Shītwa 7 - Ilagano Ipya Lya

¹ Huna lulu ngabiji ntale uhaya giki, Angu, mihayo yeniyi ili chene?

² Nanghwe uhaya giki, Badugu na bababa, degelekagi. Mulungu wa ikujo akangʼwilongela nkulugenji wiswe Abrahamu, aho walali ho mu Mesopotamia, aho walatali kuzenga Harani.

³ Nanghwe akangʼwila giki, Fumaga mu si yako, na mu ba luganda lwako, wize ku si iyo nalakolekeja.

⁴ Hunaho wali ufuma mu si ya Bakaldayo, uzenga mu Harani; na kufuma kwenuko, aho ise wali ucha, Mulungu unsamija mu si iyi, umo muzengile bingʼwe haha.

⁵ Na walatungʼwinha wingiji muyo, nulu ha kupanda kugulu gwakwe; aliyo ungʼwisagija kungʼwinha si iyi kubiza busugi wakwe, na ya bubyile wakwe wa hanuma yakwe, aho walatali kubiza na ngʼwana.

⁶ Mulungu ulungalunga giki, bubyile wakwe bulabiza bugeni mu si iti yabo, na boi balabita basese, na kubitila kibi, miaka magana ane.

⁷ Na ihanga ilo balabiza basese balyo, nalalilekanya nsango Nene, uhaya Mulungu: na hanuma ya yeniyo, balafuma mo, na kunilamya ngʼwipande lyenili.

⁸ Huna ungʼwinha bulagane wa kusala: na giko akamyala Isaaka, unsala ha lushiku lwa kanane; Isaaka nanghwe umyala Yakobo, na Yakobo ubabyala bakulugenji biswe ikumi na babili.

⁹ Nabo bakulugenji biswe bali bungʼwitila Yusufu wilu, bunjinja atwalwe Misri: aliyo Mulungu wali ubiza hamo nanghwe,

¹⁰ Wali ungʼwinja mu kuluhiwa kwakwe kose, ungʼwinha kigongo na masala mu butongi wa ngʼwa Farao, ntemi wa Misri; nanghwe wali untuula kubiza nsugi wa Misri na wa kaya yakwe yose.

¹¹ Ikiza nzala mu si yose ya Misri, na ya Kanani, na kuluhiwa kutale no: na bakulugenji biswe bali batubona sha kulya sha kubigela.

¹² Aliyo aho Yakobo wali wigwa giki, shiliwa shili ko Misri, ubatuma bakulugenji biswe lugendo lwa kwandia.

¹³ Ku lugendo lwa kabili Yusufu wifumbula ku bana ba ngʼwabo, na luganda lwa ngʼwa Yusufu tumanika kuli Farao.

¹⁴ Huna lulu Yusufu utuma ba kungʼwitana ise Yakobo, na bose ba kibyalilwe chakwe, banhu makumi mpungati na batano.

¹⁵ Huna Yakobo utulumenha kuja Misri, ucha wei na bakulugenji biswe;

¹⁶ Bubuchiwa kutwalwa Shekemu, na butuulwa mu likigila, ilo Abrahamu wali uligula na feza ku bana ba ngʼwa Emori wa uko Shekemu.

¹⁷ Aliyo aho ikanza lya kwisagija uko Mulungu wali unahilila Abrahamu aho lyegela, banhu benabo biyongeja na kukwila no mu Misri.

¹⁸ Kushisha ntemi ungi uyo wamtamanile Yusufu ubuka mu Misri.

¹⁹ Ngʼwenuyo wali ubitila ya masalasala ba luganda lwiswe, ubitila ya bubi bakulugenji biswe, ulagila kubaponya bana belele babo, batizikala bapanga.

²⁰ Ngʼwikanza ilo wali ubyalwa Musa, nanghwe walali wa wiza no kuli Mulungu, ulelwa mieji idatu mu numba ya ngʼwa ise;

²¹ Aho wali uponyiwa, ngʼwana nkima wa Farao unsola, unela abize ngʼwana wakwe ngʼwenekele.

