Yohana 17 - Ilagano Ipya Lya

Kulomba kwa Seba

¹ Yesu wali ulungalunga yeniyi, ulangamila miso gakwe ngʼwigulu, na uhaya giki, Baba, ikanza lyashikaga; nkujage Ngʼwana wako; Ngʼwana wako nanghwe akukuje Bebe:

² Gitumo Bebe waangʼwinha budula wa kusuga ba mibili bose, giki, abinhe bupanga butushila abo bose Bebe waangʼwinha.

³ Na bupanga butushila wene ubu giki, bakumane Bebe, Mulungu wa nghana umo wike, na Yesu Kristo, Uyo waantuma.

⁴ Nene nakukugije Bebe mu si; nagushikilijaga nimo gwenuyo Bebe waaninha kugwita.

⁵ Na hambunyu, Baba, nikujage na Bebe ngʼwenekele, na ikujo ilo nali nabiza nalyo hamo na Bebe, aho si iti-nabiza ho.

⁶ Namalaga kubamanikija lina lyako banhu abo waaninha kufuma mu ba mu si; bali bali bako, na Nene waaninha boi; na mhayo gwako baagudima.

⁷ Hambunyu bamanile giki, yose iyo waaninha Nene, ifumile kuli Bebe:

⁸ Iki mihayo iyo waaninha Nene i yene namalaga kubinha benabo, nabo buyanukula, hangi bumana nghana giki, Nene nafumile kuli Bebe, hangi buzunya giki, Bebe waanituma.

⁹ Nene nabalombela benabo; natubalombelaga ba mu si, aliyo nabalombela benabo waaninha Nene, iki bali bako.

¹⁰ Na shane shose shene shako, na shako shene shane; na Nene nakujiwa mu bo.

¹¹ Na Nene nati mo mu si hangi, aliyo benaba bali mo mu si, na Nene niza kuli Bebe. Baba Ngʼwela, ubalinde mu lina lyako benabo waaninha, babize bumo, giti Biswe.

¹² Aho nali natali hamo nabo, nubyubalinda mu lina lyako; abo waaninha, nubalalanghana, hangi atayagalile nulu umo, ulu ati uyo ngʼwana wa kuyagala, mhayo gwaandikwa gushikilijiwe.

¹³ Hambunyu niza kuli Bebe; na mihayo yeniyi nayilungalunga mu si, babize na buyegi wane bushikilijiwe mubo.

¹⁴ Nene namalaga kubinha mhayo gwako; hangi ba mu si bubakolwa, iki bati ba mu si, gitumo Nene nati wa mu si.

¹⁵ Natulombaga giki, ubinje mu si, aliyo giki, ubalinde muli ngʼwenuyo mi.

¹⁶ Boi bati ba mu si, gitumo Nene nati wa mu si.

¹⁷ Bejage benabo mu nghana yako; mhayo gwako u gwene nghana.

¹⁸ Gitumo Bebe waanituma Nene mu si, giko Nene naabatuma benabo mu si.

¹⁹ Na kulwa nguno yabo niyeja ngʼwenekele, benabo nabo bejiwe mu nghana.

²⁰ Nulu natubalombelaga benaba bike, aliyo nabalombela hangi benabo bakubyunizunya kulwa mhayo gwabo;

²¹ Bose babize bumo; gitumo na Bebe, Baba, uli muli Nene, na Nene muli Bebe, benabo nabo babize bumo mu Biswe; ba mu si bazunye giki, Bebe waanituma.

²² Na Nene, ikujo ilo waaninha Nene, naabinha boi; babize bumo, gitumo Biswe tuli bumo.

²³ Nene mubo, na Bebe muli Nene, bashikanyiwe babize bumo; ba mu si bamane giki, Bebe waanituma Nene, hangi waabatogwa boi, gitumo waanitogwa Nene.

²⁴ Baba, natogilwe giki, abo Bebe waaninha, babize hamo na Nene, aho ndi; balilolele ikujo lyane, ilo waaninha; iki Bebe waanitogwa aho si yali itali kusengʼwa.

²⁵ Baba ntungilija, ba mu si batakumanaga, aliyo Nene nakumanile, na benaba bamanile giki, Bebe waanituma Nene.

²⁶ Hangi naabamanikija lina lyako, nakulimanicha hangi; butogwa ubo Bebe waanitogwa nabo, bubize mubo, na Nene nabize mo mubo.