Yakobo 5 - Ilagano Ipya Lya

Nsango gwa sabo ja bunyecha

¹ Ali lulu, bingʼwe basabi, lilagi na lijagi ngʼwano kulwa luduko ulo lulangʼwiziila.

² Busabi wingʼwe waabola, na shizwalo shingʼwe shaaliwa na fufuji.

³ Zahabu jingʼwe na feza jingʼwe jaakeleba; na bukelebu wajo bulabiza bukaniji ku bingʼwe, nabo bulalya mibili yingʼwe giti moto. Bingʼwe ngʼwaabika busabi wingʼwe ku shiku ja nghalilo.

⁴ Lolagi, mhela ya batumami abali bugesa migunda yingʼwe, iyo ngʼwaabanyekeja, yana: na kwana kwabo abagesa kwaashika mu matu ga Seba wa mabita.

⁵ Ngʼwiyegije mu si, hangi ngʼwitile iyo mutogilwe; ngʼwiilisha ngholo jingʼwe giti mu lushiku lwa kubulaga mitugo.

⁶ Ngʼwaanekanya nsango na ngʼwamulagile ntungilija; nanghwe atumuhangijaga.

Bazunya biyumilije mu kuluhiwa

⁷ Kulwa iyo, badugu, iyumilijagi kushisha kwiza kwa Seba. Nolagi nimi akulindilaga matwajo ga mpango ga mu si, ugagoyela kushisha gabone mbula ya kwandia na ya hanuma.

⁸ Giko ningʼwe iyumilijagi; muhandikilage mu ngholo jingʼwe: iki kwiza kwa Seba kuli hihi.

⁹ Badugu, mutizidugumila benekele na benekele, muleke kulekanyiwa nsango; lolagi, nekanya wa nsango imilile ha nyango.

¹⁰ Badugu, idedekanyagi u kuluhiwa na kwiyumilija kwa bahangi abali bahaya mu lina lya Seba, mubalondele.

¹¹ Lolagi, twabahaya benabo abiyumilija giki, bali ba lubango: ambu ngʼwigwile mihayo ya kwiyumilija kwa ngʼwa Yobu, hangi ngʼwaabona bukalikijo wa Seba, gitumo Seba okalile na kusatwa na kuchila kigongo.

¹² Aliyo kutinda mihayo yose, badugu bane, mutizulahila, nulu kwigulu nulu ku si, nulu kilahilo kingi chose: aliyo ee yingʼwe leke ibize ee, na yaya yingʼwe leke ibize yaya; mutizugwilwa na nsango.

Budula wa kulomba kwa kuzunya

¹³ Ali ho mu bingʼwe uwayugulwa? Alombe. Ali ho uyo ali na buyegi? Imbe mimbo ga kulumba.

¹⁴ Ali ho mu bingʼwe uwasatile? Abitane banamhala ba kanisa; banombele, bamile na maguta mu lina lya Seba:

¹⁵ Na kulomba kwa kuzunya kukumpija nwile, na Seba akungungumula; na ulu witile shibi, akukuulilwa.

¹⁶ Kulwa iyo ngʼwitambulilage shibi shingʼwe benekele na benekele, hangi ngʼwilombelage, mupijiwe. Kulomba kwa munhu ntungilija kuli na budula no mu kwita kwako.

¹⁷ Eliya walali munhu wa kitungilwe giti biswe, nanghwe ujangila kulomba mbula itizutula; na mbula yali yukija kutula ha si miaka idatu na mieji itandatu.

¹⁸ Nanghwe ulomba hangi; na mbula yufuma ngʼwigulu, na si yutwaja matwajo gayo.

¹⁹ Badugu bane, ulu ali ho mu bingʼwe munhu uwaahuba kwinga mu nghana, na umo ungalucha;

²⁰ Amane giki, uyo ungalucha nkenaguji kwinga mu buhubi wa nzila yakwe, akupija moyo kufuma mu kucha, hangi akukundikija shibi shingi.