Yohana 16 - Ilagano Ipya Lya

Yesu ukuhanga kuluhiwa kwa bazunya

¹ Mihayo yeniyi namuwilaga bingʼwe mutalizipamiwa.

² Balamupeja mu mabilingilo; chene ikanza likwizaga aho uyo ose umubulaga bingʼwe akwiganika giki, akuntumamilaga Mulungu.

³ Bakungʼwitila yeniyi iki batamanile Baba nulu Nene.

⁴ Aliyo namuwilaga yeniyi giki, aho ikanza lyenilo lilashikaga, ngʼwizukwe giki, Naali naamuwila mihayo yeniyi. Nali natamuwilile yeniyi kufuma kwandia, iki nali ho hamo ningʼwe.

⁵ Aliyo haha naja kuli Uyo waantuma; hangi ati ho umo wa mu bingʼwe uyo wanibuja giki, Ujile hali?

⁶ Aliyo iki namuwilaga yeniyi, bupina bokajaga ngholo yingʼwe.

Nimo gwa Moyo Ngʼwela ku ba mu si

⁷ Aliyo namuwila ya nghana giki, Ikumubelela bingʼwe Nene ninge ho; iki ulu natinga ho Nene, Ngunani ataliza ku bingʼwe; aliyo ulu nuja Nene, nakuntuma ku bingʼwe.

⁸ Nanghwe aho alizaga akubakanilija ba mu si ya shibi, na ya butungilija, na ya kulekanya nsango.

⁹ Ya shibi, iki batunizunyaga Nene;

¹⁰ Ya butungilija, iki naja kuli Baba, na bingʼwe mutunibona hangi;

¹¹ Ya kulekanya nsango, iki ntale wa si iyi nanghwe walekanyiwagwa nsango.

Nimo gwa Moyo Ngʼwela ku bazunya

¹² Natali ndi na mihayo mingi ya kumuwila, aliyo bingʼwe mutudula kuyiyumilija haha.

¹³ Aliyo Ngʼwenuyo, Moyo Ngʼwela wa nghana aho wiza, akumutongela mu yose ya nghana; iki atalalungalunga yakwe ngʼwenekele; aliyo yose iyo akwigwa, i yene akulungalunga; hangi akumusombolela iyahaya kwiza.

¹⁴ Ngʼwenuyo akunikuja Nene; iki akuyinja ho ku yane, hangi akumusombolela bingʼwe.

¹⁵ Yose iyo Baba ali nayo, yene yane; kulwa mhayo uyo namuwila giki, akuyinja ho ku yane, hangi akumusombolela bingʼwe.

Yesu ukuhaya kucha, na kujuka kwakwe

¹⁶ Kakanza kado ningʼwe mutunibona; na hangi kakanza kado ningʼwe mukunibona hangi; iki naja kuli Baba.

¹⁷ Kulwa iyo bamo ba mu bahemba bakwe bilunjalunja giki, Mhayo uyu alituwila guli kinahe, giki, Kakanza kado ningʼwe mutunibona; na hangi kakanza kado ningʼwe mukunibona hangi? na giki, Iki naja kuli Baba?

¹⁸ Kulwa mhayo uyu buhaya giki, Mhayo guli kinahe uyu alihaya giki, Kakanza kado? Tutamanile iyo ulungalunga.

¹⁹ Yesu wali umana giki, batogilwe kumuja, nanghwe ubawila giki, Angu, bingʼwe ngʼwibugilija benekele na benekele ya mhayo uyu naguhayaga giki, Kakanza kado ningʼwe mutunibona; na hangi kakanza kado ningʼwe mukunibona hangi?

²⁰ Nghana, nghana, namuwila giki, Bingʼwe mukulila hangi mukulila nghungu; aliyo ba mu si bakuyega, bingʼwe mukupinihala, aliyo bupina wingʼwe bulagaluka kubiza buyegi.

²¹ Nkima ulu alituula, ali na bupina, iki ikanza lyakwe lyashikaga; aliyo aho wamala kumyala ngʼwana, atizukwa hangi u buluhi, kulwa kuyegela giki, munhu wabyalagwa mu si.

²² Na bingʼwe hambunyu muli nabo bupina nghana; aliyo nakumubona hangi, na ngholo yingʼwe ikuyega, hangi ati ho nulu umo wa kumutaja buyegi wingʼwe.

²³ Hangi mu lushiku lwenulo mutalanibuja mhayo gose. Nghana, nghana, namuwila giki, Yose iyo munombe Baba mu lina lyane, akungʼwinha bingʼwe.

²⁴ Kushisha lelo mutali kulomba mhayo nulu gumo mu lina lyane; lombagi ningʼwe mukwinhiwa, buyegi wingʼwe bubize bushikanu.

²⁵ Mihayo yeniyi nalungalungaga mu sumo; ikanza lukwizaga aho lyulungalunga hamo ningʼwe hangi mu sumo, aliyo nakumusombolela hape i ya ngʼwa Baba.

²⁶ Mu lushiku lwenulo mukulomba mu lina lyane, na Nene natumuwilaga giki, Nakumuja Baba kulwa nguno yingʼwe;

²⁷ Iki Baba ngʼwenekele amutogilwe, iki bingʼwe ngʼwaanitogwa, hangi ngʼwaazunya giki, Nene nafumile kuli Baba.

²⁸ Nene nafumile kuli Baba, hangi nizile mu si; hangi nabaleka ba mu si, naja kuli Baba.

²⁹ Bahemba bakwe bungʼwila giki, Lolaga, hambunyu ukulungalungaga hape, na utuhayaga lusumo nulu lumo.

³⁰ Hambunyu tulitegeleja giki, Bebe witegeleja mihayo yose, hangi uti na nguno munhu ose akubuje; kulwa mhayo uyo twazunya giki, Bebe ufumile kuli Mulungu.

³¹ Yesu ubashokeja giki, Ngʼwazunya nghana hambunyu?

³² Lolagi, ikanza likwizaga, chene na hambunyu lyashikaga, bingʼwe bose mukubalasanyiwa, buli munhu ose ku yakwe, na Nene mukunileka niyene; nahene nati niyene, iki Baba ali hamo na Nene.

³³ Mihayo yeniyi namu wilaga giki, muli Nene mubize na mhola. Mu si mukubiza na kuluhaluhiwa; aliyo timbyagi ngholo, Nene napyenaga si.