Yohana 10 - Ilagano Ipya Lya

Ndimi wa wiza

¹ Nghana, nghana, namuwila giki, Uyo atingilila mu nyango kwingila mu lubigili lwa ngholo, aliyo ulinhila kungi, ngʼwenuyo ali ngʼwibi na nsambo.

² Aliyo uyo wingilila mu nyango ngʼwene ndimi wa ngholo.

³ Ngʼwenuyo nugaji ungʼwigulila; na ngholo najo jigwa ilaka lyakwe; ujitana ngholo jakwe na mina gajo, ujitwala hanze.

⁴ Aho wamala kujichilula ngholo jakwe, unitongela, na ngholo jakwe junondela, iki jimanile ilaka lyakwe.

⁵ Ngeni jitunondela yaya, aliyo jikumpela, iki jitamanile ilaka lya bageni.

⁶ Lusumo ulu Yesu ubawila, aliyo benabo bali batumana mihayo umo ili iyo ulungalunga nabo.

⁷ Kulwa iyo Yesu ubawila hangi giki, Nghana, nghana, namuwila giki, Nene ndi nyango gwa ngholo.

⁸ Abo bose abali biza aho natali Nene bene bibi na basambo; aliyo ngholo jali jitubigwa.

⁹ Nene ndi nyango; munhu ose ulu wingilila mo muli Nene, akupijiwa, akwingila, hangi abufuma, hangi akubona idimilo.

¹⁰ Ngʼwibi atiza ulu iti kulwa kwiba na kubulaga na kukenagula: Nene nizile babize na bupanga, hangi babize nabo wa buyaga.

¹¹ Nene ndi ndimi wa wiza; ndimi wa wiza akuwinhaga ko bupanga wakwe kulwa ngholo jakwe.

¹² Aliyo ngʼwitumamija wa mhela, uyo ati ndimi, uyo ngholo jiti jakwe, aho ubona mhuge iliza, ujileka ngholo, upela; na mhuge yujipula ngholo, yujibalasanya.

¹³ Ngʼwitumamija wa mhela upela iki ali ngʼwitumamija wa mhela, nanghwe atajikalalilwe ngholo.

¹⁴ Nene ndi ndimi wa wiza; najimanile ijili jane, najo jane jinimanile Nene.

¹⁵ Gitumo Baba animanile, na Nene namanile Baba; hangi nawinha ko bupanga wane kulwa ngholo.

¹⁶ Hangi ndi najo ngholo jingi, ijiti ja lubigili lwenulu; jenijo najo shinigelile kujenha, najo jiligwa ilaka lyane; na Ulabiza idale limo, na ndimi umo.

¹⁷ Kulwa nguno iyi Baba antogilwe, iki nawinha ko bupanga wane, huna nabubuche hangi.

¹⁸ Ati ho munhu wa kunitagija bupanga wane, aliyo nawinha ko Nene ngʼwenekele. Ndi nabo budula wa kuwinha ko, hangi ndi nabo budula wa kububucha hangi. Kilagilo cheniki naanukula kuli Baba.

¹⁹ Kwali kubiza ho kulekana hangi mu Bayudaya kulwa mihayo iyi.

²⁰ Bingi mu bo buhaya giki, Ali nalyo isamva, hangi ali nsaji; mukungʼwigwaga ni buli?

²¹ Bangi buhaya giki, Mihayo iyi, iti ya ngʼwa uyo ali nalyo isamva. Angu, isamva lyadula kufumbula miso ga baboku?

Yesu ulanga bumulungu wakwe

²² Jali jubiza ho shiku nhale ja kegeje mu Yerusalemi; mu shiku ja mbeho.

²³ Na Yesu ubyushiminza mu hekalu ngʼwibindo lya ngʼwa Solomoni.

²⁴ Hunaho Bayudaya bali bumpindya, bungʼwila giki, Ukututabyatabya kushisha nanali? Ulu Bebe uli Kristo, tuwilage hape.

²⁵ Yesu ubashokeja giki, Nakamuwila, ningʼwe mutuzunyaga: shitile isho nakwitaga mu lina lya ngʼwa Baba, i shene shunikanila.

²⁶ Aliyo bingʼwe mutuzunyaga, iki muti ba ngholo jane, gitumo naali namuwila.

²⁷ Ngholo jane jikwigwaga ilaka lyane, na Nene najimanile, najo junilondela;

²⁸ Hangi najinha bupanga butushila; najo jitalayagala welelo na welelo, hangi ati ho uyo wadula kujipula mu nkono gwane.

²⁹ Baba uwaaninha, ali ntale kutinda bose; hangi ati ho nulu umo uyo wadula kujipula mu nkono gwa ngʼwa Baba.

³⁰ Nene na Baba tuli umo.

³¹ Hunaho Bayudaya bugasola mawe hangi, giki, Bamponde.

³² Yesu ubashokeja giki, Shitile shingi sha wiza nakangʼolekejaga bingʼwe sha kufuma kuli Baba; kulwa chitile ki musho mulihaya kuniponda mawe?

³³ Bayudaya bunshokeja buhaya giki, Kulwa chitile cha wiza tutukuponda mawe; aliyo kulwa kunduka Mulungu; hangi iki Bebe, uli munhu wike, wiyita ngʼwenekele Mulungu.

³⁴ Yesu ubashokeja giki, Angu, gutandikile mu shilagilo shingʼwe giki, Nene nali nuhaya giki, Bingʼwe muli bamulungu?

³⁵ Ulu wali ubitana benabo bamulungu, abo mhayo gwa Mulungu gwali gwiza kubo (na Shandikwa shitudula kutungulwa);

³⁶ Ngʼwenuyo Baba waangʼweja, hangi waantuma mu si, mulingʼwila giki, Bebe ukundukaga Mulungu; iki nuhaya giki, Ndi Ngʼwana wa Mulungu?

³⁷ Ulu natitaga shitile sha ngʼwa Baba, mutizunizunya;

³⁸ Aliyo Nene ulu nakushitaga, nulu ulu mutunizunya Nene, mushizunyage shitile isho; mumane hangi muzunye giki, Baba ali muli Nene, na Nene muli Baba.

³⁹ Bukoba hangi kundima; nanghwe ufuma mu nkono gwabo.

⁴⁰ Wali winga ho uja hangi ku nkilo gwa Yordani kwipande uko Yohana wali wandia kubatija; wikala kwenuko.

⁴¹ Na bingi bali biza kuli Wei; nabo buhaya giki, Yohana walatitile kimanikijo nulu kimo; aliyo mihayo yose iyo Yohana wali unghaya Ngʼwenuyu yubiza ya nghana.

⁴² Na banhu bingi bali bunzunya kwenuko.