Yohana 13 - Ilagano Ipya Lya

Pasaka ya kumalija

¹ Aho lushiku lutale lwa Pasaka lutali kushika, Yesu, iki umana giki, ikanza lyakwe lyashikile afume mo mu si kuja kuli Ise; iki waabatogwa bakwe abali mo mu si, ubatogwa kushisha ku bukalikijo.

² Aho bulya sha kulagila, Shetani wali wamalaga kwingi ja mo mu ngholo ya ngʼwa Yuda Iskariota ngʼwana wa Simoni giki, angʼwinhe ko,

³ Yesu, iki umana giki, Ise wangʼwinhile shose mu makono gakwe; hangi giki, Wei walafumile kuli Mulungu, hangi ajile kuli Mulungu,

⁴ Ubuka ha sha kulagila, ukungula shizwalo shakwe, udima kitambala, witunga ngʼwenekele.

⁵ Huna lulu usamija minzi ngʼwibakuli, wandia koja magula ga bahemba, ugapyagula na kitambala icho witungigije nacho.

⁶ Huna lulu wiza kuli Simoni Petro, ngʼwenuyo ungʼwila giki, Seba, wahaya kuno ja magulu gane?

⁷ Yesu ushosha ungʼwila giki, Iyo Nene nakwitaga, bebe utitegelejaga hambunyu; aliyo ulamana hanuma.

⁸ Petro ungʼwila giki, Utalanoja magulu gane welelo bose. Yesu unshokeja giki, Ulu natukoja bebe, uti na ngabo hamo na Nene.

⁹ Simoni Petro ungʼwila giki, Seba, iti magulu gane gike, aliyo na makono gane na ntwe gwane.

¹⁰ Yesu ungʼwila giki, Uyo wamalaga koga ati na nguno ya koga hangi numho magulu gakwe gike, iki ali ngʼwela nghana; na bingʼwe muli bela, aliyo iti bose.

¹¹ Iki Wei walamanile uyo wahaya kungʼwinha ko; kulwa mhayo uyu akahaya giki, Muti bela bose yaya.

¹² Huna lulu, aho wali umala kuboja magulu gabo, na kuzwala shizwalo shakwe, na kwigasha hangi, ubawila giki, Himba, mumanile iyo nangʼwitilaga bingʼwe?

¹³ Bingʼwe mukunitanaga giki, Nangi, na Seba; hene mukuhayaga ya wiza; iki ndi chene.

¹⁴ Ulu Nene, ndi Seba na Nangi, ulu nojaga magulu gingʼwe, bingʼwe hangi shingʼwigelile kwiyoja magulu benekele na benekele.

¹⁵ Iki nangʼwinhaga bingʼwe kigemelo, ngʼwite gitumo Nene nangʼwitilaga bingʼwe.

¹⁶ Nghana, nghana, namuwila giki, Nsese ati ntale kutinda seba wakwe; nulu ntungʼwa ati ntale kutinda ngʼwenuyo uwantuma.

¹⁷ Ulu ngʼwitegeleja yeniyi, muli ba lubango ulu ngʼwiyita.

¹⁸ Natuhayaga ya bingʼwe bose; nitegeleja benabo naabakoma; aliyo Shandikwa shishikilijiwe, giki, Ngʼwenuyo akulyaga ngati hamo na Nene, ngʼwene wanibukija ishigina lyakwe.

¹⁹ Kufuma haha namuwila kuko itali kubiza ho, huna lulu aho ikubiza ho, muzunye giki, Nene ndi Ngʼwene.

²⁰ Nghana, nghana, namuwila giki, Uyo ungʼwanukula uyo ose nalantuma, ngʼwene wananukula Nene; nanghwe uwananukula Nene, wangʼwanukula Uyo waanituma.

²¹ Yesu aho wamala kuhaya yeniyi, wiganiiija mu moyo, ukanila, uhaya giki, Nghana, nghana, namuwila giki, Umo wa mu bingʼwe akuninha ko.

²² Bahemba bali bilolalola benekele na benekele, butawatawa himba wanghaya nani?

²³ Walali ho ku meza umo wa bahemba bakwe asendamilile ha kikuba cha ngʼwa Yesu, uyo Yesu antogilwe.

²⁴ Simoni Petro unshinyela ngʼwenuyo, amuje giki, Ni nani uyo ulinghaya?

²⁵ Ngʼwenuyo usendamila ku kikuba cha ngʼwa Yesu, ungʼwila giki, Seba, ali nani?

²⁶ Yesu ushosha giki, Ali ngʼwenuyo nakunkogeja nilonge, na kungʼwinha. Aho uko ja nhonge ungʼwinha Yuda ngʼwana wa ngʼwa Simoni Iskariota.

²⁷ Hunaho, hanuma ya nhonge yeniyo, Shetani ungʼwingila ngʼwenuyo. Kulwa iyo Yesu ungʼwila giki, Iyo ukwitaga, itaga wangu.

²⁸ Walati ho nulu umo mu benabo abigashije ku meza wali witegeleja kulwa nguno ki Yesu wali ungʼwila giko.

²⁹ Iki bamo biganika giki, Iki Yuda walali dago mfuko, Yesu ungʼwila giki, Gulaga shinhu ishitwigelelilwre kulwa lushiku lutale, nulu hamo giki, abinhe bahabi shikolo.

³⁰ Huna lulu aho wei wamala kwanukula nhonge, utuma haho na haho, bubiza bujiku lulu.

³¹ Kuna lulu, aho wamala kufuma, Yesu uhaya giki, Hambunyu Ngʼwana wa munhu wakujiwagwa, na Mulungu wakujiwagwa muli Wei.

³² Ulu Mulungu wakujiwagwa muli Wei, Mulungu nanghwe alankuja muli Wei ngʼwenekele, hangi akunkuja haho na haho.

³³ Bana bado, kakanza kado natali ndi hamo na bingʼwe. Mulanikoba; na gitumo nali nubawila Bayudaya giki, Uko najile, bingʼwe mutudula kwiza ko; giko namuwila na bingʼwe haha.

³⁴ Kilagilo kipya nangʼwinha bingʼwe giki, Ngʼwitogwe benekele na benekele; gitumo na Nene naamutogwa bingʼwe, giko hangi na bingʼwe ngʼwitogwe benekele na benekele.

³⁵ Mu mhayo uyu bose bakumana giki, bingʼwe muli bahemba bane, ulu muli na kwitogwa benekele na benekele.

Yesu uhanga giki, Petro akunema (Mt. 26.33-35; Mk. 14.27-31; Lk. 22.31-34)

³⁶ Simoni Petro ungʼwila giki, Seba, ujile hali? Yesu unshokeja giki, Uko najile bebe utudula kunilondela ko haha; nahene ulanilondela hanuma.

³⁷ Petro ungʼwila giki, Seba, nene natudula kukulondela haha ni buli? Nakuwega ho bupanga wane kulwa nguno yako.

³⁸ Yesu unshokeja giki, Ukuwega ho bupanga wako kulwa nguno yane? Nghana, nghana, nakuwila giki, Nghungulume italahila kushisha ukunilema nghangala idatu.