Shītwa 5 - Ilagano Ipya Lya

Nsango gwa Anania na Safira

¹ Aliyo munhu umo, lina lyakwe Anania, hamo na nke wakwe, Safira, wali ujinja ngunda,

² Na wibikila mu kwigeniha ibudika lya mpango gwago, nu nke wakwe walamanile, huna lulu wenha ibudika limo, ulituula ku magulu ga batungʼwa.

³ Petro uhaya giki, Anania, ni buli Shetani okajaga ngholo yako ya kunembalemba Moyo Ngʼwela, na wibikila ibudika lya mpango gwa ngunda?

⁴ Aho gwali gwikala kuli bebe, angu, gwali guti gwako ngʼwenekele? na aho gukajinjiwa, angu, gwali guti mu budula wako? Ni buli wasema mhayo uyu mu ngholo yako? Utahayile bulomolomo ku banhu, aliyo kuli Mulungu.

⁵ Anania aho wigwa mihayo iyi, ugwa ha si, utina ngholo: na boba wingi bubadima bose abigwa iyo.

⁶ Basumba bubuka bumpaligila mu ngʼwenda, bumucha bumfunya hanze, bunjika.

⁷ Yubiza hanuma ya ikanza lya saa idatu, nke wakwe wingila, atamanile iyo yitwa.

⁸ Petro unshokeja giki, Niwilage ulu ngʼwagujingije ngunda chene. Nanghwe uhaya giki, Ali chene, hu gwene.

⁹ Petro ungʼwila giki, Ni buli bingʼwe ngʼwaalagana kungema Moyo wa Seba? lolaga, magulu ga benabo balunjikaga ngoshi wako gali ho ha nyango, nabo bakukubucha nangho hanze.

¹⁰ Haho na haho ugwa ku magulu gakwe, utina ngholo: basumba bingila busanga wacha, aho bumucha bumfunya hanze bunjika haho na nghoshi.

¹¹ Na boba wingi bubadima kanisa yose, na banhu bose abigwa mihayo yeniyi.

Budula wa kanisa nela

¹² Shimanikijo shingi na shamahano shali Shitwa mu banhu na makono ga batungʼwa: (Nabo bose bali bubiza ngʼwibindo lya ngʼwa Solomoni bubiza na moyo gumo.

¹³ Aliyo mu banhu bangi walati ho nulu umo ugima kwisangija nabo; aliyo banhu bubakumilija;

¹⁴ A bazunya bongejiwa no kuli Seba, bagosha na bakima bingi no;)

¹⁵ Kushisha nose bubafunya hanze balwile bubatuula mu mapalapala, balalile ha bulili na ha shilago giki, aho Petro wiza, nulu nengeji gwakwe gubashikije bamo.

¹⁶ Banhu bingi ba mu mizengo iyipindije Yerusalemi bibilinga hamo, bubyubenha balwile, na abo bali bukoyiwa na mioyo misoso, benabo bose pye bupijiwa.

Kunyajanyajiwa kwa kabili kwa batungwa

¹⁷ Huna lulu ubuka ngabiji ntale, na bose a bubiza hamo nanghwe (a bene banhu ba kazunije ka Basadukayo), bokala na budaki.

¹⁸ Nabo bubadima na makono a batungʼwa, bubatuula mu jela.

¹⁹ Aliyo malaika wa Seba, akigula nzwigi ja jela bujiku, ubafunya hanze, uhaya giki,

²⁰ Jagi, mukimile, mulungalunge mu hekalu ku banhu, mihayo yose ya bupanga wenubu.

²¹ Aho bigwa iyo, bingila mu hekalu mu makingo, bandia kulanga. Aliyo ngabiji ntale ushika, na benabo abali hamo nanghwe, ubitana abo ba ibanza, na banamhala bose ba bana ba Israeli, butuma ku jela, babajile.

²² Aliyo aho bashilikale bushika ko batabasangile mo mu jela; bushoka, busombola,

²³ Buhaya giki, I jela hene, twayisanga ilugalile chiza no, na balindi bimilile ku nzwigi; aliyo aho twigula, tutansangile mo munhu mugati.

