Yohana 14 - Ilagano Ipya Lya

Yesu uhanga gitumo akubizila bakwe

¹ Ngholo yingʼwe itiziganilija: ngʼwanzunya Mulungu, munizunye na Nene.

² Mu kaya ya ngʼwa Baba buli ho wikalo wingi; ulu ni iti giko ni nali namuwila; iki naja kumubegabegeja ipande.

³ Nahene ulu naja kumubegabegeja ipande, naliza hangi, kumutwala bingʼwe ku ngʼwane, giko aho ndi Nene, na bingʼwe mubize ho.

⁴ Na Nene uko najile mumanile ko, na nzila mumanile.

⁵ Tomaso ungʼwila giki, Seba, tutamanile uko ujile; na nzila tukwimana kinahe?

⁶ Yesu ungʼwila giki, Nene ndi nzila, na nghana, na bupanga; munhu ose atiza kuli Baba, ulu iti muli Nene.

Yesu na Ise bali umo

⁷ Ulu ni ngʼwali ngʼwanimana Nene, ni ngʼwali ngʼwamana Baba hangi: kufuma haha mukumanaga, hangi ngʼwamonaga.

⁸ Filipo ungʼwila giki, Seba, utolekeje Siswe, gwenuyo gukutwigela.

⁹ Yesu ungʼwila giki, Nene ndi ho hamo ningʼwe shiku ningi giko, nangho utanimanile, Filipo? uyo wanibonaga Nene, wamonaga Baba; bebe wahaya kinahe giki, Utolekeje Siswe?

¹⁰ Bebe utuzunyaga giki, Nene ndi muli Baba na Baba ali muli Nene? mihayo iyo nakumuwilaga natuhayaga yane ya ngʼwenekele; aliyo Baba akwikalaga muli Nene, Ngʼwenuyo akwitaga shitile shakwe.

¹¹ Nizunyagi giki, Nene ndi muli Baba, na Baba ali mo muli Nene; ulu natuzunya giko, nizunyagi kulwa nguno ya shitile shenekele.

¹² Nghana, nghana, namuwila giki, Uyo wanizunya Nene, shitile isho nakitaga Nene, nanghwe hangi alashita, chene na shitile shitale sha kutinda ishi alashita, iki Nene najile kuli Baba.

¹³ Na mhayo gose ngʼugulomba mu lina lyane, nakugwita, Baba akujiwe muli Ngʼwana.

¹⁴ Ulu ngʼugulomba mhayo gose mu lina lyane, Nene nakugwita.

¹⁵ Ulu ngʼunitogwa, mukushidima shilagilo shane.

Yesu ubisagija bakwe Moyo Ngʼwela

¹⁶ Na Nene nakunomba Baba, nanghwe akungʼwinha bingʼwe Ngunani ungi, ikale hamo ningʼwe welelo bose.

¹⁷ Ngʼwene Moyo Ngʼwela wa nghana; Ngʼwenuyo ba mu si batudula kungʼwanukula, iki batumonaga, nulu batumanaga; bingʼwe mumanile Ngʼwenuyo; iki akwikalaga hamo ningʼwe, hangi akubiza mo mu bingʼwe.

¹⁸ Natumuleka bapina; nakwiza ku bingʼwe.

¹⁹ Kasaga kakanza kado ba mu si batunibona hangi; aliyo bingʼwe mulinibona; hangi iki Nene ndi mpanga, na bingʼwe mukubiza bapanga.

²⁰ Mu lushiku lwenulo mulamana giki, Nene ndi muli Baba, na bingʼwe muli muli Nene, na Nene ndi mo mu bingʼwe.

²¹ Uyo ali na shilagilo shane, hangi ushidima, uyo hu ngʼwene akunitogagwa; hangi uyo akunitogagwa, Baba akuntogwa, na Nene nakuntogwa, hangi nakwiyolecha Nene ngʼwenekele kuli wei.

²² Yuda (ati Iskariota) ungʼwila giki, Seba, yabiza ho kinahe, Bebe wahaya kwiyolecha ngʼwenekele ku biswe, na ku ba mu si yaya?

²³ Yesu ushosha ungʼwila giki, Munhu ose ulu unitogwa, akugudima mhayo gwane, na Baba akuntogwa, na biswe tukwiza kuli wei, tukubeja wikalo hamo nanghwe.

²⁴ Uyo atanitogagwa, atadimaga mihayo yane; hangi na mhayo gwenuyu bingʼwe mukugwigwaga, guti gwane gwa ngʼwenekele; aliyo gwa ngʼwa Baba uwaanituma.

²⁵ Mihayo iyi nalungalungaga na bingʼwe, aho natali ndi hamo ningʼwe.

²⁶ Aliyo U Ngunani, Ngʼwene Moyo Ngʼwela, Uyo Baba akuntuma mu lina lyane, Ngʼwenuyo akumulanga mihayo yose, hangi akungʼwizukija bingʼwe yose iyo nakamuwilaga.

Yesu ubinha bakwe mhola yakwe

²⁷ Mhola namulekela; mhola yane nangʼwinha bingʼwe; iti gitumo ba mu si bakwinhaga umo nangʼwinha Nene. Ngholo yingʼwe itiziganilija, nulu itizogoha.

²⁸ Ngʼwigwaga iyo namuwila giki, Najile kungi, hangi nakwiza ku bingʼwe. Ulu ni ngʼwanitogwa, ni ngʼwayegaga, iki nahaya giki, Naja kuli Baba; iki Baba anikilile Nene butale.

²⁹ Na haha namuwilaga, kuko itali kubiza ho giki, aho ilabizaga ho, bingʼwe muzunye.

³⁰ Kufuma haha natulungalunga mingi hamo ningʼwe hangi, iki ntale wa mu si iyi izile; nanghwe ati na mhayo muli Nene;

³¹ Aliyo ba mu si bamane giki, Nene nantogilwe Baba, hangi gitumo Baba waatulagila, giko nakwitaga. Bukagi, twinge kunu.