Yohana 12 - Ilagano Ipya Lya

Yesu ulya sha kulagila Bethania

¹ Huna lulu aho Pasaka itali kushika, jasaga ho shiku itandatu, Yesu wali wiza Bethania, uko walali Lazaro, uyo wali ucha, ngʼwenuyo Yesu akanjucha mu bafu.

² Hunaho bunzugila sha kulagila; Martha ubinhilija shiliwa; Lazaro walali hamo nabo abali bigasha nanghwe kulya.

³ Hunaho Mariamu wali wenha latili imo ya maguta ga ngazu mela, ga mpango ngʼwingi, ubila magulu ga ngʼwa Yesu, upyagula magulu gakwe na nzwili jakwe; na numba yizula ngʼwaso gwa maguta.

⁴ Aliyo Yuda Iskariota, ngʼwana wa Simoni, umo wa bahemba bakwe, ngʼwenuyo wahaya kungʼwinha ko, uhaya giki,

⁵ Ni buli maguta genaya gakija kujinjiwʼa shilingi magana adatu na kwinhiwa bahabi?

⁶ Akahaya giko, iti giki, ubakalalwa bahabi yaya; aliyo iki walali ngʼwibi, hangi walali ndimiji wa mfuko, ubyutwala isho shutuulwa mo.

⁷ Kulwa iyo Yesu uhaya giki, Nekagi: wagabikaga ku lushiku lwa kugungʼwa kwane.

⁸ Iki a bahabi muli nabo hamo ningʼwe shiku jose; aliyo Nene, mutubiza na Nene shiku jose.

⁹ Hunaho ibita itale lya Bayudaya lyumana giki, ali ho henaho; nabo biza lulu, iti kulwa nguno ya ngʼwa Yesu wike, aliyo bamone Lazaro nanghwe hangi, ngʼwenuyo Wei akanjucha mu bafu.

¹⁰ Aliyo bagabiji batale bali bulomana mihayo bamulage nu Lazaro hangi;

¹¹ Iki kulwa nguno ya ngʼwenuyo bingi ba Bayudaya bali busama, bubyunzunya Yesu.

Yesu wingila Yerusalemi adamhilile kayobe

¹² Ku ntondo ibita itale lya benabo abali bizile ku lushiku lutale, aho bigwa giki, Yesu izile Yerusalemi,

¹³ Bubucha matambi ga matende, bufuma buja kunsumbila, buhamuka buhaya giki, Utupije haha; ali wa lubango Uyo wiza mu lina lya Seba, Ntemi wa Israeli.

¹⁴ Aho Yesu ubona ngʼwana wa nzobe, udamhila ho; gitumo gwaandikwa giki,

¹⁵ Utogohage, ngʼwana ngʼwaniki wa Sayuni; lolaga, Ntemi wako wiza adamhilile ngʼwana wa nzobe.

¹⁶ Mihayo iyi bahemba bakwe bali batitegeleja kwandia; aliyo aho Yesu wamala kukujiwa, hunaho bizukwa giki, mihayo iyi yaandikwa ya kuli Wei, hangi giki, bali bungʼwitila yeniyi.

¹⁷ Hunaho ibita lya banhu abali bali ho hamo nanghwe aho akangʼwitana Lazaro kufuma mu kigila, na unjucha mu bafu, bubyukanila.

¹⁸ Kulwa nguno iyi hangi ibita lyuja kunsumbila, iki bali bigwa giki, witile kimanikijo iki.

¹⁹ Hunaho Bafarisayo biwila boi bike giki, Ngʼwabonaga giki, mutudula kwita mhayo yaya? lolagi, ba mu si bose bakunondelaga.

Bagriki bukoba kumona Yesu

²⁰ Bali bali ho Bagriki bamo mu benabo abakulinhaga balamye mu lushiku lutale;

²¹ Benabo bungʼwegela Filipo, uyo wa Bethsaida ya Galilaya, bumuja, buhaya giki, Seba, tutogilwe kumona Yesu.

²² Filipo uja ungʼwila Andrea; huna lulu Andrea na Filipo bungʼwila Yesu.

²³ Yesu ubashokeja, uhaya giki, Ikanza lyashikaga, Ngʼwana wa munhu akujiwe.

²⁴ Nghana, nghana, namuwila giki, Ulu kabeke ka ngano katucha aho kugwa mu masalu, kakikalaga ho kiyene kike; aliyo ulu kucha, kakatwajaga matwajo mingi.

²⁵ Uyo wabutogwa bupanga wakwe, alabuyagaja; nanghwe uyo wabukolwa bupanga wakwe mu si iyi, alabulinda kushisha ku bupanga butushila.