²⁴ Ngabiji ntale na ntale wa hekalu na bagabiji batale aho bigwa mihayo iyi, buzwanjiwa kulwa nguno yabo, himba gukubiza kinahe mhayo gwenuyu.

²⁵ Ushika umo ubasombolela, uhaya giki, Lolagi, bagosha abo ngʼwali ngʼwabatuula mu jela, bali mu hekalu, bimilaga, bakulangaga banhu.

²⁶ Huna lulu ntale, hamo na bashilikale, buja; bukabenha chiza, kubakalanghamya yaya; iki bubogoha banhu, batizupondwa mawe.

²⁷ Aho bamala kubenha, bubatuula mu butongi wa ibanza. Na ngabiji ntale ubabuja,

²⁸ Uhaya giki, Angu kulagila tutamulagilile bingʼwe giki, Mutizulanga mu lina ili; na lolagi, ngʼokajaga Yerusalemi na kulanga kwingʼwe, mulikoba kutwenheleja mininga ga munhu Ngʼwenuyu.

Ishosho lya batungʼwa ngʼwibanza

²⁹ Aliyo Petro na batungʼwa bushosha, buhaya giki, Shitwigelile kungʼwigwa Mulungu kutinda banhu.

³⁰ Mulungu wa bakulugenji biswe, waanjucha Yesu, Uyo bingʼwe ngʼwali ngʼumulaga, ngʼunsunga ha linti.

³¹ Ngʼwenuyo Mulungu waangunguhya na nkono gwakwe gwa bulyo abize Ntale na Mpija, abinhe ba Israeli koya; na kulekejiwa kwa shibi.

³² Na biswe tuli bakaniji ba mihayo iyi; kihamo na Moyo Ngʼwela, Uyo Mulungu waabinha abo abangʼwigwa.

³³ Aho bigwa iyo, buchingʼwa mu ngholo jabo, nabo bulomana kubabulaga.

Kuhugula kwa ngʼwa Gamalieli

³⁴ Aliyo umo wimila ngʼwibanza, Mfarisayo, lina lyakwe Gamalieli, nangi wa shilagilo, nkumilijiwa na banhu bose, uyo ulagila kubafunya batungʼwa hanze kakanza.

³⁵ Huna lulu ubawila giki, Bingʼwe bagosha ba Israeli, ilanghanagi iyo mulihaya kubitila banhu benaba.

³⁶ Iki kale aho jali jitali kushika shiku iji, akabuka Theuda, wihaya ngʼwenekele giki, wei ali munhu ntale; bakadimana nanghwe bagosha giti magana ane: ngʼwenuyo wali ubulagwa, na bose abali buhuhutwa nanghwe bubalasanyiwa, bubiza dalali.

³⁷ Hanuma ya munhu ngʼwenuyu, ubuka Yuda wa Galilaya, mu shiku ja kwandikwa kodi, wali ubahumbula banhu bingi hanuma yakwe; ngʼwenuyo nanghwe uyagala, nabo bose abali buhuhutwa nanghwe busalanghanyiwa.

³⁸ Na lulu namuwila giki, Mubihunge banhu aba, balekagi; iki mhayo uyu nulu nimo uyu, ulu yubiza ya banhu, ikubulagwa,

³⁹ Aliyo ulu yubiza ya Mulungu, mutudula kuyibulaga; mutizilonga mulilwisha na Mulungu.

Batungʼwa butulwa huna bulekelwa

⁴⁰ Buzunya yakwe: nabo aho bubitana batungʼwa, bubatula, bubalemeja batizulungalunga mu lina lya ngʼwa Yesu, huna bubataligulila.

⁴¹ Nabo bufuma lulu mu butongi wa ibanza, bakuyegaga iki bubal wa abigelelilwe kudimiwa minala kulwa lina lyakwe.

⁴² Buli lushiku mu hekalu, na mu kaya, hali hatuleka kulanga na kulomela evangeli ya ngʼwa Yesu Kristo.