Shītwa 4 - Ilagano Ipya Lya

Kunyajanyajiwa kwa kwandia

¹ Aho balilungalunga ku banhu, bagabiji na ntale wa hekalu na Basadukayo bubibakija.

² Bukolwa no iki bakubalangaga banhu, na kulomela muli Yesu kujuka kufuma mu bafu.

³ Huna bubadima na makono, bubatuula mu jela kushisha ntondo; iki yubiza mhindi lulu.

⁴ Aliyo bingi ba mu benabo abali bagwigwaga u mhayo buzunya; na bukumi wa bagosha bubiza giti 5,000.

⁵ Yali yubiza ku ntondo, basugi babo na banamhala na bandiki bibilinga mu Yerusalemi;

⁶ Ana u ngabiji ntale nanghwe walali ho, na Kayafa, na Yohana, na Aleksandro, na bose a ba ludugu lwa ngabiji ntale.

⁷ Na aho hali bamala kubatuula hagati yabo, bubabuja giki, Bingʼwe ngʼwitile mhayo uyu mu budula ki, nulu mu lina ki?

Lulomelo lwa ngʼwa Petro ngʼwibanza

⁸ Hunaho Petro izulile na Moyo Ngʼwela, ubawila giki, Bingʼwe basugi ba banhu, na banamhala ba Israeli,

⁹ Ulu biswe tulibugilijiwa lelo kulwa nimo gwa wiza uyo witililwe munhu nema ngʼwenuyu, gitumo wapigijiwa;

¹⁰ Leka imanike ku bingʼwe bose, na ku banhu bose ba Israeli giki, mu lina lya ngʼwa Yesu Kristo wa Nazareti, Uyo bingʼwe mukankoma ha nsalaba, Uyo Mulungu waanjucha kufuma mu bafu, chene muli Wei munhu ngʼwenuyu akwimilaga ali mpanga mu butongi wingʼwe.

¹¹ Ngʼwenuyo ali iwe ilo lyusuchiwa na bingʼwe bazengi, ilo lyabiza itale lya ha lungʼongo.

¹² Hangi bupiji buti mo muli ungi, iki liti ho lina lingi hasilili ya igulu, ilo binhiwa mu banhu, mulyo shitwigelelilwe kupigijiwa.

¹³ Aho bubona bugimu wa Petro na Yohana, na bubitegeleja giki, ball banhu abatalangilwe hangi bati a ba masala, bukumya, bubamanicha giki, baabizaga hamo na Yesu.

¹⁴ Aliyo iki bumona munhu uyo wapijiwe imilile hamo nabo, gubagaya mhayo gwa kushosha.

¹⁵ Huna lulu aho bumala kubalagila bafume ngʼwibanza, busigana boi bike,

¹⁶ Buhaya giki, Tubite kinahe banhu benaba? Iki ili hape ku bose abazengile mu Yerusalemi giki, kimanikijo kitale chitilwe nabo nghana, na biswe tutudula kukilema.

¹⁷ Aliyo nahene mhayo gwenuyu gutizongeja kukwilikana mu banhu, kukanga tubakange, batizulungalunga hangi na munhu nulu umo mu lina ili.

¹⁸ Na aho bubitana, bubalagila batizuhaya nulu na hado yaya, nulu kulanga mu lina lya ngʼwa Yesu.

¹⁹ Aliyo Petro na Yohana bushosha bubawila giki, Ulu ili ya butungilija mu miso ga Mulungu kungʼwigwa bingʼwe kutinda Mulungu, lekanyagi bingʼwe;

²⁰ Iki biswe tutudula kuleka kuhaya mihayo iyo twali twibona na twiyigwa.

²¹ Aliyo aho bali bumala kubakanga hangi, bubataligulila, iki batabonile umo babaluhije, kulwa nguno ya banhu; iki banhu bose bunkuja Mulungu kulwa iyo yitilwe;

²² Iki munhu ngʼwenuyo witililwe kimanikijo iki cha kupijiwa, walakilile miaka makumi ane ya bulamu wakwe.

Bazunya bundayila Mulungu

²³ Aho butaligulilwa, bukashika ku bichabo, na bubasombolela yose iyo bagabiji batale na banamhala baluhayaga.

²⁴ Nabo aho bigwa iyo, buhamuka ilaka kuli Mulungu na moyo gumo, buhaya giki, Ee Seba, Bebe uli Mulungu, Uyo waabeja igulu na si na nyanza, na shose ishili mo:

²⁵ Bebe Uyo mu nomo gwa ngʼwa Daudi ntumami wako ukahaya giki, Mahanga gali gudaka ni buli, na banhu bidedekanya mihayo ya dalali?

²⁶ Batemi ba si bimila bihelile na basugi bibilingila hamo kungʼubukila Seba na Kristo wakwe.

²⁷ Iki nghana Herode na Pontio Pilato, kihamo na bana mahanga, na banhu ba Israeli bali bibilinga kungʼubukila Ntumami wako Ngʼwela, Yesu, Uyo waansamya maguta,

²⁸ Bite yose iyo nkono gwako na kalongeje kako shutonja kale giki, ibize ho.

²⁹ Na haha, Ee Seba, kulolage kukanga kwabo: na binhage basese bako bahaye mhayo gwako na bugimu bose;

³⁰ Giki, ugolole nkono gwako kupija; na shimanikijo na shamanaho shitwe mu lina lya Ntumami wako Ngʼwela, Yesu.

Bazunya bizula hangi na Moyo Ngʼwela; busangija sabo

³¹ Na aho bumala kulomba, ipande ilo umo bibilingila mo lyunegenyiwa, nabo bose bizula na Moyo Ngʼwela, bulungalunga mhayo gwa Mulungu na bugimu.

³² Ibita lya benabo abazunije bali bubiza na ngholo imo na bupanga bumo; nulu walati ho munhu mubo wa kuhaya giki, Chose chose cha shikolo isho ali nasho, chene chakwe ngʼwenekele, aliyo bali bubiza na busangi mu shinhu shose.

³³ Na batungʼwa bukanila ya kujuka kwa Seba Yesu na budula wingi, na kigongo kitale chubiza kubo bose.

³⁴ Iki walatilonga munhu ngayiwa mubo nulu umo; iki bose abo bali bali na migunda nulu numba bushijinja, benha sabo ja shinhu ishali shujinjiwa,

³⁵ Na bujituula ku magulu ga batungʼwa; shugabanyiwa ku buli munhu gitumo kugayiwa kwakwe kwali kuli.

³⁶ Yusufu, uwilikwa na batungʼwa giki, Barnabas, (kushomelejiwa kwaho giki, Ngʼwana wa kulunguja), Nawi, kibyalilwe chakwe muna Kupro,

³⁷ Iki walali na ngunda, ugujinja, ujenha feza, na ujituula ku magulu ga batungʼwa.