²⁶ Munhu ose ulu unitumamila, unilondele: hangi aho ndi Nene, henaho ntumami wane nanghwe alabiza ho, munhu ose ulu unitumamila, ngʼwenuyo Baba alankumilija.

²⁷ Hambunyu bupanga wane bukwiganilijaga; nahaye ki lulu? Baba, nipijage kuninja ngʼwikanza ili. Aliyo kulwa nguno iyi nashikaga kwikanza ili.

²⁸ Baba, likujage lina lyako. Hunaho ilaka lyiza kufuma ngʼwigulu giki, Nene nakalikuja, na Nene nakulikuja hangi.

²⁹ Huna lulu ibita lya banhu abali bimila ho, bigwa ilaka, buhaya giki, Yalumaga mbula; bangi buhaya giki, Malaika walungalungaga nanghwe.

³⁰ Yesu ushosha uhaya giki, Ilaka lyenili litizile kulwa Nene, aliyo kulwingʼwe.

³¹ Hambunyu kuli ho kulekanyiwa nsango kwa si yeniyi; hambunyu ntale wa si yeniyi akuponyiwa hanze.

³² Na Nene, ulu nabuchiwe kufuma ha si, nakubadutila kuli Nene banhu bose.

³³ Mhayo uyu wali uhaya ya kumanicha kachile kakwe umo alihaya kucha.

³⁴ Hunaho ibita lyunshokeja giki, Biswe tukigwaga mu shilagilo giki, Kristo alikala ho welelo na welelo; na Bebe ulihaya kinahe giki, Ngʼwana wa munhu shingʼwigelelilwe kubuchiwa? Ngʼwana wa munhu Ngʼwenuyo ali nani?

³⁵ Kulwa iyo Yesu ubawila giki, Kakanza kado isana litali hamo ningʼwe. Shiminzagi aho mutali muli nalyo isana, giiti kitizumupandika. Uyo akushiminzilaga mu giiti atamanile uko ajile.

³⁶ Aho mutali muli nalyo isana, mulizunye isana, bingʼwe mugaluke kubiza bana ba isana. Yesu aho wamala kulungalunga mihayo iyi, uja kungi, wibisa mu miso gabo.

³⁷ Aliyo nulu wiitaga shimanikijo shingi giko mu miso gabo, nahene, bali batunzunya;

³⁸ Mhayo gwa nghangi Isaya gushi-kilijiwe, uyo waahaya giki, Seba, nani wazunije mihayo yiswe? Nulu nkono gwa Seba gwakundulilwe kuli nani?

³⁹ Kulwa mhayo uyu bali batudula kuzunya, iki Isaya uhaya hangi giki,

⁴⁰ Wababokugije miso gabo, na ngholo jabo wajilambije; batizubona na miso gabo, nulu kwitegeleja na ngholo jabo, bagaluke, na Nene nabapije.

⁴¹ Mihayo iyo akahaya Isaya aho akabona ikujo lyakwe, hangi wali unghaya Wei.

⁴² Aliyo nahene, nulu mu batale bingi banzunije, aliyo kulwa nguno ya Bafarisayo batatambulile, batizupejiwa ngʼwibilingilo.

⁴³ Iki bali batogilwe ikujo lya banhu, kutinda ikujo lya Mulungu.

⁴⁴ Yesu uhamuka uhaya giki, Uyo wanizunya Nene, atunizunya Nene wike, aliyo wanzunya Ngʼwenuyo waanituma.

⁴⁵ Nanghwe uyo wanilola Nene, akunolaga Ngʼwenuyo waanituma.

⁴⁶ Nene nizile ndi isana mu si, munhu ose uwanizunya atizikala mu giiti.

⁴⁷ Na munhu ose ulu wigwa mihayo yane, na buyidima yaya, Nene natunekanya nsango; iki natizile kubalekanya nsango ba mu si, aliyo kubapija ba mu si.

⁴⁸ Uyo unilema Nene, hangi atanukulaga mihayo yane, ali nanghwe uyo wa kunekanya nsango; mhayo uyu nagulungalungile, gwenuyo gulanekanya nsango ha lushiku lwa ku bukalikijo.

⁴⁹ Iki nali natalungalungile yane ya ngʼwenekele; aliyo Baba uwaanituma, Ngʼwenuyo waaninha kilagilo, iyo nahaye, hangi iyo nalungalunge.

⁵⁰ Hangi namanile giki, kilagilo chakwe chene bupanga butushila; kulwa iyo, mihayo iyi naalungalungaga, naalungalungaga gitumo na Baba waaniwila.