Shītwa 9 - Ilagano Ipya Lya

Yesu ungʼwilongela Saulo

¹ Aliyo Saulo, walatali ubahezelela bukangi na bubulagi a bahemba ba ngʼwa Yesu, uja kuli ngabiji ntale,

² Ulomba nyaluba ja kuja najo Damasko, ku mabilingilo, giki, ulu ubabona banhu abali ba nzila iyi, bagosha nulu bakima, abenhe Yerusalemi batungilwe.

³ Aho akujaga, yubiza aho wegela Damasko, kuhayumanila, isana kufuma ngʼwigulu lyungʼwakila limpindije.

⁴ Nanghwe ugwa pu ha si, wigwa ilaka lilingʼwila giki, Saulo, Saulo, ukuninyajanyajaga ni buli?

⁵ Uhaya giki, Uli nani, Seba? Seba uhaya giki, Nene ndi Yesu Uyo ukuninyajanyajaga: Ili kilambu kuli bebe kupanda milambi ku someke.

⁶ Wei udetema na ukumya, uhaya giki, Seba, utogilwe nite ki? Seba ungʼwila giki, Bukaga, wingile mu nzengo, nangho ukuwilwa iyo ikwigelelilwe kwita.

⁷ Bagosha abali bushiminza hamo nanghwe bimila du, bigwa ilaka duhu aliyo batamonile munhu.

⁸ Huna Saulo ubuka ha si; aho ulolecha miso walatubona kinhu: bundima nkono, buntongela, bungʼwenha Damasko.

⁹ Udila shiku idatu kubona yaya, na kulya yaya nulu kungʼwa yaya.

Anania utungʼwa kuli Saulo

¹⁰ Walali mo nghemba umo mu Damasko, lina lyakwe Anania; na Seba ungʼwila mu kolechiwa giki, Anania. Uyo uhaya giki, Nene ndi aha, Seba.

¹¹ Seba ungʼwila giki, Bukaga, uje ku nzila ikitanagwa Ngololoku, ukankobe mu numba ya ngʼwa Yuda munhu, lina lyakwe Saulo, wa Tarso: iki lolaga, akulombaga;

¹² Nanghwe wamonaga munhu mu kolechiwa, lina lyakwe Anania, wingila, untuulila nkono giki, abone.

¹³ Anania ushosha giki, Seba, nigwile ku banhu bingi nghulu ja ngosha ngʼwenuyo, bubi wingi ubo wabitilile bela bako mu Yerusalemi:

¹⁴ Nu kunu ali nabo budula kufuma ku bagabiji batale kubatunga bose abalililila lina lyako.

¹⁵ Seba ungʼwila giki, Jaga duhu; iki wei ali kiseme kisolwa kuli Nene, alibuche lina lyane ku butongi wa bana mahanga, na batemi, na bana ba Israeli;

¹⁶ Iki nakungʼolekeja mihayo mitale yinga shingʼwigelelilwe kuluhiwa kulwa lina lyane.

¹⁷ Huna Anania ubuka uja, wingila mu numba iyo; untuulila makono, uhaya giki, Ndugu wane Saulo, Seba wanituma, Yesu, Uyo wali ukwilongela mu nzila iyo wizilile, bebe winhiwe kubona, na oka jiwe na Moyo Ngʼwela.

Paulo ubatijiwa

¹⁸ Haho na haho gugwa kufuma mu miso gakwe giti magamba, kuhayumanila ubona, huna ubuka, ubatijiwa;

¹⁹ Nanghwe tilya shiliwa na ubona nguzu. Huna Saulo wali ubiza hamo na bahemba ba mu Damasko shiku ndebe.

Paulo wandia kulomela

²⁰ Haho na haho mu mabilingilo ulomela ya ngʼwa Yesu giki, ali Ngʼwana wa Mulungu.

²¹ Bose abo bali bungʼwigwa, budedebala, buhaya giki, Uyu ati ngʼwenuyo wali utunyajanyaja bose abalililila lina ili mu Yerusalemi? Nanghwe wizile kunu kulwa mhayo uyu, abatwale batungilwe ku bagabiji batale?

