Shītwa 6 - Ilagano Ipya Lya

Binhilija ba kwandia basolwa

¹ Mu shiku jenijo, aho bahemba biyongeja kukwila, bubiza ho budugumi giki, Bahelenisti bubadugumila Bahebrania, iki bachilwa babo bubitiilwa mu kwinhilija kwa buli lushiku.

² Benabo ikumi na babili aho bubitana bahemba bose, buhaya giki, Iti chiza biswe kuguleka mhayo gwa Mulungu, na kwinhilija ku meza.

³ Kulwa iyo, badugu, solagi mu bingʼwe, bagosha mpungati bakanilwa giki, bali ba wiza, bizulile na Moyo Ngʼwela na masala, abo tubatuule ba kusuga nimo gwenuyu.

⁴ Aliyo biswe tukwiyumilija gwa mu kulomba na kwinhilija kwa mhayo.

⁵ Na mhayo gwenuyu gubatoga bose pye; nabo bunkoma Stefano, munhu izulile na kuzunya na Moyo Ngʼwela; na Filipo na Prokoro, na Nikanori, na Timoni, na Parmena, na Nikolao ngaluchiwa wa Antiokia;

⁶ Bubatuula mu butongi wa batungʼwa; nabo aho bamala kulomba, bubatuulila makono.

⁷ Na mhayo gwa Mulungu gwiyongeja; na bukumi wa bahemba bukwila no mu Yerusalemi; na bagabiji bingi bukulondela kuzunya kwenuku.

Kunyajanyajiwa kwa kadatu Stefano udingʼwa utwalwa ngʼwibanza

⁸ Na Stefano, izulile na kuzunya na budula, ubyita sha kukumya na shimanikijo shitale mu banhu.

⁹ Aliyo bamo bubuka ba benabo ba ibilingilo ilikitanagwa lya Balibertino na lya ba Kurene, na lya ba Aleksandria, na ba benabo ba Kilikia na Asia, bubyunghalalija Stefano.

¹⁰ Nabo bali batudula kugahangija masala na Moyo Ngʼwela, umo wali uhayila.

¹¹ Hunaho bubahana bagosha ba kuhaya giki, Twangʼwigwile uyo akulungalungaga mihayo ya kunduka Musa na Mulungu.

¹² Bubasabula banhu, na banamhala na bandiki, bungʼwibakija, bundima, buntwala kwibanza,

¹³ Bimilija bakaniji ba bulomolomo, abuhaya giki, Munhu uyu atulekaga kuhaya mihayo ya kulisondagula ipande ili lyela, na shilagilo:

¹⁴ Iki twangʼwigwile akuhayaga giki, Ngʼwenuyo Yesu wa Nazareti alakenagula ipande ili, na kushigalucha shimile isho Musa waatwinha.

¹⁵ Na bose abali bigashije ngʼwibanza, bunkalalila, bububona bushu wakwe, giti bushu wa malaika. Lulomelo lwa ngʼwa Stefano ngʼwibanza