Yohana 15 - Ilagano Ipya Lya

Yesu nzabibu gwa nghana; bakwe matambi

¹ Nene ndi nzabibu gwa nghana, na Baba Ngʼwene nimi.

² Buli itambi lyose muli Nene ilo litatwajaga matwajo, akulyinjaga ho; hangi buli itambi lyose ilo likatwajaga matwajo akulyejaga, lyongeje kutwaja matwajo.

³ Bingʼwe hambunyu ngʼwamalaga kwela kulwa mhayo gwenuyo namalaga kumuwila.

⁴ Ikalagi muli Nene, na Nene mu bingʼwe. Gitumo itambi Utudula kutwaja matwajo lyenekele, ulu litikalaga mu nzabibu, giko hangi na bingʼwe mutudula, ulu mutikalaga muli Nene.

⁵ Nene ndi nzabibu, bingʼwe muli matambi. Uyo akwikalaga muli Nene, na Nene muli wei, ngʼwenuyo akatwajaga matwajo mingi; iki ulu iti hamo na Nene mutudula kwita mhayo nulu gumo.

⁶ Munhu ose ulu atikalaga muli Nene, uponyiwa hanze giti itambi, uma lulu; na banhu bugabilinga, bugaponya mu moto, gupemva.

⁷ Bingʼwe ulu ngʼwikala muli Nene, na mihayo yane yikala mu bingʼwe, mukulomba iyo mutogilwe, nayo ikwitwa kulwingʼwe.

⁸ Mu mhayo uyu Baba akukujiwagwa giki, mutwaje matwajo mingi; na bingʼwe mukubiza bahemba bane.

⁹ Gitumo Baba waatutogwa, giko hangi na Nene naamutogwa bingʼwe; ikalagi mu butogwa wane.

¹⁰ Ulu ngʼushidima shilagilo shane, mukwikala mu butogwa wane; gitumo Nene nakashidimaga shilagilo sha ngʼwa Baba, nakwikalaga mu butogwa wakwe.

¹¹ Mihayo iyi namuwilaga, kuyega kwane kwikale mo mu bingʼwe, hangi kuyega kwingʼwe kukwile.

¹² Kilagilo chane kili iki, giki, Ngʼwitogwe benekele na benekele, gitumo Nene naamutogwa bingʼwe.

¹³ Nduhu munhu ali na butogwa butale kutinda ubu giki, munhu kuwega ho bupanga wakwe kulwa banwani bakwe.

¹⁴ Bingʼwe muli banwani bane ulu ngʼwita yose iyo namulagila.

Bunwani bupya

¹⁵ Kufuma haha natungʼwitana bingʼwe basese hangi; iki nsese atamanile iyo seba wakwe akwitaga; aliyo nangʼwitanaga bingʼwe banwani bane, iki yose iyo nali nigwa kuli Baba, namumanikijaga bingʼwe.

¹⁶ Bingʼwe ngʼwali mutanikomile Nene, aliyo Nene naamukoma bingʼwe, hangi naamutuula ho bingʼwe muje, mukatwaje matwajo, na matwajo gingʼwe gikale ho; yose iyo munombe Baba mu lina lyane, angʼwinhe bingʼwe.

¹⁷ Mihayo iyi namulagila giki, Ngʼwitogwe benekele na benekele.

Nzunya na abati bazunya

¹⁸ Ba mu si ulu bamukolwa bingʼwe, mumanile giki, bali bandia kunikolwa Nene aho batali kumukolwa bingʼwe.

¹⁹ Bingʼwe ulu ni muli ba mu si, ba mu si ni babatogwa banhu babo; aliyo iki bingʼwe muti ba mu si, aliyo Nene naamukoma kufuma mu ba mu si, kulwa mhayo uyu ba mu si bamukolilwe.

²⁰ Ngʼwizukwe mhayo uyo nali namuwilila giki, Nsese atankilile seba wakwe butale. Ulu bali buniluhyaluhya Nene, nahene bakumuluhyaluhya bingʼwe hangi; ulu bugudima mhayo gwane, balagudima mhayo gwingʼwe hangi.

²¹ Aliyo iyi yose balangʼwitila bingʼwe kulwa nguno ya lina lyane, iki batamanile Ngʼwenuyo waanituma.

²² Ulu ni natizile kulungalunga nabo, ni bali batubiza na shibi; aliyo haha bati na kwiyanda kulwa shibi shabo.

²³ Uyo wanikolwa Nene wankolwa Baba hangi.

²⁴ Nene ulu ni natitile hagati mubo shitile isho walatitile nulu umo ungi, ni bali batubiza na shibi; aliyo haha babonaga na batukolagwa Nene na Baba.

²⁵ Aliyo mhayo gushikilijiwe ugwaandikwa mo mu shilagilo shabo giki, Baanikolwa na nguno yaya.

Nzunya na Moyo Ngʼwela

²⁶ Aliyo Ngunani aho aliza, Uyo nakuntuma ku bingʼwe kufuma kuli Baba, Ngʼwene Moyo Ngʼwela wa nghana, Uyo ufuma kuli Baba, Ngʼwenuyo akunikanila Nene;

²⁷ Na bingʼwe hangi mukunikanilaga, iki mukabizaga hamo na Nene kufuma kwandia.