²² Aliyo Saulo ongeja kwinhiwa nguzu, ubazwanganya Bayudaya abali bikala mu Damasko, ubamanikija giki, Uyu hu ngʼwene Kristo.

Bayudaya busigana kumulaga Paulo

²³ Aho shiku ningi jali jubita, Bayudaya bulomana mhayo gwa kumulaga:

²⁴ Aliyo busigani wabo bumanwa na Saulo. Bungʼwitegela ha mibita limi na bujiku, bamulage.

²⁵ Aliyo bahemba buntwala bujiku, bukangʼwikija ngʼwitangwa ha ndugu.

Paulo uja Yerusalemi

²⁶ Aho Saulo ushika Yerusalemi, wali ugema kwisangija na bahemba; nabo bose bali bungʼogoha, bali batuzunya giki, ali nghemba.

²⁷ Aliyo Barnabas untwala, ungʼwenha ku batungʼwa, ubasombolela gitumo wali umona Seba mu nzila, na gitumo wali ulungalunga nanghwe, na gitumo wali ulomela na bugimu mu lina lya ngʼwa Yesu mu Damasko.

²⁸ Nanghwe wali ubiza hamo nabo mu Yerusalemi, akwingilaga na kufuma,

²⁹ Ubyulomela na bugimu mu lina lya Seba; ulungalunga na wihalalija na Bahelenisti; aliyo boi bukoba nzila ya kumulaga.

Paulo uja Tarso

³⁰ Aho badugu bali bumana chene, bunshindikila Kaisaria bilaga nanghwe, buntuma aje Tarso.

³¹ Huna lulu makanisa gose mu Buyudaya na Galilaya na Samaria gubiza na mhola, guzengwa, na gongeja kushiminza mu logohano kuli Seba, na mu kulungujiwa kwa Moyo Ngʼwela, giyongeja.

Petro umpija Ainea

³² Ikabiza aho Petro wali upindila hose hose, utulumenha kuja ku a bela abazengile mu Luda.

³³ Unsanga ko munhu umo, lina lyakwe Ainea, wali walala ha bulili miaka inane, alemahalile.

³⁴ Huna Petro ungʼwila giki, Ainea, Yesu Kristo wakupija; bukaga, uwambe bulili wako. Nanghwe ubuka haho na haho.

³⁵ Na bose abazengile mu Luda na Saroni bumona, nabo bungalukila Seba.

Tabitha ucha na winhiwa bupanga hangi

³⁶ Mu Yopa walali mo nghemba umo, lina lyakwe Tabitha, lina ili kushomelejiwa kwalyo kuli giki, Dorkas; nkima ngʼwenuyo wali izulile na shitile sha wiza, na bugabi wa shikolo, isho wita.

³⁷ Ikabiza mu shiku jenijo, usata, ucha; aho bali bumala kungʼoja, buntuula mu chumba cha higulya.

³⁸ Aliyo iki Luda ili hihi na Yopa, na bahemba bali bigwa giki, Petro ali ko, bufuma bagosha babili kuli wei bangʼwikumbilije giki, atizudila kwiza kubo.

³⁹ Petro ubuka kuja nabo. Aho ushika, buntwala mu chumba cha higulya; na bachilwa bose bimila hihi nanghwe balilila, kunu bungʼolekeja nghanjo na shizwalo isho Dorkas walubejaga, aho walatali hamo nabo.

⁴⁰ Petro ubafunya bose, utuja mazwi, ulomba; na ugugalukila u mimba, uhaya giki, Tabitha, bukaga. Nanghwe ulolecha miso gakwe, na aho umona Petro, ubuka wigasha.

⁴¹ Ungʼwinha nkono, umucha; aho wamala kubitana a bela na bachilwa, untuula mu butongi wabo ali mpanga.

⁴² Mhayo uyu gukumuka mu Yopa yose, na bingi bunzunya Seba.

⁴³ Hunaho Petro wali wikala ko shiku ningi mu Yopa ha ngʼwa munhu umo, Simoni, mpaji wa makunza. Evangeli yandia kushika ku bana mahanga