²² Na Musa wali ulangwa masala gose ga bana Misri; ubiza wa nguzu mu mihayo na mu Shitwa.

²³ Aho ushisha miaka makumi ane, wiganika mu ngholo yakwe kuja kubalola baduguye, bana ba Israeli,

²⁴ Nanghwe umona umo wabo witilwa kibi, ungunija na umalila shili uyo wali wibonelwa, umulaga u muna Misri.

²⁵ Wali wiganika giki, baduguye bakwitegeleja giki, mu nkono gwakwe Mulungu wabinha bupiji; aliyo boi bali batitegeleja.

²⁶ Ku ntondo ubilongela abo bakulwaga, ubakomeleja kwisangija, uhaya giki, Bagosha, ambu, bingʼwe muli badugu; muliyitila kibi benekele na benekele ni buli?

²⁷ Aliyo uyo wali ungʼwitila kibi ngʼwiye unshindika kule, uhaya giki, Ni nani wakutuulile ho kubiza ntale na nekanya wiswe?

²⁸ Utogilwe kunibulaga nene, gitumo ukamulaga muna Misri igolo?

²⁹ Huna Musa upela kulwa mhayo uyu, wikala nyageni mu si ya Midiani, uko ubyalila bana bagosha babili.

³⁰ Aho yushila miaka makumi ane, malaika wa Seba ungʼwilongela ngʼwipolu lya lugulu lwa Sinai mu lulali lwa moto mu kasaka.

³¹ Musa aho ukubona, ukukumya kolechiwa kwenuko; aho wegela kulola, ilaka lya Seba lyungʼwiziila,

³² Giki, Nene ndi Mulungu wa bakulugenji bako, ndi Mulungu wa ngʼwa Abrahamu, na Mulungu wa ngʼwa Isaaka, na Mulungu wa ngʼwa Yakobo, Musa udetema, atugima kulola.

³³ Seba ungʼwila giki, Kungulaga shilatu ku mhambala jako; iki ipande aho wimilile ili si nela.

³⁴ Kubona namala kubona kuluhiwa kwa banhu bane abali mu Misri, nigwile kuganghila kwabo, na Nene nikaga nakabinje mo; ali lulu nzugu, nakukutuma kuja Misri.

³⁵ Musa ngʼwenuyo hali bunema, bakahaya giki, Ni nani wakutuulile ho kubiza ntale na nekanya? Hu ngʼwene Mulungu wali untuma kubiza ntale na nkomoji, mu nkono gwa ngʼwa malaika uwali ungʼwilongela mu kasaka.

³⁶ Ngʼwenuyo wali ubinja mo, aho wita sha kukumya na shimanikijo mu si ya Misri, na mu Nyanza Yaza, na ngʼwipolu miaka makumi ane.

³⁷ Ngʼwenuyo Musa, hu ngʼwene uyo wali ubawila bana ba Israeli giki, Seba Mulungu wingʼwe alamubukija nghangi kufuma mu badugu bingʼwe, giti nene.

³⁸ Ngʼwenuyo hu ngʼwene uyo wali ubiza mu kanisa ngʼwipolu hamo na malaika uyo wali ulungalunga nanghwe mu lugulu lwa Sinai, hangi hamo na bakulugenji biswe: hu ngʼwene uyo wali wanukula mihayo ya bupanga ya kutwinha biswe.

³⁹ Ngʼwenuyo bakulugenji biswe bali batatogilwe kungʼwigwa, aliyo bunshindika kule, na mu ngholo jabo bushoka hangi mu Misri,

⁴⁰ Bungʼwila Aroni giki, Tubegejage bamulungu, ba kututongela biswe: iki ngʼwenuyo Musa uwali wa twin ja biswe mu si ya Misri, tutamanile umo wabizile.

