Yohana 1 - Ilagano Ipya Lya

Bumulungu wa ngʼwa Yesu Kristo

¹ Kwandia na kwandia walali ho Mhayo, na Mhayo walali ho hamo na Mulungu, nanghwe Mhayo walali Mulungu.

² Ngʼwene Uyo kwandia na kwandia walali ho hamo na Mulungu.

³ Shinhu shose shali shubejiwa nanghwe; na ulu Wei ni walatukibeja, ni kiti ho kinhu chaabejiwa, mu isho shaabejiwa.

⁴ Bupanga bukabizaga muli Wei, na bupanga wenubu bubiza isana lya banhu.

⁵ Nalyo isana likubakaga mu giiti, na giiti chali kitulitegeleja.

⁶ Walali ho munhu wali utungʼwa na Mulungu, lina lyakwe Yohana.

⁷ Ngʼwenuyo wali wiza kulwa bukaniji, alikanile isana, bose bazunye kulwakwe.

⁸ Ngʼwenuyo walati isana ilo, aliyo wali wiza kulikanila isana.

⁹ Ilo lyene isana lya nghana, ilyungʼwakila buli munhu ose uwiza mu si.

¹⁰ Walali mu si, na si yaabejiwa nanghwe, nayo si yali itumana Wei.

¹¹ Akiza ku shakwe, nabo a bakwe bali batungʼwanukula.

¹² Aliyo bose abungʼwanukula, ubinha budula wa kubiza bana ba Mulungu, ku abo abulizunya lina lyakwe;

¹³ Abubyalwa, iti mu mininga, nulu iti mu kutogwa kwa mili, nulu iti mu kutogwa kwa munhu, aliyo kwa Mulungu.

¹⁴ Na Mhayo ugaluka kubiza mili, wali upanga ku biswe, twali tubona ikujo lyakwe, ikujo giti lya Ngʼwana waabyalwa umo wike na Ise, izulile na kigongo na nghana.

Kukanila kwa ngʼwa Yohana Matija

¹⁵ Yohana wali unkanila, uhamuka, uhaya giki, Uyu hu na Ngʼwene nakanghaya giki, Uyo izile hanuma yane, wabizaga ku butongi wane, iki Wei waanitanga.

¹⁶ Na kufuma mu kokala kwakwe biswe bose twaanukula, na kigongo higulya ya kigongo.

¹⁷ Iki shilagilo shiinhiwa muli Musa, kigongo na nghana shizile muli Yesu Kristo.

¹⁸ Ati ho munhu uwamona Mulungu kufuma kale; Ngʼwana waabyalwa umo wike, Uyo ali mu kikuba cha ngʼwa Siswe, u Ngʼwene waangʼwelecha.

¹⁹ Ubu u wene bukaniji wa ngʼwa Yohana, aho Bayudaya bali bubatuma bagabiji na ba Lawi kufuma Yerusalemi bamuje giki, Bebe uli nani?

²⁰ Nanghwe wali utambula, atalemile; utambula giki, Nene nati Kristo.

²¹ Nabo bumuja giki, Kinahe lulu? Bebe uli Eliya? Nanghwe uhaya giki, Yaya, nati ngʼwene. Bebe uli nghangi Uyo? Ushosha giki, Yaya.

²² Huna lulu bungʼwila giki, Uli nani lulu, tukabashokeje ishosho abatutumaga. Ukwihayaga kinahe?

²³ Uhaya giki, Nene ndi ilaka lya munhu akuhamukaga mu bu giki, Gololagi nzila ya Seba, gitumo wali uhayila u nghangi Isaya.

²⁴ Nabo abali butungʼwa bali bali ba mu Bafarisayo.

²⁵ Bumuja, buhaya giki, Bebe lulu ukubatijaga ni buli, ulu uti Kristo, nulu Eliya, nulu nghangi Uyo?

²⁶ Yohana ubashokeja, uhaya giki, Nene nakubatijaga na minzi; aliyo imilile mu bingʼwe, Uyo bingʼwe mutamanile.

²⁷ U ngʼwene Uyo izile hanuma yane, uwabizaga ku butongi wane, nulu nene natigelelilwe kutaligula nkoba gwa kilatu chakwe.

²⁸ Yeniyi yali yubiza Bethania, ku nkilo gwa Yordani, uko ubyubatigija Yohana.

