Yohana 2 - Ilagano Ipya Lya

Yesu ku bukombe mu Kana

¹ Ha lushiku lwa kadatu wali bubiza ho bukombe wa butoji mu Kana, ya Galilaya; na nina wa ngʼwa Yesu walali ko;

² Yesu nanghwe wali witanwa hamo na bahemba bakwe ku bukombe.

³ Minzi ga mizabibu iki guleba ho, nina wa ngʼwa Yesu ungʼwila giki, Bati na minzi ga mizabibu.

⁴ Yesu ungʼwila giki, Nkima, tuli na ki, Nene na bebe? ikanza lyane litinashika.

⁵ Nina ubawila binhilija giki, Iyo yose alamuwile iyitagi.

⁶ Jali jili ho nno ja mawe itandatu jikindikile ho gitumo shimile shabo shili sha koga a Bayudaya, buli luno lwali luli lwa shisabo shibili nulu shidatu.

⁷ Yesu ubawila giki, Jokajagi minzi nno jeniji. Nabo bujokaja pa.

⁸ Ubawila giki, Dahagi lulu, muntwalile u ntale wa bukombe. Buntwalila.

⁹ Ntale wa bukombe, aho uloja minzi genayo gabizaga minzi ga mizabibu, nanghwe walatamanile uko gafumaga, (aliyo binhilija abali bugadaha minzi, bene bamanile), ntale wa bukombe ungʼwitana u ntoji,

¹⁰ Ungʼwila giki, Buli munhu ose kwandia akatengaga minzi ga mizabibu a ga wiza, kushisha banhu aho bamala kungʼwa no, huna lulu wenha agati ga wiza; aliyo bebe wagabikaga minzi ga mizabibu a ga wiza kushisha haha.

¹¹ Yesu wali wita wandijo ubu wa shimanikijo mu Kana ya Galilaya, na olecha hape ikujo lyakwe; na bahemba bakwe nabo bunzunya.

¹² Hanuma ya iyo, wali utulumenha kuja Kapernaumu, Wei, na nina, na bana ba ngʼwawe, na bahemba bakwe: bikala ko shiku ngehu.

Pasaka ya kwandia Kwejiwa kwa kwandia kwa hekalu

¹³ Na Pasaka ya Bayudaya yali ili hihi kushika: Yesu ulinha kuja Yerusalemi.

¹⁴ Ubabona mu hekalu banhu abali bujinja ngʼombe na ngholo na nghuulu, na bakabanya ba feza bigashije;

¹⁵ Aho ubeja fimbo ya ngoye, ubapeja bose mu hekalu, na ngholo na ngʼombe; ujitagula feza ja bakabanya ba feza, ujisalikula meza jabo;

¹⁶ Ubawila bajinja ba nghuulu giki, Funyagi shinhu ishi; mutabejage numba ya ngʼwa Baba kubiza numba ya buguji.

¹⁷ Bahemba bakwe bizukwa iyo yaandikwa giki, Wilu wa numba yako wanilya.

¹⁸ Kulwa iyi Bayudaya bushosha bungʼwila giki, Kimanikijo ki ulitolekeja, iki ukwitaga yeniyi?

¹⁹ Yesu ushosha ubawila giki, Isambulagi hekalu iyi, na Nene nakuyimilija mu shiku idatu.

²⁰ Kulwa iyi Bayudaya buhaya giki, Hekalu iyi yaazengagwa miaka makumi ane na itandatu, nangho ukuyimilija mu shiku idatu?

²¹ Aliyo Wei wali uyihaya hekalu ya mili gwakwe.

²² Aho wali umala kujuchiwa mu bafu, bahemba bakwe bali bizukwa giki, wali waguhaya mhayo uyu; nabo bushizunya Shandikwa, na mhayo uyo akaguhaya Yesu.

²³ Aliyo aho walali mu Yerusalemi ku Pasaka mu lushiku lutale, banhu bingi bali bulizunya lina lyakwe aho bubona shimanikijo shakwe isho akwitaga.

²⁴ Aliyo Yesu walatisanije ngʼwenekele kubo, iki Wei walabamanile bose.

²⁵ Hangi iki walati na nguno munhu ose ankanile ya banhu; iki Wei ngʼwenekele walamanile iyo ili muli munhu.