Yakobo 1 - Ilagano Ipya Lya

Kugengʼwa kwa kuzunya na nguno yaho

¹ Yakobo, nsese wa Mulungu na wa Seba Yesu Kristo, ku ba ngʼanda ikumi na ibili ijasalanghanile, namugisha.

² Badugu bane, balagi kubiza buyegi aho ngʼwilongelwa na kugengʼwa kungi na kungi,

³ Managi giki, kugengʼwa kwa buzunya wingʼwe kukwenhaga kwiyumilija.

⁴ Aliyo kwiyumilija shigelile kubize na nimo gwako gushikile, mubize abashikile na bashikanu, abatagehelilwe mhayo gose.

⁵ Aliyo munhu ose mu bingʼwe ulu ugehelwa masala, anombe Mulungu, Uyo akabinhaga bose mu wila, atajahalilaga; nanghwe akwinhiwa.

⁶ Aliyo alombe na kuzunya, atizubiza na kususanya; iki uyu ususanya abange na ihuli lya mu nyanza ilyutwalwa na nyaga, na kulibangulwa ipande na ipande.

⁷ Ulu munhu ali giko, atiziganika giki, akwanukula mhayo gose kufuma kuli Seba.

⁸ Munhu wa ngholo ibili ali na magalugalu mu nzila jakwe jose.

⁹ Ndugu uyo ati na ishima ayege iki wagunguhiwa;

¹⁰ Aliyo nsabi ngʼwene mu kudohiwa kwakwe: iki alashila giti bulabo wa maswa.

¹¹ Iki aho limi lyufuma na kupembeka na nguzu, lyugajija maswa; na bulabo wago buhululuka, na wiza wa wikole wago bugaya ho; giko na nsabi nanghwe alanyala mu nzila jakwe.

¹² Ali wa lubango uyo wiyumilija mu kugengʼwa; iki ulu upyena alanukula ngikili ya bupanga, iyo Seba waabisagija abantogilwe.

Kugengʼwa kwa kwita shibi kutafumaga kuli Mulungu

¹³ Munhu, ulu ugengʼwa, atizuhaya giki, Nagengʼwa na Mulungu: iki Mulungu atagemagwa na bubi, giko nanghwe Ngʼwenekele atangemaga munhu ose.

¹⁴ Aliyo buli munhu akugemagwa ulu udutwa na ulembalemva na kwikumva kwakwe ngʼwenekele.

¹⁵ Hunaho kwikumva aho kwa mala kutunga nda, kubyala shibi, na shibi aho shukula shubyala kucha.

¹⁶ Mutilembalembage, badugu bane batogwa.

¹⁷ Buli cha kwinha cha wiza, na buli cha kwinhiwa ikishikile, shufuma ngʼwigulya, shiika kufuma kuli Siswe wa masana, kuli Wei gati ho magalugalu, nulu nengeji gwa kugalukagaluka.

¹⁸ Kulwa kutogwa kwakwe waatubyala biswe na mhayo gwa nghana, tubize matwajo ga kwandia ga shisengʼwa shakwe.

Kwigwa na kwita yaya kuti na ngofyolo

¹⁹ Ali lulu, badugu bane batogwa, buli munhu abize na shigwamatu, atizubiza ngʼwangu kuhaya, nulu ngʼwangu kupelana:

²⁰ Iki bupelanu wa munhu butitaga butungilija wa Mulungu.

²¹ Kulwa iyo kungulagi busoso bose na wingi wa sha malofu, gwanukulagi na bulyehu mhayo ugubiwa mu bingʼwe, uguli na budula kumupija bupanga wingʼwe.

²² Aliyo mubize biti ba mhayo, iti badegeleki gwike na kwilembalemba bingʼwe benekele.

²³ Iki buli munhu ose ulu ubiza ndegeleki wa mhayo duhu, aliyo kwita yaya, ngʼwenuyo abange giti munhu u wa kwilola bushu wakwe ngʼwilole:

²⁴ Aho umala kwiiola, uja, wiba suso yakwe umo ali.

²⁵ Aliyo uwakalalila mu kilagilo kushikanu, i cha butungulwa, na wikala mo, ati ndegeleki ngʼwibi, aliyo ali ngʼwiti wa mhayo, ngʼwenuyo alabiza wa lubango mu kwita kwakwe.

²⁶ Munhu ulu wiganika giki, ali na kitumamile cha nyazunya, nanghwe atululemeja lulimi lwakwe aliyo wilembalemba ngholo yakwe, munhu ngʼwenuyo kitumamile chakwe cha nyazunya chene cha dalali.

²⁷ Kitumamile chela cha nyazunya ikiti na kilingo mu butongi wa Mulungu na Siswe chene kili giki, Kuja kubalola bapina abati na basabo, na bakima bachilwa mu makoye gabo, na hangi kwilinda ngʼwenekele ati na mako mu si.