Tito 3 - Ilagano Ipya Lya

¹ Ubizukije bubalyehela basugi na ba budula, na kubigwa, na kubiza bamalilile ku nimo gose gwa wiza.

² Batizunsiga munhu kibi, batizubiza na buyombo, aliyo babize bapolo, bolekeje bufula bose ku banhu bose.

Ba kanisa balagilwa giki, bite sha wiza

³ Iki biswe niswe twali tuli bachilu i kale, na ba kitigwa, na balemva, twali tukutumamila kwikumva na kwiyeja kungi na kungi, twali twikala na isubi na wilu, na busayi, na twikolwa benekele na benekele.

⁴ Aliyo aho wiza-ngholo wa Mulungu Mpija wiswe, na butogwa wakwe kubanhu bukilonga,

⁵ Iti kulwa shitile sha butungilija isho twaashitaga, aliyo gitumo kuchila kigongo kwakwe umo kuli, waatupija mu kojiwa kwa kubyalwa kupya na kudoganya kwa Moyo Ngʼwela,

⁶ Uyo waatungʼwagila wingi no muli Yesu Kristo Mpija wiswe;

⁷ Giki, aho twaatungiligijiwa na kigongo chakwe, twitwe kubiza bingiji gitumo kwisagilwa kwa bupanga butushila umo kuli.

⁸ Mhayo uyu gwa wishigwa, na mihayo yeniyi natogilwe uyihaye gwa na nguzu giki, benabo abanzunije Mulungu bakalalwe kukomela mu shitile sha wiza. Mihayo yeniyi ili ya wiza na ya solobo ku banhu:

⁹ Aliyo a mabugilijo ga nyachiluchilu, na ga kubala shibyalilwe, na buyombo na halali ya ku shilagilo, shenishi ushihungage, iki shiti na solobo, hangi sha dalali.

¹⁰ Munhu ngunghumi hanuma ya kunganikila lukangala lwa kwandia na lwa kabili, nemage;

¹¹ Iki umanile munhu ali chene waahugana, hangi akwitaga shibi, wilekanya nsango ngʼwenekele.

Kalagile

¹² Aho nalantuma Artema kuli bebe nulu Tukiko, komelaga kwiza kuli nene kunu Nikopoli: iki hu kwene natogilwe kwikala ko mu shiku ja mbeho.

¹³ Batumage Zena mani wa shilagilo, na Apolo, mu lugendo lwabo na bukomezu, batizugayiwa kinhu chose.

¹⁴ Na banhu biswe nabo bilange kukomela mu Shitwa sha wiza kwita iyo iyigelelilwe, batizubiza bati na matwajo.

¹⁵ Bose abali hamo na nene bakugisha. Bagishage abatutogwa mu buzunya. Kigongo kibize hamo na bingʼwe bose. Amina.