Shītwa 8 - Ilagano Ipya Lya

Kunyajanyajiwa kwa kane: Kanisa yusambajiwa

¹ Saulo yumelela kucha kwa ngʼwenuyo. Lwise lwene kunyajanyajiwa kutale kwali kubilongela kanisa iyali mu Yerusalemi, bubalasanyiwa bose si yose ya Buyudaya na Samaria kuleka batungʼwa.

² Banhu bishigwa bunjika Stefano, bungʼwitila kulila nghungu kutale.

³ Aliyo Saulo wali ubyukenagula no kanisa, ubyingila buli numba, ubahulumula bagosha na bakima, ubaponya mu jela.

Filipo abalomela mu Samaria

⁴ Kulwa iyi, abo abali bubalasanyiwa, buja hose hose bakugulomelaga mhayo.

⁵ 5 Filipo utulumenha kuja mu nzengo gwa Samaria, ubalomela ya ngʼwa Kristo.

⁶ Banhu bingi bali budegeleka na moyo gumo mihayo iyo yali yuhayiwa na Filipo, aho bigwa na kubona shimanikijo isho wita.

⁷ Iki mioyo misoso yali yufuma mu bingi abo bali budingʼwa nayo, yulila na ilaka itale; na bingi abalemahalile na balema bupijiwa.

⁸ Bubiza ho buyegi butale mu nzengo gwenuyo.

Simoni negi ubatijiwa

⁹ Walali ho munhu umo, lina lyakwe Simoni, uyo wali wita maleba na kale mu nzengo uyo, nanghwe ubadedebaja banhu ba ihanga lya Samaria, wihaya ali magatala.

¹⁰ Ngʼwenuyo bose bubyundegeleka kufuma bado kushisha batale, buhaya giki, Munhu ngʼwenuyu ali budula wa Mulungu, u butale.

¹¹ Ngʼwenuyo bubyundegeleka, iki kufuma kale ubyubadedebaja na maleba gakwe.

¹² Aliyo aho bali bunzunya Filipo uyo ulomela nghombe ya butemi wa Mulungu na lina lya ngʼwa Yesu Kristo, bubatijiwa bagosha na bakima.

¹³ Simoni nanghwe ngʼwenekele uzunya: aho ubatijiwa ushinga hamo na Filipo; udedebala, aho ushibona shimanikijo na shitile sha budula shitale isho shikwitagwa.

Petro na Yohana butungwa Samaria

¹⁴ Aho batungʼwa ba mu Yerusalemi bali bigwa giki, Samaria yanukulile mhayo gwa Mulungu, bubatumila Petro na Yohana.

¹⁵ Benabo aho butulumenha bushika ko, bubalombela giki, banukule Moyo Ngʼwela;

¹⁶ Iki walatali kungʼwikiila munhu nulu umo wabo, gwike bali babatijiwa mu lina lya Seba Yesu.

¹⁷ Hunaho bubatuulila makono higulya yabo, nabo banukula Moyo Ngʼwela.

¹⁸ Aho Simoni wali ubona giki, bakwinhiwagwa Moyo Ngʼwela kulwa kutuulilwa makono na batungʼwa, usanga wabinha feza,

¹⁹ Uhaya giki, Ninhagi nane budula ubu, uyo ose nakuntuulila makono gane, anukule Moyo Ngʼwela.

²⁰ Aliyo Petro ungʼwila giki, Feza jako jiyagale hamo na bebe, iki wiganikaga giki, cha kwinhiwa cha Mulungu chu-pandikwa na feza.

²¹ Bebe uti na ngabo nulu busangi mu mhayo uyu; iki ngholo yako iti wima mu butongi wa Mulungu.

²² Kulwa iyi, oyaga bubi wako wenubu, unombe Mulungu, ulu hamo ukulekejiwa iganiko lya ngholo yako.

²³ Iki nakubona bebe uli mu ndulu ya bululu, na mu butungwa wa buti butungilija.

²⁴ Simoni ushosha uhaya giki, Nilombelagi bingʼwe kuli Seba, itizunisliikila mihayo iyo ngʼwahayaga.

²⁵ Nabo aho bali bumala bukanila na kugulomela mhayo gwa Seba, bushokanya Yerusalemi, bakulomelaga evangeli mu mizengo mingi ya bana Samaria.

Filipo umaiija munhu wa Etiopia

²⁶ Malaika wa Seba akalungalunga na Filipo, uhaya giki, Bukaga uje ku lwande lwa dakama mu nzila itulumenhile kufuma Yerusalemi kushika Gaza: yene ya ngʼwipolu.

²⁷ Nanghwe ubuka uja; kuponya miso, umona munhu wa Etiopia, asololilwe, wa budula butale hasilili ya Kandake, ntemi nkima wa ba Etiopia, ngʼwenuyu walali miki wa sabo jakwe jose, wali wajile Yerusalemi kulamya;

²⁸ Na alishoka igashije ngʼwigali lyakwe, akusomaga kitabo cha nghangi Isaya.

²⁹ Moyo ungʼwila Filipo giki, Egelaga, ukadimane na igali lyenili.

³⁰ Filipo umpelela, ungʼwigwa alisoma kitabo cha nghangi Isaya, nanghwe uhaya giki, Angu, umanile iyo ulisoma?

³¹ Uhaya giki, Nakudula kinahe, numho munhu unitongela? Ungʼwikumbilija Filipo alinhe igashe hamo nanghwe.

³² Ipande lya Shandikwa ilo walusomaga lyali lyenili: Wali utwalwa giti ngholo ya kubulagwa; na giti ngʼwana wa ngholo atulilaga mu nkono gwa mutiji wa boya, giko Wei atusamyaga nomo gwakwe.

³³ Mu kwidohya kwakwe nsango gwakwe gwali gwinjiwa; ni nani uyo alabukumucha bubyile wakwe? iki u bupanga wakwe winjiwagwa mu si.

³⁴ Ngʼwenuyo asololilwe unshokeja Filipo, uhaya giki, Nakwikumbilija, mhayo gwenuyu nghangi alinghaya nani? ya kwihaya wei ngʼwenekele, nulu ya munhu ungi?

³⁵ Huna Filipo wasamya nomo gwakwe, wandija ha Shandikwa shenishi, unomela ya ngʼwa Yesu.

³⁶ Aho bakujaga mu nzila, bushika aho gubiza ho minzi; ngʼwenuyo asololilwe uhaya giki, Gaya minzi; ya kunilemeja kubatijiwa ni ki?

³⁷ Filipo uhaya giki, Ulu uzunya na ngholo yako yose, ikudulika. Ushosha uhaya giki, Nazunya giki, Yesu Kristo ali Ngʼwana wa Mulungu.

³⁸ Huna ulagila igali lyimilijiwe. Nabo bika bubili wabo mu minzi, Filipo na ngʼwenuyo asololilwe, nanghwe umatija.

³⁹ Aliyo aho busabuka mu minzi, Moyo wa Seba unghwehula Filipo, na ngʼwenuyo asololilwe walatumona hangi iki uja mu nzila yakwe, akuyegaga.

⁴⁰ Aliyo Filipo akabonwa mu Azoto: ubitila mu mizengo yose akulomelaga evangeli, kushisha ushika Kaisaria.