Tito 1 - Ilagano Ipya Lya

Kugisha

¹ Paulo, nsese wa Mulungu, na ntungʼwa wa ngʼwa Yesu Kristo, gitumo kuzunya kwa basolwa ba Mulungu umo kuli na kumana kwa nghana iyigwindanije na wela,

² Mu kwisagilwa kwa bupanga butushila, ubo Mulungu, Uyo atudula kulomaloma, wiisagija aho si yali itali kubumva;

³ Aliyo mu makanza gakwe, akagukundula mhayo gwakwe mu nzila ya bulomeji, ubo nabikijiwa gitumo kilagilo cha Mulungu Mpija wiswe umo kili;

⁴ Kuli Tito, ngʼwana wane nghana mu kuzunya uku tukusangilile: Kibize kuli bebe kigongo na kuchila kigongo na mhola ishufuma kuli Mulungu Siswe na Kristo Yesu Mpija wiswe.

Banamhala ba kanisa gitumo ibigelile babize

⁵ Nali nukuleka Krete kulwa nguno iyi giki, uyilonje mihayo iyali yasaga, utuule ho banamhala ba kanisa mu buli nzengo, gitumo nukulagila;

⁶ Ulu munhu umanika ati na kilingo, ngosha wa nkima umo, ali na bana bazunya abatubulwa bali buyagabuyaga nulu bati na chigwamatu.

⁷ Iki nindi shingʼwigelile abize ati na kilingo, iki ali mikijiwa wa Mulungu, ati ngʼumaganu, ati ngʼwangu kupelana, atimaniligije minzi ga mizabibu; ati ntuji, ati ngʼwigongi wa solobo ja busoso;

⁸ Aliyo abize ali ngʼwegeleja, ntogwa wa ya wiza, wa masala madekanu, ntungilija, ngʼwela, ngʼwilindi ngʼwenekele;

⁹ Uyo akudimaga mhayo gwa wishigwa gitumo waalangwa, adule kubaganikila na kalangile kapanga na kubakamaaja ba halali.

Chimile cha balangi abati ba nghana

¹⁰ Iki bali ho ba kitigwa bingi, na bahayi ba mihayo iti ya kapanga na balembalembi, kutinda abo abasalilwe.

¹¹ Abo shibigelile milomo yabo yimumiwe; abo bakuhwiganyaga makaya magima, bakulangaga iyi itigelile kulwa nguno ya solobo ja busoso.

¹² Na umo wabo, u nghangi wabo benekele, akahaya giki, Bakrete bali balomolomo gwa, bali shinwele sha bubi, balaku abatitaga nimo.

¹³ Bukaniji ubu wene nghana. Kulwa mhayo uyu ubahamage na bukali, babize bapanga ba gili mu kuzunya,

¹⁴ Baleke kwigwa ngano ja Kiyudaya na kalagilile ka banhu, abiyihunga i nghana.

¹⁵ Ku a bela shinhu shose shili shela, aliyo ku abo abali basoso na abatuzunya, kiti ho kinhu kili chela; aliyo iganiko lyabo na wiyanguji wabo shili sha busoso.

¹⁶ Bakatambulaga giki, bamanile Mulungu, aliyo mu Shitwa shabo bakanemaga, bali ba malofu, na ba kitigwa, na ku nimo gose gwa wiza batigelile.