Yakobo 4 - Ilagano Ipya Lya

Kunonya busumba na si ili wanishi kuli Mulungu

¹ Bulugu na wilwisha ubuli mu bingʼwe shufuma hali? Shitufumaga mu kwikumva kwingʼwe ukukulwaga mu mabulungilo gingʼwe?

² Ngʼwikumva, na mutubona kinhu; ngʼubulaga na ngʼwita wilu na mutubona kinhu. Ngʼwita bulugu ngʼwalwa, na mutubona kinhu iki mutulomba.

³ Ngʼwalomba na kwinhiwa yaya iki ngʼwalomba kibi, iki ngʼwakoba sha kwitila kwikumva kwingʼwe.

⁴ Bingʼwe bashihani, bagosha na bakima, mutamanile giki, kunonia busumba na si wene wanishi kuli Mulungu? Ali lulu, uyo atogilwe kunonia busumba na si, ngʼwene wigalucha kubiza ngʼwanishi kuli Mulungu.

⁵ Himba ngʼwiganika giki, i Shandikwa shihayile dalali giki, Moyo uyo akwikalaga mu biswe ali na kwikumva kushika mu wilu?

⁶ Aliyo Wei akutwinhaga kigongo chingi kutinda; iki Shandikwa shihayile giki, Mulungu akubahangijaga a badoshi; aliyo a bidoheleja akubinhaga kigongo.

⁷ Kulwa iyo, nyehelagi Mulungu; nghangijagi Shetani, nanghwe akumupela.

⁸ Ngʼwegelagi Mulungu, nanghwe akungʼwegela bingʼwe. Ejagi makono gingʼwe bingʼwe ba shibi, jejagi ngholo jingʼwe bingʼwe ba ngholo ibili.

⁹ Ipinihajagi, mulile nghungu, mulile. Kuseka kwingʼwe kugaluke kubiza kulila nghungu, na buyegi wingʼwe bugaluke kubiza bupina.

¹⁰ Ngʼwidohye mu butongi wa Seba, nanghwe alamugunguhya.

Utizunghaya kibi ndugu wako

¹¹ Mutisigage benekele na benekele, badugu bane. Uyo wansiga nduguye, nulu kunekanya nduguye, ngʼwenuyo wasiga shilagilo, na ushilekanya shilagilo. Aliyo ulu bebe ushilekanya shilagilo, uti ngʼwiti wa shilagilo yaya, numho uli nekanya washo.

¹² Ngʼwinhi wa shilagilo na nekanya ali umo wike, Uyo ali na budula kupija nulu kuyagaja. Bebe uli nani ulinekanya ngʼwiyo?

Bupanga wa mili buli ho ikanza ido gwike

¹³ Ali lulu, a bingʼwe abo mukuhayaga giki, Lelo nulu ntondo tukuja ngʼwigunguli ilebe, tukulimuka ko ngʼwaka gumo, tulabyukwaba tuhone solobo;

¹⁴ Aliyo mutamanile iyo ilabize ho ntondo. Bupanga wingʼwe buli ki? Ambu wene buli ikunguku ililonga kakanza kado, hanuma lyushila.

¹⁵ Hambuhambu ni ngʼwahaya giki, Ulu Seba utogwa, tukwikala bapanga, tulita giki nulu giki.

¹⁶ Ali gisi ngʼwikumilija mu budoshi wingʼwe; kwikumilija ukuli giko kuli kwa bubi.

¹⁷ Ali lulu, uyo amanile kwita ya wiza na kwita yaya, kuli ngʼwenuyu shene shibi.