²⁹ Ku ntondo Yohana umona Yesu izile kuli wei, uhaya giki, Lolagi Ngʼwana wa ngholo wa Mulungu, Uyo akushibuchaga shibi sha ba mu si!

³⁰ Uyo hu Ngʼwene nakanghaya giki, Hanuma yane izile ngosha, Uyo wabizaga ku butongi wane, iki Wei waanitanga.

³¹ Nane nali natamanile Wei: aliyo olechiwe hape ku ba Israeli, kulwa nguno iyi hu yene nizile nene nubyubatija na minzi.

³² Yohana ukanila, uhaya giki, Namala kumona Moyo Ngʼwela akwikaga giti nghuulu kufuma ngʼwigulu, nanghwe wikala higulya hali Wei.

³³ Nane nali natamanile Wei; aliyo Uyo waanituma kubatija na minzi, u Ngʼwene waaniwila giki, Uyo ulamona Moyo kungʼwikiila na kwikala higulya hali Wei, hu Ngʼwene wa kubyubatija na Moyo Ngʼwela.

³⁴ Nane namala kubona, hangi nakanilaga giki, Uyu hu Ngʼwene Ngʼwana wa Mulungu.

Bahemba ba ngʼwa Yohana bunondela Yesu

³⁵ Ku ntondo hangi Yohana wali wimilile hamo na bahemba bakwe babili.

³⁶ Aho unola Yesu alishiminza, uhaya giki, Lolagi Ngʼwana wa ngholo wa Mulungu!

³⁷ Bahemba babili benabo bungʼwigwa uhaya giko, bunondela Yesu.

³⁸ Yesu ugaluka, ubabona balinondela, ubawila giki, Ngʼwakoba ki? Bungʼwila giki, Rabbi (kushomelejiwa kwago giki, Nangi) ukikalaga hali?

³⁹ Ubawila giki, Nzugwi mubone. Buja lulu, bukabona aho wiikalaga; nabo bikala hamo nanghwe lushiku lwenulo: yali ili giti saa ikumi.

⁴⁰ Andrea, ngʼwana wa ngʼwawe wa Simoni Petro, walali umo wa benabo babili abali bungʼwigwa Yohana, huna bunondela.

⁴¹ Uyo umona ngʼwana wa ngʼwawe Simoni kwandia, ungʼwila giki, Twamonaga Masiya, (kushomelejiwa kwago giki, Kristo).

⁴² Untongela kuli Yesu. Yesu unola, uhaya giki, Bebe uli Simoni, ngʼwana wa ngʼwa Yona; ulitanwa Kefa, (kushomelejiwa kwago giki, Petro).

Filipo na Nathanaeli bunondela Yesu

⁴³ Ku ntondo Yesu walatogilwe kwinga kuja Galilaya, umona Filipo, ungʼwila giki, Nilondelage.

⁴⁴ Aliyo Filipo walali wa Bethsaida, wa nzengo gwa ba Andrea na Petro.

⁴⁵ Filipo umona Nathanaeli, ungʼwila giki, Twamonaga Uyo waandikwa na Musa mu shilagilo, na bahangi, Yesu ngʼwana wa ngʼwa Yusufu, wa Nazareti.

⁴⁶ Nathanaeli ungʼwila giki, Mu Nazareti chadula kufuma mo kinhu cha wiza? Filipo ungʼwila giki, Nzugu ubone.

⁴⁷ Yesu aho umona Nathanaeli izile kuli Wei, unghaya giki, Nolagi uyu muna Israeli gete gete, muli wei bulembalembi buti mo.

⁴⁸ Nathanaeli ungʼwila giki, Wanimana kinahe? Yesu ushosha ungʼwila giki, Aho Filipo walatali kukwitana, aho waluli mu mbeho ya nti ntini, nakakubona.

⁴⁹ Nathanaeli ushosha ungʼwila giki, Rabbi, Bebe uli Ngʼwana wa Mulungu, huna Bebe uli ntemi wa Israeli.

⁵⁰ Yesu ushosha ungʼwila giki, Iki nakuwila giki, Nakakubona mu mbeho ya ntini, wazunya? ulabona mihayo mitale ya kukila iyi.

⁵¹ Ungʼwila giki, Nghana, nghana, namuwila giki, Kufuma haha mukubona igulu lyiguka, na bamalaika ba Mulungu bakulinhaga na bakwikaga hali Ngʼwana wa munhu.