Yakobo 2 - Ilagano Ipya Lya

Kusolanya kulemegije mu bazunya

¹ Badugu bane, kuzunya kwa kuli Seba Yesu Kristo, u Seba wa ikujo, kutizubiza kuli na soldo mu banhu.

² Iki ulu wingila ngʼwibilingilo lyingʼwe munhu azwalile sili ya zahabu na shizwalo sha wiza, hanuma wingila na nghabi wa shizwalo sha bubi;

³ Ningʼwe ngʼwangʼwinha ikujo uyo azwalile shizwalo sha wiza, na ngʼwangʼwila giki, Igashaga aha ha wiza, aliyo u nghabi ngʼwangʼwila giki, Bebe, imilaga uko, nulu igashaga ha si ku bupandijo wane,

⁴ Angu, muti na kusolanya mu ngholo jingʼwe, na ngʼwabiza balekanya abo muli na maganiko ga bubi?

⁵ Degelekagi badugu bane batogwa, Angu, Mulungu atabasolile abali bahabi mu si, babize basabi ba buzunya na bingiji ba butemi ubo ubisagija abatogilwe?

⁶ Aliyo bingʼwe ngʼwangʼwibengelegije nghabi. Angu, a basabi batungʼwiboneelaga bingʼwe, bumuduta kumutwala ku butongi wa masumbi ga kulekanija misango?

⁷ Angu, bati bene abuliduka lina lya wiza ilo ngʼwitanwa mulyo?

⁸ Aliyo ulu ngʼukishikilija kilagilo cha kitemi gitumo chandikilile giki, Ulantogagwe nzenganwa ngʼwiyo gitumo witogelilwe bebe ngʼwenekele, numho ngʼwita chiza.

⁹ Aliyo ulu ngʼubiza na sololo mu banhu, ngʼwita shibi, ngʼwakanilijiwa na shilagilo giki, muli bakenaguji.

¹⁰ Iki munhu ose uyo ushidima shilagilo shose, aliyo ukenagula mu mhayo gumo, ngʼwene wabiza nkenaguji mu shose.

¹¹ Iki uyo waahaya giki, Utalizushihya, uhaya na giki, Utalizubulaga. Ali lulu, ulu utashihyaga, aliyo ubulaga, uli nkenaguji wa shilagilo shose.

¹² Lungalungagi giko, na itagi giti banhu abalalekanyiwa nsango mu kilagilo cha butungulwa.

¹³ Iki nsango gutunchila kigongo uyo atachilaga kigongo: nako kuchila kigongo kukwikumilijaga ku nsango.

¹⁴ Ikubelela kinahe, badugu bane, ulu munhu wihaya giki, ali na kuzunya, aliyo ati na Shitwa? Angu, buzunya ubo wadula kumpija?

¹⁵ Ulu ndugu ngosha nulu nkima ali duuhu na ati na shiliwa,

¹⁶ Na umo wa mu bingʼwe ubawila giki, Jagi na mhola, mulunguje, ngʼwigute; aliyo atabinhile isho bagayiwa mu mili; ikubelela kinahe?

¹⁷ Na giko kuzunya ukuti na Shitwa kuchile mu koi kwenekele.

¹⁸ Aliyo ulu munhu uhaya giki, Bebe uli na kuzunya, na nene ndi na Shitwa: nolekejage buzunya wako ubuti na Shitwa, na nene nakukolekeja buzunya wane kulwa Shitwa shane.

¹⁹ U bebe wazunya giki, Mulungu ali umo wike: nahene, watungilija: na masamva nago guzunya na kuzuguma.

²⁰ Aliyo utogilwe kumana, bebe munhu uyo uti kinhu, giki, kuzunya ukuti na Shitwa kuli dalali?

²¹ Angu, u Abrahamu nkulugenji wiswe walatutungiligijiwa kulwa Shitwa, aho wali umfunya ngʼwana wakwe Isaaka ha ngʼwalilo?

²² Wahona lulu gitumo kuzunya kwali kwitila hamo na Shitwa shakwe, na kulwa Shitwa kuzunya kwali kushikana?

²³ Huna shushikilijiwa i Shandikwa ishihayile giki, Abrahamu unzunya Mulungu, nako kuzunya kwakwe kubalilwa kuli wei kubiza butungilija: nanghwe witanwa giki, Nwani ngʼwiye wa Mulungu.

²⁴ Ngʼwabona lulu giki, munhu akubalilagwa butungilija kulwa Shitwa, iti kulwa kuzunya ko kwiyene.

²⁵ Angu, Rahabu u ngʼwimilizu nanghwe walatutungiligijiwa kulwa Shitwa, kulwa nguno ya kubegeleja badati na kubafunija hanze baje mu nzila yingi?

²⁶ Iki giti mili ulu guti na moyo guchile, na kuzunya ulu kuti na Shitwa nako kuchile giko.