lwala lwako kunu, ulole makono gane; enhaga na nkono gwako, ugwingije mo mu mbazu jane; utizubiza uyo atuzunya, aliyo uyo azunije.

²⁸ Tomaso ushosha ungʼwila giki, Seba wane na Mulungu wane.

²⁹ Yesu ungʼwila giki, Iki wanibonaga, wazunyaga; bali ba lubango abo abatinabona, aliyo bazunyaga.

Nguno ya kwandika kitabo cha Yohana

³⁰ Shimanikijo shingi na sha mbika ningi Yesu waashitaga mu miso ga bahemba bakwe, isho shitandikilwe mo mu kitabo cheniki;

³¹ Aliyo shenishi shandikilwe bingʼwe muzunye giki, Yesu ngʼwene Kristo, Ngʼwana wa Mulungu, na hangi kulwa kuzunya mubize na bupanga mu lina lyakwe.