⁴¹ Nabo bubeja ndama mu shiku jenijo, na bukitambila kitambo chikolile chenicho, buyegela milimo ya makono gabo.

⁴² Aliyo Mulungu ugaluka, ubagumanija balitumamile ibita lya ngʼwigulu; gitumo yaandikwa mu kitabo cha bahangi giki, Angu, ngʼwaanifunijaga Nene ngʼombe jibulagilwe na shitambo miaka makumi ane ngʼwipolu, bingʼwe ba numba ya Israeli?

⁴³ Ambu, ngʼubucha ihema lya Moloki, na sonda ya mulungu wingʼwe Refani, shikolile isho ngʼubeja kushilamva; na Nene nalamusamya muje ku nkilo gwa Babeli.

⁴⁴ Ihema lya bukaniji lyali lili hamo na bakulugenji biswe ngʼwipolu, gitumo akalagila Uyo wali ulungalunga na Musa, giki, alibeje lilenganilile na chikolile icho wali ukibona.

⁴⁵ Ilo bakulugenji biswe aho bulyanukula bali buliyingija hamo na Yoshua, aho bubudima wingiji wa bana mahanga, abo Mulungu wali ubapeja kufuma mu butongi wa bakulugenji biswe, kushisha mu shiku ja ngʼwa Daudi;

⁴⁶ Uyo wali ubona kigongo mu butongi wa Mulungu, nanghwe ulomba giki, amonele wikalo Mulungu wa ngʼwa Yakobo.

⁴⁷ Aliyo Solomon! wali unzengela numba.

⁴⁸ Aliyo Uyo ali higulya no atikalaga mu numba ijabejiwa na makono, gitumo nghangi uhaya giki,

⁴⁹ Igulu lyene isumbi lyane lya butemi, na si yene ha kupanda magulu gane; ni numba ki iyo mukunizengela? wahaya Seba: nulu ipande lili ki lya kwifulila kwane?

⁵⁰ Angu, guti nkono gwane uyo gwaashibeja ishi shose?

⁵¹ Bingʼwe ba nhingo numaganu na mutasalilwe mu ngholo na mu matu, mukunghangijaga Moyo Ngʼwela gwa gwa gwa, gitumo bakulugenji bingʼwe bali bita, ningʼwe chene.

⁵² Ni nani mu bahangi, uyo bakulugenji bingʼwe bali batunyajanyaja? nabo bali bubabulaga abo abali butonja kusombola kwiza kwa Ngʼwenuyo Ntungilija; Uyo bingʼwe i haha ngʼwabile bilimongi na babulagi bakwe;

⁵³ Bingʼwe abo ngʼwaanukula shilagilo, mu kalagilile ka bamalaika, aliyo mutashidimaga.

Kabulagilwe ka ngʼwa Stefano

⁵⁴ Aho bigwa mihayo iyi, buchingʼwa ngholo, bungʼwilumila nghaya.

⁵⁵ Aliyo wei izulile na Moyo Ngʼwela, ukamilija ngʼwigulu, ubona ikujo lya Mulungu, na Yesu imilile ku nkono gwa bulyo gwa Mulungu,

⁵⁶ Uhaya giki, Lolagi, nabona igulu likundulile, na Ngʼwana wa munhu imilile ku nkono gwa bulyo gwa Mulungu.

⁵⁷ Aliyo buhamuka na ilaka itale no, buchibila matu gabo, bungholekela na moyo gumo;

⁵⁸ Bumponya hanze ya nzengo, bumponda mawe: nabo a bakaniji butuula shizwalo shabo ku magulu ga nsumba umo, akitanagwa Saulo.

⁵⁹ Nabo bumponda mawe Stefano, alilomba, uhaya giki, Seba Yesu, anukulaga moyo gwane.

⁶⁰ Utuja mazwi, uhamuka na ilaka itale giki, Seba, utizubabikila kibi cheniki. Aho wamala kuhaya giko, ushutula.