Tito 2 - Ilagano Ipya Lya

Ntumami wa Mulungu

¹ Aliyo bebe, hayaga mihayo iyidebelile na kalangile kapanga:

² Giki, a banamhala babize ba masala madekanu, binhiwa ishima, bilindi benekele, babize bali bapanga mu kuzunya, na mu butogwa, na mu kwiyumilija:

³ A bagikulu nabo babize na kashiminzile ka wela, batizubiza balembekeja, nulu abo abakutumamilaga minzi mingi ga mizabibu, aliyo babize balangi ba iyo ya wiza.

⁴ Babalange bashike kubatogwa bagoshi babo, na kubatogwa bana babo,

⁵ Kubiza na masala madekanu, bela, bakomezu mu milimo ya kaya, ba wiza, balyehu ku bagoshi babo, mhayo gwa Mulungu guleke kudukwa:

⁶ A basumba nabo ubakomeleje babize ba masala madekanu:

⁷ Mu mihayo yose wiyoleche uli kalolelo ka kuhwawa ka Shitwa sha wiza: mu kulanga kwako wiyoleche uti na buhubi; hangi uli ngʼwinhiwa ishima,

⁸ Wa mihayo mipanga iyo itudula kusukilijiwa; uyo akukuhangijaga adingʼwe minala, iki gukungaya mhayo gwa bubi gwa kutuhaya biswe.

⁹ Basese babigwe basabo bugonzo babayeje mu mihayo yose; batizubiza bashosha ba mihayo,

¹⁰ Nulu banyecha, aliyo biyoleche bali basanyiwe mu ya wiza yose; bakugaliile kulanga kwa Mulungu Mpija wiswe mu mihayo yose.

¹¹ Iki kigongo cha Mulungu ichabenhela banhu bose bupiji, chiilonga,

¹² Kikutulangaga kulema buti butungilija na kwikumva kwa kinasi; na hangi giki, twikale ba masala madekanu, na batungilija, na bela mu si iyi;

¹³ Tukukulolelaga kwisagilwa kwa lubango, na kwilonga kwa ikujo kwa Mulungu ntale na Mpija wiswe Yesu Kristo:

¹⁴ Uyo akiyinha ko kulwiswe, atukomole kufuma mu buhunga bose, na wiyegeje banhu bakwe ba wikomangile, abashikalalilwe Shitwa sha wiza.

¹⁵ Hayaga mihayo iyi, na kukomeleja, na kuhugula na budula bose. Munhu ose atizukudalaha.