Shītwa 3 - Ilagano Ipya Lya

Petro na Yohana bumpija nema

¹ Petro na Yohana bali bulinha kuja mu hekalu ngʼwikanza lya kulomba, saa ya kenda.

² Na ngosha uyo walali nema kufuma mu nda ya ngʼwa nina, akubuchiwagwa, uyo baantuulaga buli lushiku ha nyango gwa hekalu, ugukitanagwa Gwa Bulenji, giki, abalombe cha kwinhiwa abo bakwingilaga mu hekalu;

³ Ngʼwenuyo aho ubabona Petro na Yohana balihaya kwingila mu hekalu, ubalomba inhiwe cha kwinhiwa.

⁴ Petro unkalalila, hamo na Yohana, uhaya giki, Tulolage biswe.

⁵ Nanghwe ubalola, wiganika akwinhiwa kinhu nabo.

⁶ Aliyo Petro uhaya giki, Feza na zahabu, nati nasho; aliyo icho ndi nacho nakukwinha: Mu lina lya ngʼwa Yesu Kristo wa Nazareti, bukaga ushiminze.

⁷ Huna undima nkono gwa bulyo, na ungʼwimilija: haho na haho mhambala jakwe na shingʼongwa shakwe shuguzuhiwa.

⁸ Nanghwe wikindika, wimila, wandia kushiminza; wingila hamo nabo mu hekalu, alishiminza, na witambuka na kunumba Mulungu.

⁹ Banhu bose bumona alishiminza na kunumba Mulungu:

¹⁰ Bungʼwitegeleja giki, ali ngʼwenuyo wiikalaga igashije ku Nyango Gwa Bulenji gwa hekalu, wilombeleja; bokajiwa na kukumya na kudedebala, kulwa iyo yangʼwilongela.

¹¹ Nema uyo wapijiwagwa aho alibadima Petro na Yohana, banhu bose bubapelela ngʼwibindo likitanagwa lya ngʼwa Solomoni bukumya no.

Lulomelo lwa kabili lwa ngʼwa Petro

¹² Aho Petro ubona iyo, ubashokeja banhu giki, Bingʼwe bagosha ba Israeli, mulikumya mhayo uyu ni buli? nulu mulitukalalila biswe ni buli, giti kulwa budula wiswe wa benekele, nulu kulwa wela wiswe twanshiminjaga munhu uyu?

¹³ Ambu, Mulungu wa ngʼwa Abrahamu, na Isaaka, na Yakobo, Mulungu wa bakulugenji biswe, waankuja Ntumami wakwe Yesu; Uyo bingʼwe ngʼwali ngʼungʼwinha ko, na ngʼunema mu butongi wa ngʼwa Pilato, aho wei wali walekanya giki, ataligulilwe.

¹⁴ Aliyo bingʼwe ngʼwali ngʼunema Uyo Ngʼwela na Ntungilija, na ngʼulomba ngʼwinhiwe mulagi;

¹⁵ Ngʼumulaga Meja wa bupanga, Uyo Mulungu unjucha mu bafu; na biswe tuli bakaniji ba mhayo uyu.

¹⁶ Na kulwa kulizunya lina lyakwe, lina lyakwe lyanguzuhyaga munhu uyu, ngʼwenuyo mulimona na kumana: chene, kuzunya ukulifumila muli Wei kwangʼwinhaga bupanga ubu bushikanu mu miso ga bingʼwe bose.

¹⁷ Na haha, badugu, namanile giki, ngʼwita iyo kulwa butumana wingʼwe, gitumo batale bingʼwe nabo chene.

¹⁸ Aliyo mihayo iyo Mulungu waahangaga kale mu nomo gwa bahangi bakwe bose giki, Kristo shigelile kuluhiwa, wali uyishikilija giko.

¹⁹ Kulwa iyo, oyagi, mugaluke, shibi shingʼwe shijimiwe, makanza ga kwifujiwa gize kufuma mu butongi wa Seba;

²⁰ Huna antume Kristo, Uyo wali wandia kulomelwa ku bingʼwe:

²¹ Uyo shigelile igulu lingʼwanukule kushisha gize makanza ga kudoganya bupya kwa shinhu shose, ayo Mulungu waahayaga mu nomo gwa bahangi bakwe bose bela, kufumila kwandia kwa si.

²² Iki Musa akabawila bakulugenji biswe giki, Seba Mulungu wingʼwe alamubukigija nghangi wa kufuma mu badugu bingʼwe, ali giti nene; Ngʼwenuyo mulangʼwigwage mu mihayo yose iyo alamuwila.

²³ Ilabiza giki, buli munhu uyo alalemaga kungʼwigwa nghangi Ngʼwenuyo alajimijiwa kwinga mu banhu.

²⁴ Chene, na bahangi bose kufuma kuli Samueli, nabo abali biza hanuma yakwe, abo bose abaahayaga, bujihanga kale shiku jeniji.

²⁵ Bingʼwe muli bana ba bahangi, na ba bulagane, wenubo Mulungu wali ulagana na bakulugenji bingʼwe, ungʼwila Abrahamu giki, Mu bubyile wako ngʼanda jose ja si jilasungulilwa lubango.

²⁶ Mulungu, aho wali wamala kunjucha Ntumami wakwe Yesu, untuma ku bingʼwe tame, kumusungulila lubango mu kumugalucha buli munhu winge mu buhunga wakwe.